રાજકોટ: રહસ્યલોકની આપણી અવિરત અને લોકપ્રિય બનેલી સફરમાં ગયા સપ્તાહે આપણે જોયું કે કેવી રીતે આપણા પૂર્વજોના માનસિક આઘાત અને ડર પેઢી દર પેઢી આપણા જનીનો (ડીએનએ) મારફતે આપણા શરીરમાં પ્રવેશે છે. આ વાંચીને ઘણા વાચકોના મનમાં એવો પ્રશ્ન ઉભો થયો હશે કે જો આપણા પૂર્વજોની બીમારીઓ અને તેમના ભય આપણા ડીએનએમાં અગાઉથી જ લખાઈ ચૂક્યા છે, તો શું આપણે આપણા નસીબ અને આપણા શરીરના ગુલામ છીએ? શું આ પરંપરાને તોડવાનો કોઈ રસ્તો નથી? આધુનિક વિજ્ઞાન આનો અત્યંત સુંદર અને હકારાત્મક જવાબ આપે છે.

જનીન (ડીએનએ) વિજ્ઞાનની નવી શાખા 'એપિજિનેટિક્સ' નો મૂળ અર્થ જ એ થાય છે કે "જનીનોની (ડીએનએ) ઉપરનું વિજ્ઞાન". જીવવિજ્ઞાનીઓ હવે માને છે કે ડીએનએ એ માત્ર એક નકશો અથવા બ્લુપ્રિન્ટ છે. પરંતુ આ નકશામાંથી કયું ઘર બનાવવું અને કયું ન બનાવવું, તેનો આધાર સીધો જ આપણા વિચારો અને આપણા પર્યાવરણ પર રહેલો છે. સાવ સરળ ભાષામાં સમજીએ તો, આપણા ડીએનએમાં હજારો લાખો 'સ્વીચો' આવેલી છે. કઈ બીમારીની સ્વીચ ચાલુ કરવી અને કઈ બીમારીની સ્વીચ બંધ રાખવી, તેનું રિમોટ કંટ્રોલ કુદરતે આપણા મગજ અને આપણી ચેતનાના હાથમાં સોંપ્યું છે!

તબીબી વિજ્ઞાનના સંશોધક ડૉક્ટર બ્રુસ લિપ્ટન તેમના દાયકાઓના અભ્યાસ પછી એ તારણ પર પહોંચ્યા છે કે આપણા વિચારો સીધી રીતે આપણા કોષો પર અસર કરે છે. જ્યારે માણસ સતત ડર, ગુસ્સા કે નકારાત્મકતામાં જીવે છે, ત્યારે તેના શરીરમાં એવા રસાયણો ઉત્પન્ન થાય છે જે ડીએનએમાં રહેલી બીમારીઓની સ્વીચોને 'ઓન' કરી દે છે. આનાથી વિપરીત, જ્યારે માણસ પ્રેમ, કરુણા, આનંદ અને ધ્યાનની અવસ્થામાં રહે છે, ત્યારે તેના શરીરમાં વહેતા હકારાત્મક રસાયણો એ જ ભયંકર બીમારીઓની સ્વીચોને કાયમ માટે 'ઓફ' કરી શકે છે. એટલે કે, તમે ધારો તો તમારા વારસામાં મળેલી બીમારીઓને તમારા પૂરતી જ અટકાવીને આવનારી પેઢીઓને સ્વસ્થ જનીનો (ડીએનએ) ની ભેટ આપી શકો છો.

