કિવ:  રશિયા સામેના લાંબા યુદ્ધમાં થાકેલા યુક્રેને હવે અમેરિકાના પૂર્વ રાષ્ટ્રપતિ ડોનાલ્ડ ટ્રમ્પને રીઝવવા માટે એક અત્યંત અનોખો અને વિવાદાસ્પદ દાવ ખેલ્યો હોય તેમ જણાય છે. અહેવાલો અનુસાર, યુક્રેનિયન વહીવટીતંત્ર ડોનબાસ પ્રદેશના એક મોટા હિસ્સાને "ડોનીલેન્ડ"  તરીકે નામ આપવાનો પ્રસ્તાવ વિચારી રહ્યું છે. આ વિસ્તાર ગ્રેટર લંડન કરતાં પણ ત્રણથી ચાર ગણો મોટો હોવાનું કહેવાય છે. કિવના વાટાઘાટકારોને આશા છે કે જો કોઈ વિસ્તારનું નામ ટ્રમ્પના નામ સાથે જોડવામાં આવે, તો ટ્રમ્પ વહીવટીતંત્ર રશિયાના પ્રાદેશિક દાવાઓ સામે કડક વલણ અપનાવી શકે છે અને યુક્રેનને ફરીથી શક્તિશાળી સૈન્ય સહાય મળવાનું શરૂ થઈ શકે છે.

આ પ્રસ્તાવ પાછળની વાર્તા પણ એટલી જ ફિલ્મી છે; એવું કહેવામાં આવી રહ્યું છે કે યુક્રેનિયન અધિકારીઓએ આ કાલ્પનિક 'મિની-સ્ટેટ' માટે ChatGPT નો ઉપયોગ કરીને ખાસ લીલા અને સોનાના રંગનો ધ્વજ તેમજ રાષ્ટ્રગીત પણ તૈયાર કરી લીધું છે. જોકે આ અંગે હજુ સુધી કોઈ સત્તાવાર મહોર મારવામાં આવી નથી, પરંતુ આ સમાચાર સોશિયલ મીડિયા અને આંતરરાષ્ટ્રીય રાજકારણમાં ચર્ચાનો વિષય બન્યા છે. ડોનબાસનો આ આશરે 80 બાય 65 કિલોમીટરનો વિસ્તાર, જ્યાં લગભગ 1.90 લાખ લોકો વસે છે, તે યુદ્ધમાં મુખ્ય વિવાદનું કેન્દ્ર રહ્યો છે. હવે તેનું નામ બદલીને તેને 'સ્વાયત્ત એન્ટિટી' બનાવવાની વાત ટ્રમ્પના 'ઈગો' ને સંતોષવા માટેનો એક રાજદ્વારી વ્યૂહ હોઈ શકે છે.

જ્યારે રશિયા આખા ડોનબાસ પર કાયદેસરના કબજાની જીદ લઈને બેઠું છે, ત્યારે યુક્રેનનું આ પગલું વાટાઘાટોમાં નવી ગરમી લાવી શકે છે. રશિયન અખબારો આ પ્રસ્તાવને મજાક ગણાવી રહ્યા છે, પરંતુ કિવમાં બેઠેલા રણનીતિકારો માને છે કે ટ્રમ્પ જેવા નેતાને આકર્ષવા માટે આ પ્રકારના "ગ્રાન્ડ જેસ્ચર" (મોટા પ્રતીકો) કારગત નીવડી શકે છે. છેલ્લા આઠ અઠવાડિયાથી ચાલી રહેલી દરિયાઈ અને જમીની કટોકટી વચ્ચે, શું "ડોનીલેન્ડ" ખરેખર યુદ્ધવિરામનો માર્ગ મોકળો કરશે કે પછી આ માત્ર એક રાજકીય હાસ્યસ્પદ ઘટના બનીને રહી જશે, તે તો સમય જ કહેશે.