રાજકોટ: ​દર્દીને જ્યારે ઓપરેશનની જરૂર પડે ત્યારે તેના પરિવારની સૌથી મોટી આશા હોય છે કે તેને સમયસર અને સારી સારવાર મળે. આ આશાને વધુ મજબૂત બનાવવાના હેતુથી રાજકોટની પંડિત દિનદયાળ ઉપાધ્યાય (PDU) સિવિલ હોસ્પિટલમાં વધુ એક મહત્વપૂર્ણ સુવિધાનો ઉમેરો કરવામાં આવ્યો છે. હોસ્પિટલના OPD બિલ્ડિંગમાં આવેલા સર્જરી વિભાગના OTને અત્યાધુનિક ‘મોડ્યુલર ઓપરેશન થિયેટર’માં અપગ્રેડ કરવામાં આવ્યું છે. આ સુવિધાના ઉદ્ઘાટન સાથે હવે સરકારી હોસ્પિટલમાં પણ ખાનગી કોર્પોરેટ હોસ્પિટલો જેવી અદ્યતન ટેકનોલોજીથી સજ્જ ઓપરેશન થિયેટરની સુવિધા ઉપલબ્ધ બની છે.

​ઉચ્ચ ગુણવત્તાવાળી કામગીરી અને હસ્તાંતરણ પ્રક્રિયા

​આ સમગ્ર કામગીરી અમદાવાદની જીલકોટ ફાર્માસિટીક્યુલ પ્રા. લિ. દ્વારા પૂર્ણ કરવામાં આવી છે. કામગીરી પૂર્ણ થયા બાદ પ્રોજેક્ટ ઇમ્પ્લિમેન્ટેશન યુનિટ દ્વારા ઓપરેશન થિયેટરની ઝીણવટભરી તપાસ કરવામાં આવી હતી. તમામ મુખ્ય સુવિધાઓ સારી સ્થિતિમાં હોવાનું જણાતા આ ઓપરેશન થિયેટર હોસ્પિટલ સત્તાધિકારીઓને સત્તાવાર રીતે હસ્તાંતરિત કરવામાં આવ્યું હતું.

​આધુનિક સુવિધાઓ અને વિશેષતાઓથી સજ્જ ઓટી

​આ મોડ્યુલર ઓપરેશન થિયેટરમાં ઓટોમેટિક હર્મેટિકલી સીલ્ડ ડોર, સર્જન કંટ્રોલ પેનલ, LED ડિમેબલ એક્સ-રે, પેરિફેરલ LED લાઇટ, સિંગલ આર્મ પેન્ડન્ટ, LED OT લાઇટ, HEPA ફિલ્ટર, સ્ક્રબ સ્ટેશન, એન્ટિબેક્ટેરિયલ ફ્લોરિંગ, કન્ડક્ટિવ ફ્લોરિંગ, સ્ટોરેજ, PRD ગ્રિલ, રાઇઝર, સીલિંગમાં મોનો ફિલામેન્ટ્સ, લેમિનાર એર ફ્લો, મોડ્યુલર OT વોલ અને સીલિંગ પેનલ, ઇલેક્ટ્રિક વાયરિંગ, મેડિકલ ગેસ પાઇપલાઇન, એર હેન્ડલિંગ યુનિટ, ડબલ ડોમ OT લાઇਟ, જનરલ ઓપરેટિંગ ટેબલ અને વ્હાઇટ બોર્ડ જેવી અત્યાધુનિક સુવિધાઓનો સમાવેશ કરવામાં આવ્યો છે.

​પરંપરાગત ઓપરેશન થિયેટર કરતાં મોડ્યુલર ઓટીની વિશેષતા તેની આધુનિક ડિઝાઇન અને સ્વચ્છતા જાળવવાની વ્યવસ્થામાં રહેલી છે. પ્રી-ફેબ્રિકેટેડ પેનલ્સ, સાંધા વગરની (Seamless) એન્ટિ-બેક્ટેરિયલ દિવાલો અને વિશેષ ફ્લોરિંગ સર્જરી દરમિયાન સંપૂર્ણ સ્વચ્છ વાતાવરણ જાળવવામાં મદદરૂપ બને છે. અદ્યતન સેન્ટ્રલાઈઝ્ડ કંટ્રોલ પેનલ દ્વારા તાપમાન, ભેજ અને મેડિકલ ગેસ સંબંધિત વ્યવસ્થાઓનું ઉત્તમ નિયંત્રણ કરી શકાય છે. ઓક્સિજન, વેક્યુમ અને અન્ય જરૂરી મેડિકલ સુવિધાઓ માટે ગોઠવવામાં આવેલી પેન્ડન્ટ સિસ્ટમથી સર્જરી દરમિયાન તબીબો અને નર્સિંગ સ્ટાફને જરૂરી સાધનો સરળતાથી ઉપલબ્ધ રહેશે, જે ચેપ નિયંત્રણ અને કાર્યક્ષમતામાં મહત્વપૂર્ણ ભૂમિકા ભજવશે.

