તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
સાઉથ ઝોન કચેરીનું ૧૫ મહિનામાં માત્ર ૫૦ ટકા બાંધકામઃ ૩૨ કરોડનું કામ ગોકળગાય ગતિએ
ચોમાસાના ચાર મહિના નોનવર્કિંગ ગણાવતું તંત્રઃ કરોડોના પ્રોજેક્ટની સમયસર પૂર્ણાહુતિ માટે જવાબદારી કોની? : જુલાઈ ૨૦૨૫થી શરૂ થયેલા પ્રોજેક્ટમાં દોઢ વર્ષની સમયમર્યાદા સામે અડધું કામ બાકીઃ એજન્સીને નોટિસ ફટકારી મનપા તંત્ર કામગીરીમાં ઝડપ લાવવામાં કેટલું સફળ થશે?
મનપાની દક્ષીણ ઝોન કચેરીનું બાંધકામ સમય મર્યાદામાં પૂર્ણ થશે? : શહેરીજનોની સુવીધા વધારવા મનપા દ્વારા કોઠારીયા રોડ વિસ્તારમાં ગત વર્ષે જુલાઇમાં સાઉથ ઝોન કચેરીનું કામ શરૂ કરવામાં આવ્યુ હતું. જો કે ૧૮ મહિનાની સમયમર્યાદાના ૧૩ મહિના પુરા થયા હોવા છતા કામ માત્ર ૫૦ ટકા જ પૂર્ણ થયુ છે, ત્યારે આગામી બાકીના પ મહિનામાં અધુરૂ કામ કઇ રીતે પૂર્ણ થશે તે સો મણનો સવાલ તંત્ર સમક્ષ ઉભો થયો છે. ઉપરોકત તસ્વીરમાં દક્ષીણ ઝોન કચેરીનું ચાલી રહેલ બાંધકામ જોઇ શકાય છે.(તસ્વીરઃ અશોક બગથરીયા)(
રાજકોટ,તા.૨૪: મહાનગરપાલિકા દ્વારા કોઠારિયા રોડ વિસ્તારમાં નાગરિકોની સુવિધા માટે કરોડો રૂપિયાના ખર્ચે તૈયાર કરવામાં આવી રહેલી નવી સાઉથ ઝોન કચેરીનું બાંધકામ ગોકળગાયની ગતિએ આગળ વધી રહ્યું છે. જુલાઈ ૨૦૨૫માં શરૂ થયેલા આ પ્રોજેક્ટને લગભગ ૧૫ મહિના વીતી ગયા હોવા છતાં માત્ર ૫૦ ટકા જેટલી કામગીરી પૂર્ણ થઈ હોવાનું જાણવા મળે છે. દોઢ વર્ષની સમયમર્યાદામાં કામ પૂર્ણ કરવાની જવાબદારી ધરાવતી એજન્સીની કામગીરી સામે હવે સવાલો ઊભા થયા છે. બીજી તરફ મહાનગરપાલિકા તંત્ર દ્વારા એજન્સીને નોટિસ ફટકારવામાં આવી રહી છે, પરંતુ માત્ર નોટિસથી કામગીરીમાં ઝડપ આવશે કે પછી પ્રોજેક્ટ વધુ વિલંબમાં ધકેલાશે તે જોવાનું રહ્યું.
શહેરના કોઠારિયા રોડ વિસ્તારમાં રાધે ચોક પાસે અંદાજે રૂ. ૩૨.૫૪ કરોડના ખર્ચે નવી સાઉથ ઝોન કચેરીનું નિર્માણ કરવામાં આવી રહ્યું છે. આ કચેરી કાર્યરત થતાં કોઠારિયા રોડ સહિત આસપાસના વિસ્તારોના હજારો નાગરિકોને મહાનગરપાલિકાના વિવિધ કામો માટે દૂર આવેલી ઝોન કચેરીઓ સુધી ધક્કા ખાવામાંથી મુક્તિ મળવાની છે. જોકે, જે પ્રોજેક્ટ નાગરિકોની સુવિધા માટે શરૂ કરવામાં આવ્યો છે તેની ધીમી કામગીરીને કારણે કચેરી કયારે કાર્યરત થશે તે અંગે અનિﾍુિતતા સર્જાઈ છે.
