રાજકોટ, તા.૨૮: રંગીલા રાજકોટમાં દિવાળીના પર્વને વધુ રંગીન અને યાદગાર બનાવવા માટે રાજકોટ મહાનગરપાલિકા દ્વારા ચાર દિવસીય ભવ્‍ય દિવાળી કાર્નિવલ યોજવાની તૈયારીઓ શરૂ કરી દેવામાં આવી છે. ‘રંગ, રોશની અને રાજકોટ' દીપાવલી ઉત્‍સવના નામે યોજાનારા આ કાર્નિવલમાં રેસકોર્સ રિંગરોડનો અઢી કિલોમીટર વિસ્‍તાર આકર્ષક રોશનીથી ઝળહળી ઊઠશે. વાઘબારસથી દિવાળી સુધી ચાર દિવસ રંગબેરંગી રોશની, ભવ્‍ય રંગોળી સ્‍પર્ધા અને આકાશને રંગીન બનાવતી આતશબાજી સહિતના આકર્ષણો રાજકોટવાસીઓને દિવાળીની ઉજવણીનો અનોખો અનુભવ કરાવશે. મહાનગરપાલિકાના શાસકો દ્વારા આ આયોજનને આખરી ઓપ આપવામાં આવી રહ્યો છે અને તેની સત્તાવાર જાહેરાત આજે સાંજે અથવા આવતીકાલે કરવામાં આવે તેવી શકયતા છે.

રાજકોટ મહાનગરપાલિકા દ્વારા શહેરમાં તહેવારોની ઉજવણીને વિશેષ બનાવવાના ભાગરૂપે વિવિધ કાર્યક્રમો યોજવામાં આવી રહ્યા છે. શરદપૂનમના રાસોત્‍સવ બાદ હવે દિવાળીના તહેવારને ધ્‍યાનમાં રાખીને ચાર દિવસીય કાર્નિવલ યોજવાનો નિર્ણય લેવામાં આવ્‍યો હોવાનું જાણવા મળે છે. દિવાળીના પર્વ દરમિયાન શહેરના નાગરિકો પરિવાર સાથે ઉત્‍સવનો આનંદ માણી શકે તે માટે આકર્ષક રોશની, રંગોળી અને આતશબાજી જેવા કાર્યક્રમોને આયોજનમાં સ્‍થાન આપવામાં આવ્‍યું છે.

મળતી વિગતો મુજબ વાઘબારસ, ધનતેરસ, કાળીચૌદશ અને દિવાળી એમ સળંગ ચાર દિવસ સુધી દીપાવલી ઉત્‍સવ યોજાશે. આ દરમિયાન શહેરના હાર્દસમા રેસકોર્સ રિંગરોડને વિશેષ શણગારવામાં આવશે. રિંગરોડ ફરતે આશરે અઢી કિલોમીટર વિસ્‍તારમાં આકર્ષક અને રંગબેરંગી રોશની કરવામાં આવશે. વિવિધ પ્રકારની લાઇટિંગથી સમગ્ર વિસ્‍તાર ઝળહળી ઊઠશે અને રાત્રિના સમયે રેસકોર્સ વિસ્‍તારમાં દિવાળીનો અનોખો માહોલ જોવા મળશે.

દીપાવલી ઉત્‍સવમાં રોશની ઉપરાંત રંગોળી સ્‍પર્ધાનું પણ વિશેષ આયોજન કરવામાં આવશે. રેસકોર્સ રિંગરોડ ફરતે ભવ્‍ય રંગોળી સ્‍પર્ધા યોજીને રંગોળીના કલાકારોને પોતાની કલાનું પ્રદર્શન કરવાની તક આપવામાં આવશે. વિવિધ રંગો અને આકર્ષક ડિઝાઇનથી તૈયાર થનારી રંગોળીઓ ઉત્‍સવમાં વિશેષ આકર્ષણ જમાવશે.

