ગુજરાતમાં ન્યાયતંત્ર અને દેશના મહત્વપૂર્ણ ઔદ્યોગિક તેમજ સરકારી પ્રતિષ્ઠાનોને નિશાન બનાવવાની એક સનસનાટીભરી ઘટના સામે આવી છે. તાજેતરના અહેવાલો મુજબ, રાજકોટ બાર એસોસિએશનના સત્તાવાર ઇમેઇલ પર એક પત્ર મોકલીને કોર્ટ પરિસર, જામનગર નજીકના મહત્વના બંદરો, રિફાઇનરી તેમજ પાટનગરના મહાત્મા મંદિરને બોમ્બ બ્લાસ્ટ અને ડ્રોનથી ઉડાવી દેવાની ગંભીર ધમકી આપવામાં આવી છે.

રાજકોટ જિલ્લા અદાલતમાં વકીલો અને પક્ષકારોની ભારે ચહલપહલ વચ્ચે બાર એસોસિએશનના ઓફિશિયલ ઇમેઇલ આઈડી પર એક ધમકીભર્યો ઇમેઇલ મળતાં જ સોપો પડી ગયો હતો. આ ઇમેઇલમાં રાજકોટ કોર્ટ બિલ્ડિંગને ડાયનામાઇટ અને વિસ્ફોટકો વડે ઉડાવી દેવાનો સ્પષ્ટ ઉલ્લેખ કરવામાં આવ્યો હતો.

બાર એસોસિએશનના પદાધિકારીઓએ કોઈપણ ક્ષણનો વિલંબ કર્યા વિના તુરંત જ ન્યાયતંત્રના વરિષ્ઠ અધિકારીઓ, પ્રિન્સિપાલ ડિસ્ટ્રિક્ટ જજ તેમજ સ્થાનિક પોલીસ કમિશનરેટનું ધ્યાન દોર્યું હતું. માહિતી મળતાં જ બોમ્બ ડિસ્પોઝલ સ્ક્વોડ (BDDS), ડોગ સ્ક્વોડ અને ક્રાઈમ બ્રાન્ચની ટીમોએ કોર્ટ પરિસરમાં ધસી જઈને ખૂણેખૂણાની સઘન તપાસ શરૂ કરી દીધી છે.

આ સમગ્ર મામલે સામે આવેલી ચોંકાવનારી વિગતો મુજબ, ઇમેઇલમાં કેનેડા સ્થિત ખાલિસ્તાની નેતાઓ અને પ્રતિબંધિત આતંકવાદી સંગઠન બબ્બર ખાલસા ઇન્ટરનેશનલ (BKI)ના નેતાઓના નામનો સીધો ઉલ્લેખ કરવામાં આવ્યો છે.

ગુજરાત પોલીસ અને સાયબર ક્રાઈમ સેલે આ ઇમેઇલનું મૂળ શોધવા માટે આઈપી એડ્રેસ (IP Address), વીપીએન (VPN) સર્વર તેમજ ડાર્કવેબ સાથે જોડાયેલી લિંક્સની ટેકનિકલ તપાસ હાથ ધરી છે. પ્રાથમિક દ્રષ્ટિએ આ કાવતરું રાજ્યમાં દહેશત ફેલાવવા માટે રચાયું છે કે વાસ્તવિક જોખમ રહેલું છે, તે દિશામાં સુરક્ષા એજન્સીઓ ઊંડાણપૂર્વક છાનબીન કરી રહી છે.

જામનગર મરીન પોલીસ, કોસ્ટ ગાર્ડ અને પોર્ટ સિક્યુરિટી ઓથોરિટીને રેડ એલર્ટ પર મૂકવામાં આવી છે. દરિયાકાંઠે અને રિફાઇનરી પરિસરમાં એન્ટિ-ડ્રોન સિસ્ટમ તેમજ રડાર મોનિટરિંગ કડક બનાવી દેવાયું છે

આ જ ધમકીભર્યા મેઇલમાં ગાંધીનગર ખાતે આવેલા સુપ્રસિદ્ધ કન્વેન્શન સેન્ટર 'મહાત્મા મંદિર' પરિસરમાં બેટરી ઓપરેટેડ બોમ્બ બ્લાસ્ટ કરવાની વાત પણ સામેલ છે. જ્યાં રાષ્ટ્રીય અને આંતરરાષ્ટ્રીય સ્તરની વ્યાપારી સમિટ યોજાય છે તેવા અતિ સંવેદનશીલ સ્થળનો ઉલ્લેખ થતાં જ ગુજરાત એટીએસ (ATS) અને ઇન્ટેલિજન્સ બ્યુરો (IB) પણ સક્રિય બન્યા છે.

પોલીસ અધિકારીઓના જણાવ્યા મુજબ, તમામ સ્થળો પર સ્ટાન્ડર્ડ ઓપરેટિંગ પ્રોસિજર (SOP) મુજબ સુરક્ષા વ્યવસ્થા ચુસ્ત કરવામાં આવી છે. નાગરિકોને અફવાઓથી દૂર રહેવા અને કોઈપણ શંકાસ્પદ વસ્તુ કે હિલચાલ દેખાય તો તરત જ પોલીસ કંટ્રોલ રૂમનો સંપર્ક કરવા જણાવાયું છે.