<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 18th June 2025

જુની કલેકટર કચેરીની મામલતદાર કચેરીમાં ત્રણ દિ'થી સર્વર ડાઉન : સેંકડો લોકોને ધક્કાઃ પ્રચંડ રોષ

કલેકટર સહિત તમામ અધિકારીને ફરીયાદોઃ છતા કોઇ ઉકેલ નથી

રાજકોટ, તા. ૧૮:  શહેરની જૂની ક્‍લેક્‍ટર કચેરીમાં આવેલી મામલતદાર કચેરીમાં છેલ્લા ત્રણ દિવસથી સર્વર ડાઉન હોવાના કારણે આવકના દાખલા કઢાવવા આવતા અરજદારો ભારે હાલાકીનો સામનો કરી રહ્યા છે. સર્વર નહિ ચાલતા અરજદારોને ધક્કા ખાવા પડી રહ્યા છે, જેના કારણે તેમનો સમય અને પૈસા બંને વેડફાઈ રહ્યા છે.

આવકનો દાખલો એ એક અગત્‍યનો દસ્‍તાવેજ છે જે બાળકોના શાળા-કોલેજના પ્રવેશ, શૈક્ષણિક કાર્ય, અને હોસ્‍પિટલમાં દાખલ થવા જેવી અનેક જરૂરિયાતો માટે અનિવાર્ય છે. છેલ્લા ત્રણ દિવસથી સર્વર ડાઉનના કારણે આ દાખલા ન મળતા અરજદારો ચિંતિત બન્‍યા છે.

 ઘણા અરજદારો પોતાના ધંધા-રોજગાર છોડીને સવારથી કચેરીએ આવી રહ્યા છે, પરંતુ સર્વર ડાઉનના કારણે તેમને નિરાશ થઈને પાછા ફરવું પડે છે, આ બાબતે કલેકટર એડી. કલેકટર- પ્રાંત અધિકારી-મામલદાર સુધી ફરીયાદો થઇ પરંતુ કોઇ ઉકેલ આવ્‍યો નથી, આજે પણ સર્વર ડાઉન હોય લોકોને ભારે ધક્કા થયા હતા. (૯.૩૧)

(3:24 PM IST)