ચાર દિવસીય કાર્નિવલનું સૌથી મોટું આકર્ષણ ધનતેરસના દિવસે યોજાનારી ભવ્‍ય આતશબાજી બની રહેશે. શહેરના માધવરાવ સિંધિયા ક્રિકેટ ગ્રાઉન્‍ડ ખાતે આતશબાજીનું આયોજન કરવામાં આવશે. આકાશમાં રંગબેરંગી ફટાકડાની રોશની સાથે દિવાળીના પર્વની ઉજવણી કરવામાં આવશે. આ કાર્યક્રમને લઈને પણ મહાનગરપાલિકા દ્વારા તૈયારીઓ હાથ ધરવામાં આવી રહી છે.

અત્રે ઉલ્લેખનીય છે કે, અગાઉ દિવાળી કાર્નિવલ યોજવા અંગે વિચારણા ચાલી રહી હતી અને એક તબક્કે કાર્યક્રમ રદ કરવાની પણ ચર્ચા થઈ હતી. જોકે આખરે ચાર દિવસીય દીપાવલી ઉત્‍સવ યોજવાની દિશામાં નિર્ણય લેવામાં આવ્‍યો હોવાનું જાણવા મળે છે. કાર્નિવલના આયોજન માટે સંબંધિત અધિકારીઓને શોર્ટ ટર્મ ટેન્‍ડર પ્રસિદ્ધ કરવાની સૂચના આપવામાં આવી છે. આજે સાંજ સુધીમાં ટેન્‍ડર પ્રસિદ્ધ કરવામાં આવે તેવી શકયતા છે.

મહાનગરપાલિકાના આ આયોજનમાં ડી.જે.ના કાર્યક્રમોનો સમાવેશ કરવામાં આવ્‍યો નથી. તેના બદલે રોશની, રંગોળી અને આતશબાજી જેવા પરંપરાગત આકર્ષણો દ્વારા દિવાળીના તહેવારને વિશેષ બનાવવાનો પ્રયાસ કરવામાં આવશે. ચાર દિવસ સુધી રેસકોર્સ વિસ્‍તારમાં ઉત્‍સવનો માહોલ સર્જાય તેવી તૈયારીઓ ચાલી રહી છે.

અઢી કિલોમીટર રિંગરોડ ઝળહળશેઃ રેસકોર્સ બનશે આકર્ષણનું કેન્‍દ્ર

રાજકોટના રેસકોર્સ રિંગરોડ ફરતે અઢી કિલોમીટર વિસ્‍તારમાં વિશેષ રોશનીનો શણગાર કરવામાં આવશે. દિવાળીના ચાર દિવસ દરમિયાન રંગબેરંગી લાઇટિંગથી રેસકોર્સ વિસ્‍તાર ઝગમગી ઊઠશે. આકર્ષક રોશની અને રંગોળીના સંગમથી રેસકોર્સ વિસ્‍તાર શહેરવાસીઓ માટે વિશેષ આકર્ષણનું કેન્‍દ્ર બને તેવી ધારણા છે.

ધનતેરસે આકાશમાં રંગોની રમઝટઃ સિંધિયા ગ્રાઉન્‍ડમાં ભવ્‍ય આતશબાજી

દીપાવલી ઉત્‍સવ અંતર્ગત ધનતેરસના દિવસે માધવરાવ સિંધિયા ક્રિકેટ ગ્રાઉન્‍ડ ખાતે ભવ્‍ય આતશબાજીનું આયોજન કરવામાં આવશે. રંગબેરંગી આતશબાજીથી આકાશ ઝળહળી ઊઠશે. ચાર દિવસીય કાર્નિવલમાં આ કાર્યક્રમ મુખ્‍ય આકર્ષણ બની રહે તેવી શકયતા છે.

ડી.જે.ની ધમાલ નહીં, રોશની-રંગોળીથી દિવાળીની ઉજવણી

આ વખતના દિવાળી કાર્નિવલમાં ડી.જે.ના કાર્યક્રમો યોજવામાં નહીં આવે. તેના બદલે રંગોળી સ્‍પર્ધા, આકર્ષક રોશની અને આતશબાજીને પ્રાધાન્‍ય આપવામાં આવ્‍યું છે. આમ, રાજકોટવાસીઓને પરિવાર સાથે દિવાળીના તહેવારની ઉજવણી માણવાની તક મળશે. કાર્નિવલની સત્તાવાર જાહેરાત બાદ કાર્યક્રમોની સંપૂર્ણ રૂપરેખા જાહેર કરવામાં આવશે.(૨૩.૨૧)