રાજકોટ, તા. 26 એપ્રિલ  : સ્થાનિક સ્વરાજ્ય સંસ્થાઓની ચૂંટણી-2026 માં રાજકોટ મહાનગરના મતદાતાઓ માટે ટેક્નોલોજી આશીર્વાદરૂપ સાબિત થઈ છે. જિલ્લા ચૂંટણી વિભાગ દ્વારા તૈયાર કરવામાં આવેલી ખાસ વેબસાઈટ અને ડિજિટલ પ્લેટફોર્મના માધ્યમથી મતદારોએ ખૂબ જ સરળતાથી પોતાના રહેણાંક વિસ્તાર મુજબ મતદાન કેન્દ્રની માહિતી મેળવી હતી.

  બપોરે 2 વાગ્યા સુધીમાં લાખો લોકોએ લીધી મુલાકાત: 

રાજકોટ જિલ્લા કલેક્ટર ડો. ઓમ પ્રકાશના માર્ગદર્શન હેઠળ મતદારોની સુવિધા માટે https://rmc-election.jrtrivedi.in/ નામની વેબસાઈટ તૈયાર કરવામાં આવી છે. આ વેબસાઈટ પર મતદાનના દિવસે બપોરે 2:00 કલાક સુધીમાં કુલ 76,290 લોકોએ મુલાકાત લઈને પોતાના મતદાન મથક અંગેની જાણકારી મેળવી હતી. આ સુવિધાને કારણે મતદારોને ભટકવું પડ્યું નહોતું અને તેઓ સીધા જ પોતાના નિયત બૂથ સુધી પહોંચી શક્યા હતા.

  લોકેશન માટે ગૂગલ મેપનો સચોટ ઉપયોગ: 

આ ડિજિટલ પ્લેટફોર્મની સૌથી મોટી વિશેષતા એ છે કે તેમાં માત્ર વોર્ડ નંબર દાખલ કરવાથી મતદારોને તેમના રહેણાંક વિસ્તાર મુજબ બૂથ નંબર અને મતદાન કેન્દ્ર એટલે કે શાળાનું નામ તુરંત જોવા મળે છે. એટલું જ નહીં, જે-તે મતદાન મથક સુધી પહોંચવા માટે ગૂગલ મેપનું લોકેશન પણ આપવામાં આવ્યું છે, જેની મદદથી અજાણ્યા વિસ્તારના મતદારો પણ સરળતાથી મથક સુધી પહોંચી શક્યા હતા.

  જિલ્લા ચૂંટણી વિભાગનું સુઆયોજન 

રાજકોટ મહાનગરપાલિકાની આ ચૂંટણીમાં ટેક્નોલોજીના આ નવતર પ્રયોગ પાછળ જિલ્લા ચૂંટણી અધિકારી ડો. ઓમ પ્રકાશ, અધિક ચૂંટણી અધિકારી એન.કે. મુછાર તથા બી.એલ.ઓ. જયદીપ ત્રિવેદીની મહત્વની ભૂમિકા રહી છે. આ વેબસાઈટ તૈયાર કરવામાં જયદીપ ત્રિવેદીનો વિશેષ સહયોગ પ્રાપ્ત થયો છે. ઉલ્લેખનીય છે કે, ગત તા. 23 એપ્રિલના રોજ આ વેબસાઈટ અને બે વિશેષ ક્યુ.આર. કોડનું લોકાર્પણ કરવામાં આવ્યું હતું. ચૂંટણી તંત્ર દ્વારા કરવામાં આવેલી આ સુંદર કામગીરીને કારણે મતદારોમાં અનેરો ઉત્સાહ જોવા મળ્યો હતો અને ડિજિટલ ઈન્ડિયાના માધ્યમથી લોકશાહી વધુ મજબૂત બનતી જણાઈ હતી.