રાજકોટ, તા. ૨૨: એક તરફ શહેરમાં ગરીબ અને મધ્‍યમવર્ગીય પરિવારો પોતાનું ઘર મેળવવાની આશા સાથે મહાનગરપાલિકાની આવાસ યોજનાઓ તરફ મીટ માંડીને બેઠા છે, ત્‍યારે બીજી તરફ મનપાની વિવિધ આવાસ યોજનાઓમાં કુલ ૨૬૧૮ મકાનો ખાલી હોવાની ચોંકાવનારી વિગતો સામે આવી છે. કરોડો રૂપિયાના ખર્ચે નિર્માણ પામેલા આવાસોની ફાળવણી હજુ બાકી હોવાથી તંત્રની કામગીરી સામે અનેક સવાલો ઊભા થયા છે. વોર્ડ નં. ૯ના કોર્પોરેટર રાજુભાઈ અઘેરાએ પૂછેલા પ્રશ્નના જવાબમાં મહાનગરપાલિકાના આવાસ વિભાગે આ વિગતો જાહેર કરી છે.મનપાના સત્તાવાર જવાબ મુજબ, એફોર્ડેબલ આવાસ યોજનાની બે ટાઉનશિપમાં જ ૧૫૩૮ મકાનો ખાલી છે. જ્‍યારે પ્રધાનમંત્રી આવાસ યોજનાની એલઆઇજી, એમઆઇજી તથા ઇડબ્‍લ્‍યુએસ સહિતની અન્‍ય યોજનાઓમાં વધુ ૧૦૮૦ આવાસ ખાલી હોવાનું સામે આવ્‍યું છે. આમ, કુલ ૨૬૧૮ આવાસની ફાળવણી બાકી હોવાની વિગતો બહાર આવી છે.

મહાનગરપાલિકાના જવાબમાં સૌથી ચોંકાવનારી વિગતો શહીદ રાજગુરુ ટાઉનશિપની સામે આવી છે. આ ટાઉનશિપમાં કુલ ૧૫૩૮ આવાસ પૈકી ૧૪૦૪ આવાસ ખાલી હોવાનું દર્શાવવામાં આવ્‍યું છે. એટલે કે આ યોજનાના અંદાજે ૯૧ ટકા મકાનો હજુ ખાલી છે. જ્‍યારે વીર તાત્‍યા ટોપે ટાઉનશિપમાં કુલ ૫૨૮ આવાસ પૈકી ૧૩૪ આવાસ ખાલી હોવાનું જણાવાયું છે. આમ, આ બંને ટાઉનશિપમાં કુલ ૨૦૬૬ આવાસ પૈકી ૧૫૩૮ આવાસ ખાલી છે. શહીદ રાજગુરુ ટાઉનશિપના ખાલી આવાસોની ફાળવણી માટે જરૂરી કાર્યવાહી કરવાની હોવાનું મનપાએ જવાબમાં જણાવ્‍યું છે. જોકે, આટલી મોટી સંખ્‍યામાં મકાનો ખાલી રહેવા પાછળના કારણો અને તેની ફાળવણી કયારે પૂર્ણ થશે તે અંગે સવાલો ઊભા થયા છે.

મનપાના જવાબમાં પ્રધાનમંત્રી આવાસ યોજનાની અન્‍ય શ્રેણીઓમાં પણ મોટી સંખ્‍યામાં મકાનો ખાલી હોવાનું સામે આવ્‍યું છે.એલઆઇજી યોજનામાં ૬ આવાસ, એમઆઇજી યોજનાના વિવિધ સ્‍થળોએ કુલ ૧૭ આવાસ તથા ઇડબ્‍લ્‍યુએસ યોજનામાં ૧૦૫૭ આવાસ ખાલી હોવાનું દર્શાવવામાં આવ્‍યું છે. આમ, આ ત્રણેય શ્રેણીમાં કુલ ૧૦૮૦ આવાસની ફાળવણી બાકી છે. આ મકાનોની ફાળવણી માટે કયાંક ડ્રો યોજવાનો બાકી છે, તો કયાંક લાભાર્થીઓની પસંદગી તથા અન્‍ય વહીવટી પ્રક્રિયા પૂર્ણ કરવાની બાકી હોવાનું મનપાના જવાબમાં જણાવાયું છે.રાજકોટ મહાનગરપાલિકા દ્વારા આર્થિક રીતે નબળા અને મધ્‍યમવર્ગીય પરિવારોને સસ્‍તા દરે આવાસ ઉપલબ્‍ધ કરાવવાના હેતુથી વિવિધ યોજનાઓ અમલમાં મૂકવામાં આવી છે. જોકે, હજારો મકાનો ખાલી હોવાની વિગતો સામે આવતાં આવાસ યોજનાઓના અમલીકરણ અને ફાળવણીની પ્રક્રિયા અંગે પ્રશ્નો સર્જાયા છે.

