રાજકોટ તા. ૩૦: શહેરના કાલાવડ રોડ પર વિરડા વાજડી ગામે બાલાજી કંપની નજીક નદી કિનારે તાજી જન્‍મેલી એક બાળકીને ત્‍યજી દેવામાં આવતાં ચકચાર મચી ગઇ છે. બનાવની જાણ થતાં ૧૦૮ પહોંચી હતી અને બાળકીને સારવાર માટે રાજકોટ ઝનાના હોસ્‍પિટલમાં ખસેડી પોલીસને જાણ કરી હતી.

જાણવા મળ્‍યા મુજબ વિરડા વાજડી નજીક નદી કાંઠે આશરે સાત દિવસ પહેલા જન્‍મેલી બાળકને કોઇએ ત્‍યજી દીધી હોઇ આ અંગેની જાણ કોઇ રાહદારી દ્વારા થતાં તુરત જ ૧૦૮ સાથે ઇએમટી મનિષાબેન પરમાર અને પાઇલોટ પહોંચી ગયા હતાં. તબિબે બાળકીને તપાસતાં શરીરનું તાપમાન યોગ્‍ય જણાયું નહોતું. તે રડતી પણ નહોતી. આથી તુરત જ બાળકીને સ્‍ટીમ્‍યુલેશન આપતાં તે રડવા માંડી હતી અને સ્‍થિતિમાં સુધારો થયો હતો.

પ્રાથમિક સારવાર બાદ બાળકીને સારવાર માટે રાજકોટ હોસ્‍પિટલમાં ખસેડાઇ હતી. બનાવની જાણ પોલીસને કરવામાં આવતાં આ નવજાત ફુલડા જેવી બાળકીને કોણ ત્‍યજી ગયું? તેની તપાસ હાથ ધરી છે.