​ઓપરેશન ક્ષમતામાં મોટો વધારો: દર મહિને 650થી વધુ સર્જરી

​નવી મોડ્યુલર ઓપરેશન થિયેટર સુવિધાના કારણે હોસ્પિટલની સર્જિકલ કામગીરીની ક્ષમતામાં પણ મોટો વધારો થયો છે. અગાઉ રાજકોટ સિવિલ હોસ્પિટલમાં દર મહિને અંદાજે 550 ઓપરેશન કરવામાં આવતા હતા, જ્યારે હવે નવી સુવિધાના કારણે દર મહિને અંદાજે 650થી વધુ ઓપરેશન કરી શકાશે. આમ, દર મહિને આશરે 100થી વધુ વધારાના ઓપરેશન કરવાની ક્ષમતા ઉપલબ્ધ બનશે. આ વધારો માત્ર આંકડાઓ પૂરતો નથી, પરંતુ સમયસર સર્જરીની રાહ જોઈ રહેલા દર્દીઓ માટે રાહતરૂપ સાબિત થશે અને વેઇટિંગ ટાઇમ ઘટાડવામાં મદદ કરશે.

​ગરીબ અને મધ્યમ વર્ગના દર્દીઓ માટે આશીર્વાદરૂપ

​અદ્યતન ઓપરેશન થિયેટરની સુવિધાઓ સામાન્ય રીતે ખાનગી કોર્પોરેટ હોસ્પિટલોમાં જોવા મળે છે, પરંતુ આ પ્રકારની સુવિધા સરકારી હોસ્પિટલમાં ઉપલબ્ધ થવાથી ગરીબ અને મધ્યમ વર્ગના દર્દીઓ માટે આધુનિક સારવારનો માર્ગ વધુ સરળ બન્યો છે. રાજકોટ સિવિલ હોસ્પિટલ માત્ર રાજકોટ શહેરના જ નહીં, પરંતુ સમગ્ર સૌરાષ્ટ્ર અને કચ્છના અનેક દર્દીઓ માટે સારવારનું મહત્વપૂર્ણ કેન્દ્ર છે. દૂરના વિસ્તારોમાંથી આવતા દર્દીઓ માટે સરકારી હોસ્પિટલમાં આ પ્રકારની અદ્યતન સર્જિકલ સુવિધાઓ મળવી એ ખૂબ જ આશ્વાસનરૂપ છે.

​તબીબો, નર્સિંગ સ્ટાફ અને વહીવટી તંત્રનું માર્ગદર્શન તથા સહયોગ

​આ મહત્વપૂર્ણ સુવિધાના ઉદ્ઘાટન પ્રસંગે હોસ્પિટલના મેડિકલ સુપ્રિટેન્ડન્ટ ડૉ. કમલસિંહ ડોડિયા, સર્જરી વિભાગના વડા ડૉ. જતિન ભટ્ટ, આરએમઓ ડૉ. હર્ષદ દૂસરા, નર્સિંગ સુપરિન્ટેન્ડન્ટ શ્રી પ્રકાશ પ્રજાપતિ તથા શ્રી નીરવ દુધરેજિયાની આગેવાની અને માર્ગદર્શન રહ્યું હતું. આ ઉપરાંત, સર્જરી વિભાગના AP ડૉ. ભાવેશ વૈષ્ણણી, ડૉ. અજય રાજ્યગુરુ, ડૉ. ઇલ્યાસ જુણેજા, ડૉ. જિગ્નેશ દવે, ડૉ. દિવ્યાંગ, ડૉ. પાર્થ કટારિયા, ડૉ. ભાર્ગવ ત્રિવેદી, ડૉ. ઉર્વેશ, ડૉ. આકાશ, ડૉ. રોશન, ડૉ. જિનેશ, ડૉ. મેહુલ અડાલજા અને ડૉ. જયેશ વાગડિયાનો આ સુવિધાના વિકાસમાં મહત્વપૂર્ણ ફાળો રહ્યો છે.

​એનેસ્થેસિયા વિભાગના વડા ડૉ. વંદના પરમાર, પ્રાધ્યાપક ડૉ. જિગીષા બધેકા, આસિસ્ટન્ટ પ્રોફેસર ડૉ. આશુતોષ વ્યાસ તથા ડૉ. શ્રદ્ધા મહેતા, ડૉ. મયુરેશ પારિક, ડૉ. દીપા ગોંડલિયા, ડૉ. ખ્યાતિ જેઠવા, ડૉ. ચાર્મી ભીંભા, ડૉ. દિશા જાવિયા અને ડૉ. ભાનુ કરમટા પણ ઉપસ્થિત રહ્યા હતા. નર્સિંગ સ્ટાફમાં ઓટી ઇન્ચાર્જ શ્રીમતી હંસા ગોજારિયા, શ્રી કમલેશ કડેવાર તથા સ્ટાફ નર્સ અર્ચના ગોસાઈ, હિના પાઘડાલ, સ્મિતા સોંદાગર, નયના બાવળિયા, મમતા રાઠોડ, જનક વસાણી, વિષય વેકરિયા અને બ્રિજેશ ભરડાએ સહયોગ આપ્યો હતો. તબીબો, નર્સિંગ સ્ટાફ અને વહીવટી તંત્રના સહિયારા પ્રયાસોથી હોસ્પિટલના આધુનિકીકરણ તરફ ભરાયેલું આ પગલું સૌરાષ્ટ્ર અને કચ્છના દર્દીઓ માટે આશાનું નવું કિરણ સાબિત થશે.