રાજકોટ : દિવાળીના પર્વ નિમિત્તે આકાશમાં છોડવામાં આવેલા ફટાકડાની ચિનગારીઓએ રાજ્યના અનેક વિસ્તારોમાં મુશ્કેલી સર્જી હતી. તહેવારની રાત્રે ફટાકડાની આતશબાજી વચ્ચે રાજકોટ, સુરેન્દ્રનગર અને સાબરકાંઠાના હિંમતનગરમાં આગ લાગવાની ગંભીર ઘટનાઓ સામે આવી હતી, જેને પગલે ફાયર વિભાગની ટીમોને આખી રાત ભારે જહેમત ઉઠાવવી પડી હતી.

રાજકોટમાં અનેક સ્થળોએ આગ અને માનવતાનું ઉત્તમ ઉદાહરણ:
રાજકોટ શહેરમાં દિવાળીની રાત્રે આગની અનેક ઘટનાઓ નોંધાઈ હતી. ગોંડલ રોડ પર આવેલા પી.એન્ડ ટી. કોલોની પાસેના મર્સિડીઝ કારના વર્કશોપમાં અચાનક આગ ભભૂકી ઉઠી હતી. આ ઉપરાંત, જૂના એરપોર્ટના ખુલ્લા મેદાનમાં ઘાસમાં આગ લાગી હતી અને સતગુરુનગરમાં બહાર પાર્ક કરેલી એક કાર પણ આગની લપેટમાં આવીને સ્વાહા થઈ ગઈ હતી. બીજી તરફ, યાજ્ઞિક રોડ પર આવેલા એક કોમ્પ્લેક્સમાં આગ લાગવાની ઘટના સર્જાતા ભારે દોડધામ મચી ગઈ હતી. આ દરમિયાન ફાયર વિભાગની ટીમે ત્વરિત કાર્યવાહી કરીને એક વૃદ્ધ મહિલાને ખભે ઊંચકીને સીડી મારફતે હેમખેમ બહાર કાઢીને માનવતાનું ઉત્તમ ઉદાહરણ પૂરું પાડ્યું હતું.

સુરેન્દ્રનગર અને હિંમતનગરમાં મંડપના ગોડાઉનો આગની ચપેટમાં:
સુરેન્દ્રનગર શહેરના દાળમીલ રોડ પર આવેલી વિજય સોસાયટીમાં ચામુંડા માં મંડપ સર્વિસના ગોડાઉનને મોડી રાત્રે આગે ભક્ષ્ય બનાવ્યું હતું. રહેણાંક મકાનના બીજા માળે આવેલા આ ગોડાઉનમાં રાખવામાં આવેલી ખુરશીઓ, ટેબલ અને મંડપનો અન્ય સામાન સંપૂર્ણપણે બળીને ખાખ થઈ ગયો હતો, જેના કારણે લાખો રૂપિયાનું નુકસાન થવાની આશંકા વ્યક્ત કરવામાં આવી છે. નગરપાલિકાના ત્રણથી ચાર ફાયર ફાઇટરોએ ભારે જહેમત બાદ આગ પર કાબૂ મેળવ્યો હતો, જો કે સદનસીબે આ દુર્ઘટનામાં કોઈ જાનહાનિ થઈ નહોતી.

સાબરકાંઠા જિલ્લાના હિંમતનગરમાં પણ ખેડ તસિયા રોડ પર આવેલા મંડપના ગોડાઉનમાં દિવાળીની રાત્રે આગ ફાટી નીકળી હતી. ફટાકડાના કારણે લાગેલી આ આગમાં મોટી સંખ્યામાં ખુરશીઓ, મંડપના કપડાં, ગાદલાં અને ફર્નિચર બળીને રાખ થઈ ગયા હતા. ઘટનાની જાણ થતાં જ એ ડિવિઝન પોલીસ અને ફાયર બ્રિગેડની ત્રણ ગાડીઓ તાત્કાલિક સ્થળ પર પહોંચી ગઈ હતી અને આગ પર કાબૂ મેળવ્યો હતો. આમ, દિવાળીની રાત્રે બનેલી આ વિવિધ આગની દુર્ઘટનાઓને કારણે સમગ્ર રાત્રિ દરમિયાન ફાયર વિભાગનું તંત્ર એલર્ટ મોડ પર રહ્યું હતું.