મકાનો તૈયાર હોવા છતાં તેની ફાળવણીમાં વિલંબ થતો હોય તો તેના કારણે જરૂરિયાતમંદ પરિવારોને સમયસર આવાસનો લાભ મળતો નથી. ત્‍યારે ખાલી મકાનોની ફાળવણી માટે મહાનગરપાલિકા સમયબદ્ધ આયોજન કરે તે જરૂરી બન્‍યું છે.

મહાનગરપાલિકાના જવાબ મુજબ, કેટલીક આવાસ યોજનાઓમાં લાભાર્થીઓની પસંદગી માટે ડ્રો યોજવાની કાર્યવાહી બાકી છે. જ્‍યારે કેટલીક યોજનાઓમાં દસ્‍તાવેજોની ચકાસણી, લાભાર્થીઓની વિગતો તથા અન્‍ય વહીવટી પ્રક્રિયા પૂર્ણ થયા બાદ મકાનોની ફાળવણી કરવામાં આવશે.

રાજકોટ મહાનગરપાલિકાએ પ્રધાનમંત્રી આવાસ યોજના હેઠળ શહેરમાં ૩૦ હજાર આવાસના લક્ષ્યાંક અંગે પણ જવાબમાં વિગતો રજૂ કરી છે. વિવિધ યોજનાઓના ડીપીઆર, મંજૂરી અને બાકી રહેલી કામગીરી અંગે માહિતી આપવામાં આવી છે.

એક તરફ નવા આવાસોના નિર્માણ અને આયોજનની કામગીરી આગળ વધારવામાં આવી રહી છે, ત્‍યારે બીજી તરફ અગાઉની યોજનાઓમાં ખાલી પડેલા મકાનોની ફાળવણી પૂર્ણ કરવી પણ મનપા માટે મહત્ત્વનો પડકાર બની છે.

૨૬૧૮ મકાનોની ફાળવણી કયારે? મનપા સામે અનેક સવાલ

મહાનગરપાલિકાના સત્તાવાર જવાબમાં હજારો મકાનો ખાલી હોવાનું સામે આવ્‍યા બાદ હવે આ આવાસોની ફાળવણી કયારે કરવામાં આવશે તે મહત્ત્વનો સવાલ બન્‍યો છે.

ખાલી મકાનો માટે લાભાર્થીઓની પસંદગીની પ્રક્રિયા કેટલી આગળ વધી છે? ડ્રો યોજવામાં વિલંબ શા માટે થઈ રહ્યો છે? બાકી રહેલી વહીવટી કાર્યવાહી પૂર્ણ કરવા માટે કોઈ સમયમર્યાદા નક્કી કરવામાં આવી છે કે કેમ? આવા અનેક પ્રશ્નો ઊભા થયા છે.આ સંજોગોમાં રાજકોટ મહાનગરપાલિકા ખાલી પડેલા ૨૬૧૮ આવાસોની ફાળવણી માટે કેટલી ઝડપથી કામગીરી હાથ ધરે છે અને જરૂરિયાતમંદ પરિવારોને તેમના સપનાનું ઘર કયારે મળે છે તે જોવાનું રહેશે.(૬.૧૪)

રાજગુરૂ ટાઉનશિપના ૯૧ ટકા આવાસ ખાલી!

મનપાના જવાબમાં શહીદ રાજગુરુ ટાઉનશિપની સ્‍થિતિ સૌથી વધુ ધ્‍યાન ખેંચનારી છે. અહીં કુલ ૧૫૩૮ આવાસમાંથી ૧૪૦૪ આવાસ ખાલી છે. એટલે કે માત્ર ૧૩૪ આવાસ જ ખાલી નથી. આટલી મોટી સંખ્‍યામાં મકાનો ખાલી હોવા છતાં તેની ફાળવણીની પ્રક્રિયા પૂર્ણ થઈ નથી. ત્‍યારે આ યોજના હેઠળના મકાનોની ફાળવણી ઝડપથી થાય તે જરૂરી બન્‍યું છે.

કયાં કેટલા આવાસ ખાલી?

આવાસ યોજનાઃ ખાલી મકાનો વીર તાત્‍યા ટોપે ટાઉનશિપઃ ૧૩૪ શહીદ રાજગુરુ ટાઉનશિપ ૧૪૦૪ PMAY-LIG યોજનાઃ ૬ PMAY-MIG યોજનાઃ ૧૭ EWS યોજનાઃ ૧૦૫૭

હજાર બાગના કરોડ ફુલ કરતાં પ્રણયની એક પળ સુંદર છે! પ્રિયતમ કે પ્રિયતમાનું જીવન સ્‍વર્ગથી અધિક સુંદર છે.