રાજકોટ શહેર હાલમાં જાણે અગનભઠ્ઠીમાં ફેરવાઈ ગયું હોય તેવો અહેસાસ થઈ રહ્યો છે. આકાશમાંથી વરસી રહેલા અંગારા અને 43.1 ડિગ્રી તાપમાનને કારણે શહેરના જનજીવન પર ગરમીની ભારે અસર જોવા મળી રહી છે. બપોરના સમયે કાળઝાળ ગરમીને લીધે શહેરના મુખ્ય માર્ગો અને બજારોમાં સન્નાટો છવાઈ જાય છે.
હવામાન વિભાગ દ્વારા કરવામાં આવેલી આગાહી મુજબ, આગામી બે દિવસ સુધી રાજકોટ સહિત સમગ્ર સૌરાષ્ટ્રના વિસ્તારોમાં હીટવેવની સ્થિતિ યથાવત રહેશે. પવનની ગતિ અને ભેજના અભાવે બપોરના સમયે ગરમીનું પ્રમાણ વધુ આકરૂં અનુભવાઈ રહ્યું છે. હાલમાં તાપમાનમાં નોંધપાત્ર ઘટાડો થવાની કોઈ શક્યતા ન હોવાથી નાગરિકોને સાવધ રહેવા તાકીદ કરવામાં આવી છે.
શહેરમાં તાપમાનનો પારો 43 ડિગ્રીને ઓળંગી જતાં લોકોની દિનચર્યા બદલાઈ ગઈ છે. બપોરના સમયે ઘરની બહાર નીકળવાનું ટાળતા લોકો હવે સવાર-સાંજ પોતાનું કામ પતાવવાનું વધુ પસંદ કરી રહ્યા છે. ગરમીથી બચવા માટે ઠંડા પીણાં, શેરડીનો રસ અને લસ્સીની લારીઓ પર ભીડ જોવા મળી રહી છે.
આકરા તાપથી બચવા માટે આરોગ્ય વિભાગ દ્વારા નીચે મુજબની સૂચનાઓનું પાલન કરવા અનુરોધ કરાયો છે:
 પર્યાપ્ત પાણી પીવો: તરસ ન લાગી હોય તો પણ સમયાંતરે પાણી પીતા રહો.
 બહાર નીકળવાનું ટાળો: બપોરે 12:00 થી 4:00 વાગ્યા દરમિયાન બિનજરૂરી બહાર નીકળવાનું ટાળવું.
 હળવા કપડાં: સુતરાઉ અને આછા રંગના કપડાં પહેરવાને પ્રાધાન્ય આપવું.
 સ્વાસ્થ્યનું ધ્યાન: ચક્કર આવવા, માથાનો દુખાવો કે અતિશય પરસેવો થવો તે લૂ લાગવાના લક્ષણો છે, આવા કિસ્સામાં તાત્કાલિક તબીબી સલાહ લેવી.