તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
મનપાના ૭૫ કર્મચારીઓના પગાર વધારાને અંતે કમિશનરની મંજુરી
સ્ટેન્ડિંગ કમિટીએ આર્થિક બોજ કહી નકારી દરખાસ્તઃ જનરલ બોર્ડમાં અરજન્ટ તરીકે પસાર થયા બાદ અમલનો માર્ગ મોકળો
રાજકોટ, તા. ૮: રાજકોટ મહાનગરપાલિકામાં વર્ગ ૧ થી ૪ના કર્મચારીઓ અને અધિકારીઓના પગાર વધારાની ચર્ચાસ્પદ દરખાસ્તને અંતે કમિશનરની મંજુરી મળી ગઈ છે. અગાઉ આ દરખાસ્ત સ્ટેન્ડિંગ કમિટીમાં મુકાતા કરોડો રૂપિયાનું વધારાનું આર્થિક ભારણ ઊભું થાય તેવી દલીલ સાથે તેને નામંજુર કરવામાં આવી હતી.
પરંતુ બાદમાં સંકલનના અભાવ અને કર્મચારી યુનિયનોની રજૂઆતોના યોગ્ય અભ્યાસ ન થવાનો મુદ્દો સામે આવતા આ જ દરખાસ્તને જનરલ બોર્ડમાં અરજન્ટ દરખાસ્ત તરીકે રજૂ કરી મંજુર કરવામાં આવી હતી. હવે લાંબા સમય બાદ કમિશનરે આ નિર્ણયને અનુમોદન આપતા પગાર સુધારાને લીલી ઝંડી મળી છે.
સ્ટેન્ડિંગ કમિટી ઠરાવ નં. ૫૪૭ તા. ૨૦/૦૨/૨૦૨૬ મુજબ મનપાની વિવિધ શાખાઓમાં કુલ ૯ સંવર્ગોના પગારધોરણમાં સુધારો કરવાનો નિર્ણય લેવામાં આવ્યો છે. જેમાં ક્રમ નંબર ૧ અને ૨ના હોદ્દાઓ માટે સરકારની મંજુરી બાદ સુધારેલા પગારધોરણ લાગુ કરાશે, જ્યારે ક્રમ ૩ થી ૯ સુધીના સંવર્ગોમાં સીધો પગાર સુધારો અમલમાં મુકવામાં આવશે.
આ ઉપરાંત સંબંધિત કર્મચારીઓને નિમણૂક અથવા બઢતીની તારીખથી ઠરાવની તારીખ સુધી નોશનલ લાભ આપવાની પણ જોગવાઈ કરવામાં આવી છે. હાલ મનપામાં કાયમી ફરજ બજાવતા કર્મચારીઓને જ આ લાભ મળશે.
(3:26 PM IST)
