રાજકોટઃ તા.૫: શહેરના મવડી પ્‍લોટ વિસ્‍તારમાં ગઇકાલે સાંજે એક મકાન ધરાશાયી થવાની ઘટના બની હતી  સદ્‌નસીબે મકાન ખાલી હોય કોઇ અપ્રિય ઘટના બની ન હતી. બાજુમાં ખાડો ખોદેલો હોય તેના કારણે મકાન ઘસી પડયાનું જાણવા મળ્‍યું છે.

આવી જ રીતે વોર્ડ નં.૩ વિસ્‍તારમાં પણ એક સોસાયટી પાસેના કોમન પ્‍લોટમાં બેફામ ખોદકામ થતા આસપાસના મકાનોના પાયા હચમચી ઉઠયાની ફરિયાદ મનપાના કોલ સેન્‍ટરમાં નોંધાતા તંત્ર દોડતું થયું છે.

આ ઘટનાની જાણવા મળતી વિગતો મુજબ અહી ૬ મહિના અગાઉ કોમ્‍યુનીટી હોલના નિર્માણની શરૂઆત થઇ હતી, પણ  કાયદાકીય ગુંચવણ ઉભી થતા કામ અટવાયુ છે. આ ખોદકામ હાલનું નહીં પણ જુનું હોવાનું જણાવામાં આવી રહ્યું છે.

મનપામાં આ અંગે ફરિયાદ મળતા તંત્ર દ્વારા આવતીકાલે એક ડેપ્‍યુટી ઇજનેરને સ્‍થળ મુલાકાતે મોકલવામાં આવનાર છે. ખોદકામ અગાઉ હોય પણ તેની અસર હવે થઇ હોવાનું જાણવા મળ્‍યું છે.