૧૮ મહિનાની મુદતમાં ૧૫ મહિના પસાર, બાકીનું ૫૦ ટકા કામ કેવી રીતે પૂરું થશે?
મળતી માહિતી મુજબ નવી સાઉથ ઝોન કચેરીના બાંધકામની શરૂઆત જુલાઈ ૨૦૨૫માં કરવામાં આવી હતી. એજન્સીને કામ પૂર્ણ કરવા માટે દોઢ વર્ષ એટલે કે ૧૮ મહિનાની સમયમર્યાદા આપવામાં આવી હતી. આમ, મૂળ સમયગાળા પ્રમાણે જાન્યુઆરી ૨૦૨૭ આસપાસ કામગીરી પૂર્ણ થવી જોઈએ. પરંતુ ઓક્ટોબર ૨૦૨૬ સુધીમાં માત્ર અડધી કામગીરી જ પૂર્ણ થઈ છે.
જોકે, મહાનગરપાલિકાના અધિકારીઓ ચોમાસાના ચાર મહિનાને નોનર્વકિંગ પિરિયડ તરીકે ગણવામાં આવ્યા હોવાનું જણાવી રહ્યા છે. આ ચાર મહિના મૂળ સમયમર્યાદામાં સામેલ છે કે એજન્સીને વધારાનો સમય આપવામાં આવ્યો છે તે અંગે સ્પષ્ટતા જરૂરી બની છે.
અહીં સૌથી મોટો સવાલ એ છે કે કરોડો રૂપિયાના પ્રોજેક્ટમાં કામગીરીની ગતિ જાળવવા માટે તંત્ર દ્વારા અત્યાર સુધી શું પગલાં લેવામાં આવ્યા? કામની પ્રગતિની નિયમિત સમીક્ષા કરવામાં આવી હતી કે કેમ? જો કામગીરી ધીમી હતી તો સમયસર ઝડપ વધારવા માટે એજન્સીને કડક સૂચનાઓ કેમ આપવી પડી?
એજન્સીને નોટિસનો દોર, પરંતુ જમીન પર કામગીરીમાં ઝડપ કયારે?
નવી સાઉથ ઝોન કચેરીની કામગીરીને લઈને મહાનગરપાલિકા તંત્ર દ્વારા સંબંધિત એજન્સીને નોટિસ ફટકારવામાં આવી રહી હોવાનું જાણવા મળે છે. જોકે, નોટિસ આપ્યા બાદ એજન્સી દ્વારા કામની ગતિ વધારવા માટે કેટલા વધારાના મજૂરો, મશીનરી અને અન્ય સાધનોની વ્યવસ્થા કરવામાં આવી છે તે પણ તપાસનો વિષય છે.
માત્ર કાગળ પર નોટિસ ફટકારવાથી કરોડો રૂપિયાના પ્રોજેક્ટ સમયસર પૂર્ણ થતા નથી. તેના માટે તંત્રની અસરકારક દેખરેખ અને એજન્સીની જવાબદારી નક્કી કરવી પણ જરૂરી છે. જો કામમાં વિલંબ માટે એજન્સી જવાબદાર હોય તો ટેન્ડરની શરતો મુજબ દંડાત્મક કાર્યવાહી કરવાની જોગવાઈ છે કે કેમ અને તેનો અમલ કરવામાં આવશે કે નહીં તે સવાલ પણ ઊભો થાય છે.
ચોમાસાના ચાર મહિનાનું કારણ, પરંતુ બાકીના મહિનાઓમાં કેટલી પ્રગતિ?
કચેરીના નિર્માણમાં વિલંબ અંગે તંત્રના અધિકારીઓ ચોમાસાના ચાર મહિનાને નોનર્વકિંગ પિરિયડ તરીકે ગણાવી રહ્યા છે. વરસાદી ઋતુ દરમિયાન બાંધકામની કેટલીક કામગીરીમાં અવરોધ સર્જાય તે સ્વાભાવિક છે. પરંતુ આ સમયગાળો પ્રોજેક્ટના મૂળ આયોજનમાં ધ્યાનમાં લેવામાં આવ્યો હતો કે કેમ તે અંગે પણ સવાલો ઊભા થયા છે.
