રાજકોટ:  શહેરના બેડીપરા વિસ્તારમાં આવેલી શ્રમજીવી સોસાયટીમાં મોડી રાત્રે એક જર્જરિત મકાન અચાનક ધરાશાયી થઈ ગયું હતું. આ ગંભીર દુર્ઘટનાને કારણે આસપાસના વિસ્તારમાં ભારે હચમચ મચી ગયો હતો અને સ્થાનિક લોકોમાં ભયનો માહોલ છવાઈ ગયો હતો. જૂનું અને જોખમી મકાન અચાનક તૂટી પડવાથી રાત્રિના સમયે અફરા-તફરીનો માહોલ સર્જાયો હતો.
આ અકસ્માતમાં મકાનનો કાટમાળ ભારે માત્રામાં નીચે પડતા એક વ્યક્તિ તેની નીચે ગંભીર રીતે દટાઈ ગઈ હતી, જેના કારણે તેનું કરૂણ મોત નીપજ્યું હતું. મૃતકની ઓળખ અજયભાઈ કુરજીભાઈ બેલદાર તરીકે કરવામાં આવી છે. આ ઘટનાને પગલે મૃતકના પરિવારમાં ભારે શોક વ્યાપી ગયો છે અને સમગ્ર વિસ્તારમાં આ ઘટનાની ચર્ચા થઈ રહી છે.
ઘટનાની જાણ થતાં જ ફાયર બ્રિગેડ અને 108 એમ્બ્યુલન્સની ટીમો તાત્કાલિક ધોરણે ઘટનાસ્થળે દોડી આવી હતી અને ત્વરિત બચાવ કામગીરી શરૂ કરી દીધી હતી. કાટમાળ હટાવવા માટે જેસીબી મશીનની મદદ લેવામાં આવી હતી અને રાહત તથા બચાવ કામગીરી યુદ્ધના ધોરણે હાથ ધરવામાં આવી હતી જેથી અન્ય કોઈ ફસાયેલું ન હોય તેની ખાતરી કરી શકાય.