નવી દિલ્હી, તા. ૧૩: પ્રખ્યાત યુટ્યુબર ધ્રુવ રાઠી સામે ૨૦૧૮થી ચાલી રહેલા એક જૂના માનહાનિ કેસમાં દિલ્હીની સાકેત કોર્ટે કડક વલણ અપનાવતા નવું સમન્સ જારી કર્યું છે. વર્ષોથી જર્મનીમાં રહેતા ધ્રુવ રાઠી હાલ ભારતના પ્રવાસે હોવાની માહિતી કોર્ટ સમક્ષ મૂકાયા બાદ, અદાલતે આગામી ૨૦ નવેમ્બરે યોજાનારી સુનાવણીને પ્રી-પોન કરીને ૧૭ ઓક્ટોબરના રોજ નવી તારીખ નક્કી કરી છે. જ્યુડિશિયલ મેજિસ્ટ્રેટ ફર્સ્ટ ક્લાસ રાહુલ જૈને રાઠીને ઝડપથી બજવણી થાય તે માટે હાથથી લખેલું વિશિષ્ટ સમન્સ મોકલવાનો સ્પષ્ટ આદેશ આપ્યો છે.

આ સમગ્ર વિવાદ ૨૦૧૮માં ધ્રુવ રાઠી દ્વારા યુટ્યુબ પર અપલોડ કરાયેલા "બીજેપી આઈટી સેલ પાર્ટ-૨" નામના વિડીયોથી શરૂ થયો હતો. ફરિયાદી વિકાસ સાંકૃત્યાયને આક્ષેપ કર્યો હતો કે આ વિડીયોમાં રાઠીએ તેમની છબી ખરડાવવા માટે અનેક ખોટા અને પાયાવિહોણા આરોપો લગાવ્યા હતા. ફરિયાદ મુજબ, આ વિડીયો ડિજિટલ પ્લેટફોર્મ પર મોટા પ્રમાણમાં વાયરલ થયો હતો, જેના કારણે સમાજમાં તેમની માનહાનિ થઈ હોવાનો કેસ દાખલ કરવામાં આવ્યો હતો.

સુનાવણી દરમિયાન ફરિયાદીએ કોર્ટને જણાવ્યું હતું કે ધ્રુવ રાઠી અગાઉ વિદેશમાં રહેતા હોવાના કારણે તેમને સમન્સ બજાવવામાં વર્ષો સુધી વિલંબ થયો હતો. જોકે, હાલમાં એક વિરોધ પ્રદર્શન સંદર્ભે તેઓ ભારતમાં આવ્યા છે અને હરિયાણાના ગુરુગ્રામ સ્થિત તેમના નિવાસસ્થાને હાજર છે. સાંકૃત્યાયને રજૂઆત કરી હતી કે જો તાત્કાલિક સુનાવણી હાથ ધરવામાં નહીં આવે તો આરોપી ફરીથી વિદેશ જતો રહેશે, જેને ધ્યાનમાં રાખીને અદાલતે તાકીદે નવું સમન્સ જારી કરવાનો આદેશ કર્યો છે.

આ કેસની વિગતો આપતાં વિકાસ સાંકૃત્યાયને જણાવ્યું હતું કે રાઠીએ પોતાના વિડીયોમાં આરોપ મૂક્યો હતો કે કોઈ વ્યક્તિને સાંકૃત્યાયન સામે બોલવા માટે ₹૫૦ લાખની ઓફર કરવામાં આવી હતી. આ જ વિડીયો દિલ્હીના પૂર્વ મુખ્યમંત્રી અરવિંદ કેજરીવાલે પણ સોશિયલ મીડિયા પર શેર કર્યો હતો, જેના પગલે કેજરીવાલ અને રાઠી બંને સામે કાનૂની કાર્યવાહી શરૂ કરવામાં આવી હતી. કેજરીવાલે બાદમાં કોર્ટમાં બિનશરતી માફી માંગી લીધી હતી, પરંતુ ધ્રુવ રાઠી ક્યારેય કોર્ટ સમક્ષ હાજર થયા નહોતા.

અગાઉ ૨૩ જુલાઈ, ૨૦૧૯ના રોજ પણ દિલ્હી કોર્ટે ધ્રુવ રાઠી વિરુદ્ધ સમન્સ જારી કર્યું હતું, પરંતુ બજવણી ન થતાં સમન્સ ગુરુગ્રામ સ્થિત તેમના ઘરના દરવાજે ચોંટાડવાની ફરજ પડી હતી. ફરિયાદીનો દાવો છે કે તેઓ લાંબા સમયથી કોર્ટ કાર્યવાહીથી બચવાનો પ્રયાસ કરી રહ્યા હતા. આ કેસમાં દિલ્હી હાઈકોર્ટ અને નિચલી અદાલતો દ્વારા કાનૂની પ્રક્રિયાઓને ઝડપી બનાવવાનો નિર્દેશ આપવામાં આવ્યો હોવાથી હવે આ કેસ નિર્ણાયક મોડ પર પહોંચ્યો છે.

ઉલ્લેખનીય છે કે, ૧૭ ઓક્ટોબરે યોજાનારી આગામી સુનાવણી દરમિયાન જો ધ્રુવ રાઠી કોર્ટ સમક્ષ હાજર નહીં થાય તો અદાલત તેમની સામે વધુ કડક કાનૂની આદેશો કરી શકે છે. હાલમાં અદાલતે આરોપો પર કોઈ અંતિમ નિર્ણય આપ્યો નથી અને કાનૂની પ્રક્રિયાના ભાગરૂપે બંને પક્ષોને પોતાની રજૂઆત કરવાનો પૂર્ણ અવકાશ આપવામાં આવ્યો છે. શનિવારે સાકેત કોર્ટમાં થનારી આ સુનાવણી પર દેશભરના સોશિયલ મીડિયા અને રાજકીય વર્તુળોની નજર ટકેલી રહેશે.