ખાસ કરીને કરોડો રૂપિયાના સરકારી બાંધકામમાં ચોમાસાની સંભાવના અગાઉથી જાણીતી હોય છે. ત્યારે કામગીરીનું સમયપત્રક તૈયાર કરતી વખતે વરસાદી ઋતુને ધ્યાનમાં લેવામાં આવી હતી કે કેમ? જો ચાર મહિનાનો નોનર્વકિંગ પિરિયડ મંજૂર કરવામાં આવ્યો હોય તો તે અંગે સત્તાવાર નિર્ણય કયારે લેવાયો હતો? આવા સવાલોના જવાબ તંત્ર દ્વારા સ્પષ્ટ કરવામાં આવે તે જરૂરી છે.
કોઠારિયા રોડના નાગરિકો હજુ પણ ઝોન કચેરીઓના ધક્કા ખાવા મજબૂર
રાજકોટ મહાનગરપાલિકામાં હાલમાં સેન્ટ્રલ, વેસ્ટ અને ઈસ્ટ એમ ત્રણ ઝોન કાર્યરત છે. શહેરના વિસ્તરણ સાથે કોઠારિયા રોડ અને આસપાસના વિસ્તારોમાં વસતી ઝડપથી વધી રહી છે. સ્થાનિક નાગરિકોને મિલકતવેરા, પાણી, ડ્રેનેજ, સફાઈ, બાંધકામ સહિતની વિવિધ કામગીરી માટે દૂર આવેલી ઝોન કચેરીઓ સુધી જવું પડે છે.
આ સમસ્યાના કાયમી ઉકેલ માટે નવી સાઉથ ઝોન કચેરી બનાવવાની યોજના અમલમાં મૂકવામાં આવી હતી. અગાઉના આયોજન મુજબ વોર્ડ નં. ૧૫, ૧૬, ૧૭ અને ૧૮ના વિસ્તારોને આ કચેરીનો લાભ મળે તેવો આશય હતો.
નવી કચેરી કાર્યરત થયા બાદ નાગરિકોને ઘર નજીક જ મહાનગરપાલિકાની વિવિધ સેવાઓ ઉપલબ્ધ થશે. પરંતુ બાંધકામમાં વિલંબ થતાં સ્થાનિક લોકોને આ સુવિધા માટે વધુ રાહ જોવી પડે તેવી સ્થિતિ સર્જાઈ છે.
આધુનિક સુવિધાઓથી સજ્જ કચેરીનું આયોજન, પરંતુ પૂર્ણાહુતિની તારીખ સામે સવાલ
રાધે ચોક પાસે તૈયાર થઈ રહેલી સાઉથ ઝોન કચેરીમાં બેઝમેન્ટ ર્પાકિંગથી લઈને વિવિધ વહીવટી વિભાગોની આધુનિક સુવિધાઓ ઊભી કરવામાં આવનાર છે.
ગ્રાઉન્ડ ફ્લોર પર સિટી સિવિક સેન્ટર, આધારકાર્ડ સંબંધિત સુવિધા, સિકયુરિટી રૂમ, મેડિકલ રૂમ, રોશની શાખા અને સોલિડ વેસ્ટ મેનેજમેન્ટ શાખા સહિતની વ્યવસ્થા કરવામાં આવશે. પ્રથમ માળે નાયબ કમિશનર, સિટી એન્જિનિયર, ટાઉન પ્લાનિંગ અને અન્ય વિભાગો જ્યારે બીજા માળે હેલ્થ, ટેક્સ, એસ્ટેટ અને બાંધકામ શાખા સહિતની કચેરીઓનું આયોજન કરવામાં આવ્યું છે.
આમ, નાગરિકોને એક જ સ્થળે વિવિધ વહીવટી સેવાઓ મળી રહે તે માટે કરોડો રૂપિયાનું આયોજન કરવામાં આવ્યું છે. પરંતુ બાંધકામ સમયસર પૂર્ણ નહીં થાય તો આ તમામ સુવિધાઓનો લાભ મળવામાં પણ વિલંબ થશે.
