​રાજકોટ:બાળકો રમતાં-રમતાં અજાણતાં નાની વસ્તુઓ ગળી જાય તો તે તેમના જીવન માટે ગંભીર જોખમ ઊભું કરી શકે છે. રાજકોટમાં તાજેતરમાં બે બાળકો દ્વારા બેટરી ગળી જવાની ચોંકાવનારી ઘટનાઓ સામે આવી છે. જેમાં એક કિસ્સામાં અઢી વર્ષના બાળકના આંતરડાને ગંભીર નુકસાન પહોંચતાં પી.ડી.યુ. સિવિલ હોસ્પિટલ ખાતે ડૉ. જયદીપ ગણાત્રા અને તેમની ટીમ દ્વારા જટિલ ઓપરેશન કરવામાં આવ્યું હતું, જ્યારે બીજા કિસ્સામાં ત્રણ મહિનાની બાળકીની બેટરી તબીબી સલાહ મુજબની સારવાર બાદ સફળતાપૂર્વક બહાર નીકળી ગઈ હતી.

​અઢી વર્ષના એક માસૂમ બાળકે રમતાં-રમતાં નાની બેટરી ગળી લીધી હતી. આ બેટરી પાચનતંત્રમાંથી પસાર થઈ આંતરડા સુધી પહોંચી હતી, જેના કારણે આંતરડાને ગંભીર નુકસાન થયું હતું અને બાળકની સ્થિતિ અત્યંત નાજુક બની ગઈ હતી.

​આ કટોકટીની સ્થિતિમાં પી.ડી.યુ. સિવિલ હોસ્પિટલ, રાજકોટ ખાતે ડૉ. જયદીપ ગણાત્રા અને તેમની ટીમ દ્વારા તાત્કાલિક સારવાર હાથ ધરવામાં આવી હતી. ગત તા. 17 ઑક્ટોબરના રોજ બપોરે 1 વાગ્યે બાળકનું જટિલ ઓપરેશન કરવામાં આવ્યું હતું. તબીબી ટીમ દ્વારા સમયસર જરૂરી સર્જરી અને યોગ્ય સારવાર પૂરી પાડી બાળકનો આબાદ જીવ બચાવી લેવામાં આવ્યો છે.

​ત્રણ મહિનાની બાળકીના કિસ્સામાં તબીબી સલાહથી મળી રાહત

​આવી જ રીતે, અંશી વિવેકભાઈ જોટનિયા નામની માત્ર ત્રણ મહિનાની બાળકીએ પણ અજાણતાં બેટરી ગળી લીધી હતી. આ કિસ્સામાં ડૉ. જયદીપ ગણાત્રા અને તેમની ટીમ દ્વારા પરિવારને જરૂરી અને સચોટ તબીબી સલાહ આપવામાં આવી હતી. તબીબી માર્ગદર્શન અને દવા દ્વારા કરવામાં આવેલી સારવારના પરિણામે બેટરી મળ વાટે કુદરતી રીતે બહાર નીકળી ગઈ હતી, જેનાથી બાળકી અને તેના પરિવારને મોટી રાહત મળી હતી.

​આ બંને કિસ્સાઓ સ્પષ્ટ દર્શાવે છે કે બેટરી ગળી જવાની ઘટનામાં બાળકની ઉંમર, બેટરીનું સ્થાન અને તેની શારીરિક સ્થિતિને આધારે સારવાર અલગ-અલગ હોઈ શકે છે. તેથી, આવા કિસ્સામાં કોઈપણ પ્રકારની વિલંબ કર્યા વગર તાત્કાલિક તબીબી તપાસ અને નિષ્ણાતોની સલાહ લેવી અત્યંત આવશ્યક છે.

​રાજકોટની પી.ડી.યુ. સિવિલ હોસ્પિટલ તથા જનાના હોસ્પિટલ દ્વારા બાળકોને સતત ઉત્તમ તબીબી સેવાઓ પૂરી પાડવામાં આવે છે. બાળકોની ગંભીર પરિસ્થિતિમાં સમયસર સાચું નિદાન, યોગ્ય સારવાર અને તબીબી ટીમ વચ્ચેનું ઉત્તમ સંકલન ખૂબ જ મહત્ત્વપૂર્ણ સાબિત થાય છે. આ સમગ્ર પ્રક્રિયામાં ડૉ. જયદીપ ગણાત્રા અને તેમની નિષ્ણાત ટીમની સાથે-સાથે નર્સિંગ સ્ટાફ અને વર્ગ-૪ ના કર્મચારીઓની કામગીરી પણ નોંધપાત્ર રહી છે. દર્દીઓની યોગ્ય સારવાર તેમજ ઓપરેશન પછીની સંભાળમાં આ સમગ્ર સ્ટાફે મહત્ત્વની ભૂમિકા ભજવી છે.

​વાલીઓ માટે લાલબત્તી સમાન આ ઘટનાઓ છે. ​બટન સેલ બેટરીવાળાં રમકડાં, ટીવી-એસીના રિમોટ, ઘડિયાળ અને અન્ય નાના ઇલેક્ટ્રોનિક ઉપકરણો હંમેશાં નાના બાળકોની પહોંચથી દૂર રાખવા જોઈએ. જો બાળક દ્વારા ભૂલથી પણ બેટરી ગળી જવાની શંકા જાય, તો બાળક તંદુરસ્ત કે સ્વસ્થ દેખાતું હોય તોપણ તેને તાત્કાલિક હોસ્પિટલ લઈ જવું અનિવાર્ય છે. ખાસ કરીને ડૉક્ટરની સલાહ વિના ક્યારેય બાળકને ઊલટી કરાવવી નહીં કે કોઈ જોખમી ઘરગથ્થુ ઉપચાર કરવા નહીં.

​એક નાની બેટરી માસૂમ બાળકના જીવન માટે મોટું જોખમ બની શકે છે. આ બંને ઘટનાઓ તમામ માતા-પિતા માટે બાળકોની સુરક્ષા બાબતે વધુ સજાગ અને સતર્ક રહેવાનો મોટો સંદેશ આપે છે તેમજ કટોકટીના સમયે સમયસર મળતી તબીબી સલાહ અને સારવારનું અદ્ભુત મહત્ત્વ ઉજાગર કરે છે.