રાજકોટઃ રંગીલા રાજકોટમાં છેલ્‍લા કેટલાક દિવસોથી જામી રહેલા વરસાદી માહોલ વચ્‍ચે ગઇકાલે મોડી રાત્રે મેઘરાજાએ ધમાકેદાર ઇનિગ રમી હતી. આખો દિવસ આકાશમાં ઘેઘૂર વાદળોની જમાવટ અને મેઘરાજાની આવન-જાવન વચ્‍ચે લોકો વરસાદની વાટ જોઈ રહ્યા હતા, ત્‍યાં જ મોડી રાત્રે બારેક વાગ્‍યાની આસપાસ મેઘરાજાએ મન મૂકીને હેલી વરસાવવાનું શરૂ કર્યું હતું.

હવામાન ખાતાના સત્તાવાર ચોપડે ગઇકાલ રાત્રિના વરસેલા આ ધોધમાર વરસાદ સાથે ૨ ઇંચ (૬૦૨ મિ.મી.) વરસાદ નોંધાઈ ચૂક્‍યો છે. મોડી રાત્રે અચાનક તૂટી પડેલા આ ઝાપટાંના કારણે રાજકોટના રાજમાર્ગો અને નીચાણવાળા વિસ્‍તારોમાં પાણી ફરી વળ્‍યા હતા. રાત્રિના સમયે વાહનચાલકો તેમજ મોડે સુધી જાગતા શહેરીજનો વરસાદની આ મનમોહક હેલીમાં ભીંજાતા નજરે પડ્‍યા હતા.

છેલ્‍લા કેટલાક દિવસથી ચાલતા બફારા અને ઉકળાટ બાદ મોડી રાત્રે પડેલા આ સારા એવા વરસાદને કારણે સમગ્ર શહેરના તાપમાનમાં મોટો ઘટાડો નોંધાયો છે. સવારથી જ ઠંડા પવનોના સૂસવાટા અને આકાશમાં છવાયેલા વાદળોને કારણે વાતાવરણ એકદમ આહ્‍લાદક બની ગયું છે. હવામાન વિભાગની આગાહી મુજબ, આગામી ૨૪ થી ૪૮ કલાક દરમિયાન પણ રાજકોટ સહિત સમગ્ર સૌરાષ્ટ્રમાં મેઘમહેર યથાવત રહેવાની પૂરેપૂરી શક્‍યતાઓ સેવાઈ રહી છે.