કરોડોના પ્રોજેક્ટમાં તંત્રની દેખરેખ સામે પણ સવાલ
નવી સાઉથ ઝોન કચેરીના બાંધકામમાં માત્ર ૫૦ ટકા પ્રગતિ થઈ હોવાની વિગતો સામે આવ્યા બાદ હવે પ્રોજેક્ટની દેખરેખ રાખતા અધિકારીઓની ભૂમિકા પણ મહત્ત્વની બની છે.
મહાનગરપાલિકા દ્વારા એજન્સીને આપવામાં આવેલા વર્ક ઓર્ડર મુજબ કામગીરીનું સમયપત્રક શું હતું? કયા તબક્કે કેટલું કામ પૂર્ણ કરવાનું હતું? અત્યાર સુધી કેટલી કામગીરીનું બિલ ચૂકવવામાં આવ્યું છે? કામગીરીની ગતિ અંગે એજન્સીને કેટલી નોટિસ આપવામાં આવી છે? અને નોટિસ બાદ શું સુધારો થયો છે?
આ તમામ વિગતો જાહેર કરવામાં આવે તો પ્રોજેક્ટની વાસ્તવિક સ્થિતિ વધુ સ્પષ્ટ થઈ શકે છે.
નોટિસથી આગળ વધીને નક્કર કાર્યવાહી થશે કે વધુ એક મુદત મળશે?
કરોડો રૂપિયાના ખર્ચે બની રહેલી નવી સાઉથ ઝોન કચેરીની કામગીરીમાં હવે ઝડપ આવે તે જરૂરી છે. એજન્સીને નોટિસ ફટકાર્યા બાદ તંત્ર દ્વારા કામગીરીનું કડક મોનિટરિંગ કરવામાં આવે અને બાકી રહેલું કામ પૂર્ણ કરવા માટે સ્પષ્ટ સમયપત્રક નક્કી કરવામાં આવે તેવી અપેક્ષા છે.
સૌથી મહત્ત્વની બાબત એ છે કે આ પ્રોજેક્ટ માત્ર એક સરકારી ઇમારતનું બાંધકામ નથી, પરંતુ કોઠારિયા રોડ અને આસપાસના વિસ્તારોના નાગરિકોને ઘરઆંગણે વહીવટી સુવિધાઓ ઉપલબ્ધ કરાવવાની યોજના છે.
ત્યારે હવે સવાલ એ છે કે એજન્સીને નોટિસ ફટકારીને સંતોષ માનતું તંત્ર બાકી રહેલી ૫૦ ટકા કામગીરી સમયસર પૂર્ણ કરાવી શકશે કે પછી નવી સાઉથ ઝોન કચેરીની રાહ જોતા નાગરિકોને હજુ વધુ સમય સુધી અન્ય ઝોન કચેરીઓના ધક્કા ખાવા પડશે?.(૨
તંત્ર અને એજન્સી સામે ઊભા થતા પાંચ સવાલ
૧. જુલાઈ ૨૦૨૫થી શરૂ થયેલી કામગીરીમાં અત્યાર સુધી માત્ર ૫૦ ટકા જ કામ કેમ પૂર્ણ થયું? ૨. કામગીરીની ધીમી ગતિ બદલ એજન્સીને કેટલી નોટિસ આપવામાં આવી અને તેના જવાબમાં શું ખુલાસો કરાયો? ૩. ચોમાસાના ચાર મહિનાનો નોનવર્કિંગ પિરિયડ મૂળ કરારમાં હતો કે પાછળથી મંજૂર કરવામાં આવ્યો? ૪. કામગીરીમાં વિલંબ બદલ એજન્સી સામે દંડાત્મક કાર્યવાહી કરવાની જોગવાઈ છે કે કેમ? ૫. બાકી રહેલી કામગીરી પૂર્ણ કરવા માટે તંત્ર દ્વારા હવે કઈ ચોક્કસ સમયમર્યાદા નક્કી કરવામાં આવી છે?.
(3:07 PM IST)
