તા. ૯ જાન્યુઆરી ર૦ર૫ વિક્રમ સંવત ર૦૮૧ પોષ સુદ – ૧૦ ગુરૂવાર
મનપાની તિજોરીમાં વર્ષભરમાં મિલકતવેરાની માત્ર બે કરોડની આવક
બે-બે વખત વ્યાજમાફીની મુદ્ત લંબાવા છતા આવકમાં કોઇ વધારો નહી : ગત વર્ષે ઓકટોબર સુધીમાં ૨૯૬ કરોડની આવક સામે ચાલુ વર્ષે ૨૯૮ કરોડ જ મળ્યાઃ વ્યાજ માફી યોજનાનો લાભ છતા વેરા વસૂલાતમાં અપેક્ષિત ઉછાળો નહી પ્રથમ તબક્કામાં પોસ્ટ મારફતે ૧.૬૪ લાખથી વધુ બિલ રવાના
રાજકોટ, તા.૨૯: મ્યુનિસિપલ કોર્પોરેશનની તિજોરીમાં મિલકત વેરાની આવકનો પ્રવાહ અપેક્ષા મુજબ વધતો ન હોવાના આંકડા સામે આવ્યા છે. કરદાતાઓને વ્યાજમાફીનો લાભ આપવામાં આવ્યો હોવા છતાં ચાલુ નાણાકીય વર્ષમાં ઓક્ટોબર સુધી મિલકત વેરાની કુલ આવક રૂ.૨૯૮ કરોડે પહોંચી છે. ગત વર્ષે આ જ સમયગાળા દરમિયાન રૂ.૨૯૬ કરોડની આવક થઈ હતી. આમ, એક વર્ષમાં માત્ર બે કરોડ રૂપિયાનો જ વધારો નોંધાતા વેરા વસૂલાતની કામગીરી સામે સવાલો ઊભા થયા છે.
મહાનગરપાલિકા દ્વારા મિલકતધારકોને વેરો ભરવા પ્રોત્સાહિત કરવા વ્યાજમાફીની રાહત આપવામાં આવી હતી. જોકે નબળા આર્થિક વર્ષના કારણે વેરાની આવકમાં ખાસ વધારો જોવા મળ્યો નથી. ગત વર્ષની સરખામણીએ આવકમાં માત્ર ૦.૬૮ ટકાનો વધારો નોંધાયો છે. આ આંકડા દર્શાવે છે કે વ્યાજમાફી જેવી રાહત છતાં વેરા વસૂલાતમાં નોંધપાત્ર વળદ્ધિ થઈ શકી નથી.
બીજી તરફ ચાલુ ઓક્ટોબર માસથી મિલકત વેરાના બિલ ઉપર વ્યાજની ગણતરી શરૂ કરવામાં આવી છે. પરિણામે સમયસર વેરો નહીં ભરનારા મિલકતધારકો ઉપર વ્યાજનો વધારાનો બોજ પડશે. મહાનગરપાલિકાએ વેરા બિલોની બજવણીની કામગીરી પણ હાથ ધરી છે. પ્રથમ તબક્કામાં પોસ્ટ વિભાગ મારફતે કુલ ૧,૬૪,૭૬૩ મિલકત વેરાના બિલ રવાના કરવામાં આવ્યા છે.
વોર્ડવાર આવકના આંકડા ઉપર નજર કરવામાં આવે તો વોર્ડ નં.૭માં રૂ.૩૫.૯૬ કરોડની આવક નોંધાઈ છે, જ્યારે વોર્ડ નં.૧૧માં રૂ.૩૫.૨૮ કરોડની વસૂલાત થઈ છે. તેની સામે વોર્ડ નં.૧૬માં માત્ર રૂ.૪.૬૯ કરોડ અને વોર્ડ નં.૧૭માં રૂ.૫.૯૫ કરોડની આવક નોંધાઈ છે. આમ, વિવિધ વોર્ડની વેરા વસૂલાતમાં મોટો તફાવત જોવા મળી રહ્યો છે.
મહાનગરપાલિકાની આવકનો મુખ્ય આધાર ગણાતા મિલકત વેરામાં અપેક્ષિત વધારો નહીં થતાં આગામી મહિનાઓમાં વસૂલાતની કામગીરી વધુ અસરકારક બનાવવી જરૂરી બની છે. ખાસ કરીને વ્યાજમાફી અમલમાં હોવા છતાં આવકમાં માત્ર બે કરોડનો વધારો થયો હોય ત્યારે બાકી વેરાની વસૂલાત અને કરદાતાઓને સમયસર બિલ પહોંચાડવાની કામગીરી ઉપર વધુ ધ્યાન કેન્દ્રિત કરવું પડશે.
મિલકત વેરાની આવક વધારવા માટે અપાયેલી વ્યાજમાફીની રાહત છતાં ગત વર્ષની સરખામણીએ માત્ર બે કરોડ રૂપિયાની વળદ્ધિ નોંધાઈ છે. બીજી તરફ ઓક્ટોબરથી વેરાના બિલ ઉપર વ્યાજની ગણતરી શરૂ થઈ ગઈ છે. ત્યારે આગામી મહિનાઓમાં વેરા વસૂલાત કેટલી વધે છે અને બાકીદારો પાસેથી કેટલી રકમ વસૂલવામાં આવે છે તેના ઉપર સૌની નજર રહેશે.સંપાદકીય નોંધઃ આપેલા ૧૮ વોર્ડના આંકડાનો સરવાળો રૂ.૨૯૭.૬૨ કરોડ થાય છે, જે રાઉન્ડ ફિગરમાં રૂ.૨૯૮ કરોડ છે.
(2:52 PM IST)
