રાજકોટ:  શહેરના કિસાનપરા ચોક વિસ્તારમાં એક વાહનમાં અચાનક આગ લાગી આ ઘટનાથી આસપાસના વિસ્તારમાં ગભરાટ ફેલાયો હતો, પરંતુ ફાયર વિભાગ અને પોલીસની ત્વરિત કાર્યવાહીથી પરિસ્થિતિ કાબુમાં આવી ગઈ હતી. સદનસીબે, આ ઘટનામાં કોઈ જાનહાનિ થઈ નથી.

રાત્રે 10:00 વાગ્યાની આસપાસ કિસાનપરા ચોકમાં એક વાહનમાં અચાનક આગ લાગી હતી.માહિતી અનુસાર, પહેલા વાહનમાંથી ધુમાડો નીકળવા લાગ્યો અને થોડી જ વારમાં આગે વિકરાળ સ્વરૂપ ધારણ કરી લીધું. આગ એટલી ઝડપથી ફેલાઈ ગઈ કે મોટાભાગનો વાહન રાખ થઈ ગયો.ઘટનાની જાણ થતાં જ સ્થાનિક લોકોએ તાત્કાલિક ફાયર વિભાગને જાણ કરી. રાજકોટ ફાયર બ્રિગેડની ટીમ તાત્કાલિક ઘટનાસ્થળે પહોંચી ગઈ અને આગ પર કાબુ મેળવવાનું કામ શરૂ કર્યું. આગની તીવ્રતા હોવા છતાં, ફાયર વિભાગની ત્વરિત કાર્યવાહીથી આગ આસપાસના વિસ્તારોમાં ફેલાતી અટકી.

ઘટનાની માહિતી મળતાં, રાજકોટ પોલીસનો કાફલો પણ ઘટનાસ્થળે પહોંચી ગયો. પોલીસે આસપાસના વિસ્તારને ઘેરી લીધો હતો અને ટ્રાફિકને નિયંત્રિત કરીને બચાવ કામગીરીમાં મદદ કરી હતી. વાહનમાં સવાર તમામ લોકો સમયસર ઉતરી જવાને કારણે સુરક્ષિત રહ્યા. આ ઘટનામાં કોઈ જાનહાનિ થઈ નથી, જે મોટી રાહતની વાત છે.આગ લાગવાનું ચોક્કસ કારણ હજુ સ્પષ્ટ નથી. પ્રારંભિક તપાસમાં શોર્ટ સર્કિટ કે ટેકનિકલ ખામી હોવાની શંકા છે. ફાયર વિભાગ અને પોલીસે ઘટનાની વધુ તપાસ શરૂ કરી છે, જે વાહનની ટેકનિકલ સ્થિતિ અને આગ લાગવાના મૂળ કારણોની તપાસ કરશે.