આધુનિક વિજ્ઞાનની આ શોધ આપણા ભારતીય સંસ્કૃતિના મંત્રોચ્ચાર અને ધ્યાનના વિજ્ઞાનને આબેહૂબ સાચું ઠેરવે છે. આપણું શરીર સિત્તેર ટકા જેટલું પાણીનું બનેલું છે. વૈજ્ઞાનિક પ્રયોગોમાં સાબિત થયું છે કે જ્યારે પાણી પર મંત્રોચ્ચાર, શાસ્ત્રીય સંગીત કે સકારાત્મક શબ્દોના ધ્વનિ તરંગો છોડવામાં આવે છે, ત્યારે પાણીના અણુઓ અત્યંત સુંદર અને શક્તિશાળી ભૌમિતિક આકાર ધારણ કરે છે. જ્યારે આપણે ધ્યાન ધરીએ છીએ કે મંત્રોચ્ચાર કરીએ છીએ, ત્યારે આપણા શરીરની અંદર રહેલા પાણીના માધ્યમથી તે પવિત્ર તરંગો સીધા આપણા ડીએનએ સુધી પહોંચે છે અને તેના બંધારણમાં રહેલી ખામીઓને સુધારવાનું કામ શરૂ કરી દે છે.

આનો અર્થ એ છે કે ડીએનએ એ કોઈ બંધ પુસ્તક નથી, પણ તે એક એવી ખુલ્લી ડાયરી છે જેમાં તમે તમારા સારા વિચારો, ઉત્તમ આહાર અને સાત્વિક જીવનશૈલીથી નવા અને સુંદર પ્રકરણો ઉમેરી શકો છો. જૂના જન્મો કે પૂર્વજોના કર્મોનો ભલે ગમે તેટલો મોટો ભાર હોય, વર્તમાન ક્ષણમાં કરવામાં આવેલું સકારાત્મક પરિવર્તન એ આખી શૃંખલાને કાપી શકે છે. તમે માત્ર એક શરીર નથી, તમે એક શક્તિશાળી ચેતના છો જે પોતાના શરીરનું નિર્માણ દરરોજ જાતે જ કરી રહી છે.

 

*ડીએનએની સ્વીચો*

આપણા શરીરમાં કયા કોષો કેવું વર્તન કરશે, તેનું સંચાલન એપિજિનેટિક્સ માર્કર્સ કરે છે. આ માર્કર્સ વીજળીની સ્વીચ જેવું કામ કરે છે. યોગ્ય આહાર અને તણાવમુક્ત જીવનશૈલી ડાયાબિટીસ કે કેન્સર જેવા જનીનો (ડીએનએ) ની સ્વીચોને બંધ રાખવાની તાકાત ધરાવે છે.

 

*પ્લેસીબો અસરનો જાદુ*

તબીબી વિજ્ઞાનમાં ઘણીવાર દર્દીઓને સાદી ખાંડની ગોળી એવું કહીને આપવામાં આવે છે કે આ અત્યંત જલદ દવા છે. આશ્ચર્યની વાત એ છે કે માત્ર 'હું સાજો થઈ રહ્યો છું' એવો દ્રઢ વિશ્વાસ જ દર્દીના જનીનો (ડીએનએ) ને એ રીતે બદલે છે કે તેની અસાધ્ય બીમારી ખરેખર મટવા લાગે છે.

 

*મંત્રોચ્ચાર અને ધ્વનિ તરંગો*

ધ્વનિ એ ઊર્જાનું સૌથી શક્તિશાળી સ્વરૂપ છે. ૐ (ઓમ) જેવા મંત્રોના ઉચ્ચારણથી મગજમાં પેદા થતા આલ્ફા તરંગો સીધા જ શરીરના કોષોના ડીએનએ ને રિપેર કરવાની પ્રક્રિયાને વેગવંતી બનાવે છે અને આનુવંશિક રોગો સામે ઢાલ બનાવે છે.

 

*ભવિષ્ય તમારા હાથમાં**

આ વિજ્ઞાન સાબિત કરે છે કે તમે તમારા પરિવારના ઇતિહાસના માત્ર દર્શક નથી, પણ તમે ભવિષ્યના સર્જનહાર છો. તમે આજે જેવો સારો ખોરાક લેશો અને જેટલું સારું વાંચશો, તે તમામ હકારાત્મક અનુભવો તમારા જનીનો (ડીએનએ) માં રેકોર્ડ થઈને તમારી આવનારી પેઢીઓને સીધા જ વારસામાં મળશે.

રહસ્યલોક

ધન્વી-માહી