રાજકોટ: શહેરના યુનિવર્સિટી રોડ પર એક પૂરપાટ ઝડપે આવતી લક્ઝુરિયસ કારે ટુ-વ્હીલરને અડફેટે લેતાં ગમખ્વાર અકસ્માત સર્જાયો હતો. મંદિરે દર્શન કરીને ઘર તરફ જઈ રહેલા વૃદ્ધ મહિલાને ગંભીર ઈજાઓ પહોંચતા સારવાર દરમિયાન હોસ્પિટલમાં દમ તોડ્યો હતો. ઘટનાના સીસીટીવી ફૂટેજ સામે આવ્યા બાદ પોલીસે કાર ચાલક સામે ગુનો નોંધી વધુ તપાસ હાથ ધરી છે.

રંગીલા રાજકોટના માર્ગો પર અતિશય ગતિથી વાહન હંકારતા ચાલકો નિર્દોષ રાહદારીઓ અને વાહનચાલકો માટે સતત જોખમરૂપ બની રહ્યા છે. રાજકોટના યુનિવર્સિટી રોડ જેવા વ્યસ્ત માર્ગ પર એક બેફામ કાર ચાલકે આગળ જઈ રહેલા ટુ-વ્હીલરને પાછળથી જોરદાર ટક્કર મારી હતી.

ટક્કર એટલી પ્રચંડ હતી કે ટુ-વ્હીલર સવાર વૃદ્ધ મહિલા રોડ પર દૂર સુધી ફંગોળાઈ ગયા હતા. અકસ્માતને પગલે આસપાસના સ્થાનિક લોકો અને રાહદારીઓ તાત્કાલિક ઘટનાસ્થળે દોડી આવ્યા હતા અને ગંભીર રીતે લોહીલુહાણ હાલતમાં પડેલા વૃદ્ધાને તાત્કાલિક નજીકની સરકારી હોસ્પિટલ ખાતે સારવાર અર્થે ખસેડ્યા હતા. જોકે સારવાર દરમિયાન સ્થિતિ નાજુક બનતાં તેમણે અંતિમ શ્વાસ લીધા હતા.

આ અકસ્માત યુનિવર્સિટી રોડ પર આવેલા એક પેટ્રોલ પંપ પાસે સર્જાયો હતો. અકસ્માતની સમગ્ર ક્ષણ નજીકના પેટ્રોલ પંપ પર લાગેલા સીસીટીવી કેમેરામાં સ્પષ્ટ રીતે કેદ થઈ ગઈ છે. ફૂટેજમાં જોઈ શકાય છે કે કાર અત્યંત જોખમી અને બેદરકારીભરી ઝડપે દોડી રહી હતી.

ટુ-વ્હીલર સામાન્ય ગતિમાં પોતાના માર્ગ પર આગળ વધી રહ્યું હતું ત્યારે અચાનક પાછળથી ધસમસતી આવેલી કારે બ્રેક માર્યા વગર તેને જોરદાર ટક્કર મારી દીધી હતી. ફૂટેજ સોશિયલ મીડિયા પર વાયરલ થતાં લોકોમાં બેફામ વાહનચાલકો સામે ભારે આક્રોશ ફેલાયો છે.