રાજકોટ તા. ૧૧ :.. જિલ્લા પંચાયતની ૩૬ બેઠકો અને જિલ્લાની ૧૧ તાલુકા પંચાયતોની ર૦ર બેઠકો માટે આજે છેલ્લા દિવસે ઉમેદવારી કરવા માટે રાજકીય પક્ષો અને અપક્ષોએ ધસારો કર્યો છે. જે તે તાલુકાવાર ચૂંટણી પંચની ઉમેદવારી સ્‍વીકારવાની વ્‍યવસ્‍થા છે. રાજકોટ તાલુકાની જિલ્લા પંચાયતની ૬ બેઠકો માટે જુની કલેકટર કચેરીમાં પ્રાંત અધિકારી શ્રી મહેક જૈન સમક્ષ ઉમેદવારી પત્રો રજુ થઇ રહ્યા છે. ભાજપના રાજકોટ ખાતે ઉમેદવારી કરનારા  ઉમેદવારો સવારે ચૌધરી હાઇકસ્‍ુલ પાસે એકત્ર થયેલ. ત્‍યાં વિજય સંકલ્‍પ કરી ઉમેદવારી કરવા માટે રવાના થયા હતાં. જિલ્લા ભાજપના આગેવાનોએ ઉમેદવારો અને કાર્યકરોને પ્રોત્‍સાહિત કર્યા હતાં.

જિલ્લા પંચાયતની ૩૬ પૈકી ૩૩ બેઠક ઉપર ગઇકાલે ઉમેદવાર જાહેર કરવામાં આવ્‍યા છે. તો બેડલાં, કુવાડવા, અને શિવરાજપુર બેઠકના ઉમેદવાર જાહેર કરવાના બાકી છે. જાહેર થયેલા ઉમેદવારોમાં બેડી બેઠક પર સુમીતાબેન ચાવડાને રિપીટ કરવામાં આવ્‍યા જયારે રાજેશભાઇ ડાંગરને રિપીટ કરી દેરડીના બદલે મોવિયા બેઠક પરથી ઉમેદવાર જાહેર કરાયા છે. અને લોધીકા બેઠક પરથી હાસ્‍ય કલાકાર ધીરૂભાઇ સરવૈયાના પુત્ર દિલીપ સરવૈયાને ટિકીટ આપવામાં આવી છે.

રાજકોટ જિલ્લા પંચાયતમાં ર૧ બેઠક બીન અનામત સામાન્‍ય, ૧૦ બેઠક સામાજિક શૈક્ષણીક  પછાત વર્ગ (ઓબીસી), ૪ બેઠક અનુસુચિત જાતિ અને ૧ બેઠક અનુસુચિત જનજાતિની જાહેર કરવામાં આવી છે.

જિલ્લા પંચાયતના પૂર્વ કારોબારી સમિતિના ચેરમેન અને પૂર્વ વિપક્ષ નેતા પણ રહી ચુકેલા અર્જુન ખાટરિયાનું પતુ કપાઇ ગયું છે. અર્જુન ખાટરીયા રપ વર્ષ સુધી કોંગ્રેસમાં રહ્યા બાદ ગત લોકસભા ચૂંટણી પહેલાં વર્ષ ર૦ર૩ માં તેઓએ કેસરીયો ધારણ કરી ભાજપમાં પ્રવેશ કર્યો હતો. તેઓ સતત ચાર ટર્મથી જિલ્લા પંચાયતના સભ્‍ય તરીકે ચૂંટાઇ આવતા હતા જો કે ભાજપમાં પ્રવેશ બાદ આ વખતે તેમની બાદબાકી કરવામાં આવી છે. જો કે તેમની પસંદગી મુજબ તેમના યુવરાજ ખાટરિયાને ટીકીટ આપવામાં આવી છે.

જિલ્લા પંચાયતમાં ભાજપે ૧૧ લેઉવા પટેલ, ર-કડવા પટેલ, ૧૦ કોળી, ૪ અનૂસૂચિત જાતિ, ૪ આહીર, ૧ ક્ષત્રીય, ૧ ગઢવી, ૧ અનૂસૂચિત જનજાતિ અને ૧ ખાંટ રાજપૂત સમાજને ટીકીટ આપી છે. ૪ બેઠકો સામાન્‍ય વર્ગની હોવા છતાં ત્‍યાં જ્ઞાતિના સમીકરણો ધ્‍યાને રાખી બક્ષીપંચ વર્ગને ટીકીટ અપાયેલ છે. જિલ્લામાં કુલ ૧૪ લાખ મતદારો છે.