રાજકોટ શહેરમાં સાયબર ક્રાઈમના દૂષણને ડામવા માટે પોલીસ દ્વારા 'ઓપરેશન મ્યુલ હન્ટ-2.0' અંતર્ગત સપાટો બોલાવવામાં આવ્યો છે. રૂ. 1 કરોડ 78 લાખના મોટા સાયબર ફ્રોડની મળેલી ફરિયાદોના આધારે પોલીસે કડક કાર્યવાહી કરીને 8 જેટલી ગુનાહિત FIR દાખલ કરી છે. આ મામલે કુલ 16 શખ્સો વિરૂદ્ધ ગુનો નોંધવામાં આવ્યો છે, જેમાંથી સાયબર ઠગોને પોતાના બેંક એકાઉન્ટ ભાડે આપનારા 8 આરોપીઓની પોલીસે ધરપકડ કરી લીધી છે. કમિશનની લાલચમાં આવીને ગુનેગારોને બેંક ખાતા પુરા પાડતા તત્વો પર પોલીસે આકરી તવાઈ બોલાવતા સાયબર ગુનેગારોમાં ફફડાટ વ્યાપી ગયો છે.