બિહટા : બિહારની રાજધાની પટણા નજીકના બિહટા વિસ્તારમાં બેફામ બનેલા અજાણ્યા ગુનેગારોએ એક ઘરમાં ઘૂસીને યુવાનની માથામાં ગોળી મારીને નિર્મમ હત્યા કરી નાખતા અરેરાટી વ્યાપી ગઈ છે. મંગળવારે મોડી રાત્રે (૧૦ નવેમ્બર, ૨૦૨૬) મોટરસાઇકલ પર આવેલા બે સશસ્ત્ર ઈસમોએ સિમરી ગામમાં ભાડાના મિકાનમાં રહેતા ૩૨ વર્ષીય ઇરફાન ઇમામ ઉર્ફે કલ્લુ નામના ડ્રાઇવરનો દરવાજો બળજબરીથી ખોલાવ્યો હતો. ઇરફાન બહાર આવતાં જ ગુનેગારોએ તેના માથામાં પોઇન્ટ બ્લેન્ક રેન્જથી ગોળી ધાણી દીધી હતી, જેનાથી તેનું ઘટનાસ્થળે જ કરુણ મોત નીપજ્યું હતું.

બનાવની વિગતો અનુસાર, વ્યવસાયે ડ્રાઇવર એવો ઇરફાન છેલ્લા બે વર્ષથી સિમરી ગામમાં ભાડાના મકાનમાં પોતાના પરિવાર સાથે રહેતો હતો. મંગળવારે રાત્રે આશરે ૧૧:૩૦ વાગ્યે જ્યારે ઇરફાન પોતાના મોટા પુત્ર સાથે રૂમમાં સૂતો હતો ત્યારે બે અજાણ્યા શખ્સોએ દરવાજો ખખડાવીને ખોલવા દબાણ કર્યું હતું. દરવાજો ખુલતાની સાથે જ હુમલાખોરોએ ગોળીબાર કર્યો હતો અને ઇરફાનનો મોબાઇલ ફોન લઈને ફરાર થઈ ગયા હતા. ધડાકાનો અવાજ સાંભળીને આસપાસના ગ્રામજનો ભેગા થઈ ગયા હતા અને બનાવ અંગે પોલીસને જાણ કરી હતી.

મૃતકની પત્ની નેહા પરવીને જણાવ્યા મુજબ, કૌટુંબિક વિવાદને કારણે તેઓ ભાડાના મકાનમાં રહેતા હતા અને એક મહિના પહેલા પણ તેમના પર જાનલેવા હુમલો થયો હતો. તે વખતે આરાથી બાઇક પર પરત ફરતી વખતે મૌધી ગામ નજીક અજાણ્યા લોકોએ હવામાં ગોળીબાર કર્યો હતો. તે સમયે બંને ઉગરી ગયા હતા, પરંતુ આ વખતે મોડી રાત્રે ઘરમાં ઘૂસીને આચરાયેલી હત્યાને પગલે પરિવારમાં ભારે અશાંતિ અને સમગ્ર વિસ્તારમાં ગભરાટનું વાતાવરણ છવાઈ ગયું છે.

બિહતા પોલીસ સ્ટેશનના અધિકારી અમિત કુમારના જણાવ્યા મુજબ ઘટનાસ્થળેથી એક વપરાયેલું કારતૂસ મળી આવ્યું છે અને મૃતદેહને કબ્જે કરીને આગળની કાર્યવાહી હાથ ધરવામાં આવી છે. ગુનેગારો દ્વારા મોબાઇલ ફોન લઈ જવામાં આવ્યો હોવાથી તેમજ અગાઉ થયેલા ગોળીબારની કડીઓને ધ્યાનમાં રાખીને પોલીસ પત્ની અને પરિવારજનોની પૂછપરછ કરી રહી છે. હાલ હત્યા પાછળનું ચોક્કસ કારણ સ્પષ્ટ થયું નથી, પરંતુ તમામ પાસાઓની ઊંડાણપૂર્વક તપાસ કરીને હુમલાખોરોને પકડી પાડવા પોલીસે તજવીજ તેજ કરી છે.