રાજકોટ :શહેરના જંગલેશ્વર વિસ્તારમાં ગેરકાયદેસર દબાણો પર વહીવટી તંત્રનો હથોડો ઝીંકવા માટેની તમામ તૈયારીઓ પૂર્ણ કરી લેવામાં આવી છે. આવતીકાલે સવારથી જ આ વિસ્તારમાં 'મેગા ડિમોલિશન' શરૂ થવાનું છે, જેના માટે તંત્રએ કોઈ યુદ્ધના મેદાન જેવી પૂર્વતૈયારી કરી હોય તેમ વિશાળ સંખ્યામાં મશીનરી અને માનવબળ તૈનાત કરી દીધું છે.
જંગલેશ્વરમાં વર્ષો જૂના અને મજબૂત ગેરકાયદે બાંધકામોને તોડી પાડવા માટે મહાનગરપાલિકાએ અત્યાર સુધીનો સૌથી મોટો મશીનરી કાફલો મેદાનમાં ઉતાર્યો છે. કુલ 260થી વધુ નાની-મોટી મશીનરીઓ ઘટનાસ્થળે પહોંચી ચૂકી છે,

આ ઓપરેશન એટલું વિશાળ છે કે તેને પાર પાડવા માટે અલગ-અલગ ઝોનની ટીમો બનાવવામાં આવી છે. જેસીબી અને હિટાચી જેવા ભારે મશીનો દ્વારા મોટા બાંધકામો તોડવામાં આવશે, જ્યારે સાંકડી ગલીઓમાં ગેસકટર અને બ્રેકરની મદદ લેવાશે. કાટમાળના નિકાલ માટે ડમ્પર અને ટ્રેક્ટરોની હારમાળા તૈયાર રાખવામાં આવી છે જેથી ટ્રાફિક કે અવરોધ ઊભો ન થાય.

જંગલેશ્વર વિસ્તારમાં કેટલાક લોકો જાતે મકાનો તોડી રહ્યા છે તો અમુક મહિલાઓએ રડતી આંખે કહ્યું હાલમાં તો રોડ પર સામાન રાખી ને રહેશું , કોઈ મકાન ભાડે દેતું નથી 

તંત્રની આ આક્રમક તૈયારી જોઈને દબાણકર્તાઓમાં ભારે ફફડાટ વ્યાપી ગયો છે. છેલ્લા બે દિવસથી અનેક લોકોએ સ્વૈચ્છિક રીતે પોતાનો સામાન ખસેડવાનું શરૂ કરી દીધું હતું, પરંતુ જે બાકી રહેલા દબાણો છે તેના પર આવતીકાલે સવારે 'બુલડોઝર' ફરી વળશે. આ કામગીરી દરમિયાન કાયદો અને વ્યવસ્થા જળવાઈ રહે તે માટે પોલીસનો પણ ચુસ્ત બંદોબસ્ત ગોઠવવામાં આવ્યો છે.
મ્યુનિસિપલ કમિશનર અને પોલીસ કમિશનર દ્વારા આ સમગ્ર કામગીરીનું સતત મોનિટરિંગ કરવામાં આવી રહ્યું છે. જંગલેશ્વરના ઈતિહાસનું આ સૌથી મોટું ડિમોલિશન બની રહેશે તેમ મનાઈ રહ્યું છે.