તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
ગણેશોત્સવને લઈને રાજકોટની બજારોમાં પણ તહેવારી માહોલ
આર્ટિફિશિયલ ફલાવર્સ અને થીમ આધારિત ડેકોરેશન આઈટમ્સની ભારે માંગ : લોકો પોતાની પસંદગી અને બજેટ પ્રમાણે ડેકોરેશન પસંદ કરી રહ્યા છે
રાજકોટ,તા.૧૨: ગણેશ ચતુર્થીને હવે ગણતરીના દિવસો બાકી રહ્યા છે ત્યારે રાજકોટના બજારો રંગબેરંગી ડેકોરેશન સામાનથી છલકાઈ રહ્યા છે. ખાસ કરીને આર્ટિફિશિયલ ફલાવર્સ, લીવ્સ, હેંગિગ્સ, પ્લાન્ટ્સ અને વિવિધ પ્રકારની ડેકોરેશન આઇટમ્સ ખરીદવા માટે લોકો મોટી સંખ્યામાં પહોંચી રહ્યા છે. ગણપતિ બાપ્પાના આગમનને વધુ ભવ્ય અને આકર્ષક બનાવવા માટે લોકો નવી નવી થીમ આધારિત સજાવટ પસંદ કરી રહ્યા છે.
ગણેશ ચતુર્થીનો પાવન તહેવાર નજીક આવી રહ્યો છે અને તેની સાથે રાજકોટની બજારોમાં પણ તહેવારી માહોલ જોવા મળી રહ્યો છે. શહેરના વિવિધ ડેકોરેશન માર્કેટ અને દુકાનોમાં હાલમાં રંગબેરંગી આર્ટિફિશિયલ ફલાવર્સ, પ્લાન્ટ્સ, લીવ્સ, હેંગિગ્સ અને અન્ય સજાવટની વસ્તુઓની ભરમાર જોવા મળી રહી છે. દર વર્ષે ગણપતિ સ્થાપના માટે લોકો વિશેષ ડેકોરેશન કરતા હોય છે, પરંતુ આ વર્ષે બજારમાં આવેલી નવી વેરાયટીએ ગ્રાહકોનું ખાસ ધ્યાન ખેંચ્યું છે.
બજારમાં વિવિધ રંગોના ગુલાબ, મેરીગોલ્ડ, ઓર્કિડ અને અન્ય ફૂલોના આર્ટિફિશિયલ ગાર્લેન્ડ્સ ઉપલબ્ધ છે. કુદરતી ફૂલો જેવી જ દેખાતી આ ડેકોરેશન સામગ્રી લાંબા સમય સુધી ટકી રહેતી હોવાથી લોકો તેને વધુ પસંદ કરી રહ્યા છે. ગણપતિના મંડપને આકર્ષક બનાવવા માટે ફૂલોના પડદા, ફલાવર વોલ અને ડેકોરેટિવ બેકડ્રોપ્સની પણ સારી માંગ જોવા મળી રહી છે. આ ઉપરાંત આર્ટિફિશિયલ પ્લાન્ટ્સ અને લીવ્સ પણ આ વર્ષે ટ્રેન્ડમાં છે. ગ્રીનરી થીમ આધારિત ડેકોરેશન માટે લોકો વિવિધ પ્રકારના પાન, વેલ, હેંગિગ પ્લાન્ટ્સ અને ગ્રીન મેટ્સ ખરીદી રહ્યા છે. આ વસ્તુઓનો ઉપયોગ કરીને ઘરે જ સુંદર અને પ્રોફેશનલ લુકવાળો ગણપતિ મંડપ તૈયાર કરી શકાય છે. ખાસ કરીને નાની જગ્યામાં પણ ભવ્ય ડેકોરેશન કરવા માંગતા લોકો માટે આ વસ્તુઓ ઉપયોગી સાબિત થઈ રહી છે.
દુકાનદારોના જણાવ્યા મુજબ દર વર્ષે ગણેશ ચતુર્થી પહેલા ડેકોરેશન સામાનની માંગ વધે છે, પરંતુ આ વર્ષે ગ્રાહકો ખાસ કરીને થીમ આધારિત સજાવટ તરફ વધુ આકર્ષાઈ રહ્યા છે. પરંપરાગત સજાવટ સાથે આધુનિક ડિઝાઇનનું મિશ્રણ જોવા મળી રહ્યું છે. ગોલ્ડન, વ્હાઇટ, ગ્રીન અને મલ્ટીકલર કોમ્બિનેશનવાળી ડેકોરેશન સામગ્રી લોકોમાં લોકપ્રિય બની રહી છે.
ઘણા પરિવારો ઘરે જ ગણપતિ માટે ખાસ સેટઅપ તૈયાર કરી રહ્યા છે. આવા સમયે આર્ટિફિશિયલ ફલાવર્સ અને પ્લાન્ટ્સ તેમને ઓછા ખર્ચમાં સુંદર સજાવટ કરવાની તક આપે છે. એકવાર ખરીદેલી સામગ્રીનો ઉપયોગ અન્ય તહેવારોમાં પણ કરી શકાય છે, જેના કારણે ગ્રાહકો માટે તે આર્થિક રીતે પણ ફાયદાકારક બની રહે છે. બજારોમાં માત્ર ફૂલો અને પ્લાન્ટ્સ જ નહીં પરંતુ એલઇડી ડેકોરેશન, હેંગિગ બેલ્સ, ડેકોરેટિવ ઝુમ્મર, બેકડ્રોપ ફ્રેમ્સ અને વિવિધ પ્રકારની થીમ ડેકોર આઇટમ્સ પણ ઉપલબ્ધ છે. જેના કારણે લોકો પોતાની પસંદગી અને બજેટ પ્રમાણે ડેકોરેશન પસંદ કરી રહ્યા છે.
ગણેશ ચતુર્થીના આગમન સાથે રાજકોટના બજારોમાં ખરીદીનો માહોલ જામી ગયો છે. રંગબેરંગી આર્ટિફિશિયલ ફલાવર્સ, લીવ્સ અને પ્લાન્ટ્સની આ નવી વેરાયટી માત્ર દુકાનોની શોભા વધારી રહી નથી, પરંતુ ગણપતિ બાપ્પાના સ્વાગતને વધુ ભવ્ય અને યાદગાર બનાવવામાં પણ મહત્વની ભૂમિકા ભજવી રહી છે.(૪૦.૩)
(9:47 AM IST)
