નવી દિલ્હી:દિલ્હીના સફદરજંગ વિસ્તારમાં દિલ્હી જ્યુડિશિયલ સર્વિસના ૩૫ વર્ષીય અધિકારી અને જજ અમન કુમાર શર્માએ શનિવારે પોતાના ઘરે કથિત રીતે આત્મહત્યા કરી લેતા ન્યાયિક જગતમાં ચકચાર મચી ગઈ છે. પ્રાથમિક અહેવાલો મુજબ, અમન કુમાર શર્માનો મૃતદેહ તેમના ઘરના બાથરૂમમાં લટકતી હાલતમાં મળી આવ્યો હતો. ૧૮ ઓક્ટોબર, ૨૦૨૫ થી તેઓ ઉત્તર-પૂર્વ દિલ્હીની કરકરડૂમા કોર્ટમાં જિલ્લા કાનૂની સેવા સત્તામંડળ (DLSA) ના પૂર્ણ-સમયના સચિવ તરીકે ફરજ બજાવી રહ્યા હતા.

પારિવારિક કલેશ અને ગંભીર આક્ષેપો:

ઘટના અંગે પોલીસ તપાસ ચાલી રહી છે ત્યારે અમન કુમાર શર્માના એક સંબંધીએ તેમની પત્ની સ્વાતી અને સાળી નિધિ મલિક પર ગંભીર આક્ષેપો કર્યા છે. સંબંધીના જણાવ્યા મુજબ, અમન અને તેની પત્ની વચ્ચે છેલ્લા કેટલાક સમયથી વિવાદ ચાલી રહ્યો હતો. અમન કુમાર શર્માની સાળી નિધિ મલિક, જે હાલ જમ્મુમાં IAS અધિકારી તરીકે ફરજ બજાવે છે, તે અમનના પારિવારિક જીવનમાં દખલગીરી કરતી હોવાનો અને તેના ઘર પર નિયંત્રણ રાખતી હોવાનો આક્ષેપ કરવામાં આવ્યો છે.

પિતાને ફોન કરી વ્યથા ઠાલવી હતી:

અમન કુમાર શર્માએ શુક્રવારે રાત્રે અલવર ખાતે રહેતા તેમના પિતાને ફોન કરીને પોતે ભારે વ્યથામાં હોવાનું અને હવે જીવવું મુશ્કેલ હોવાનું જણાવ્યું હતું. આ સાંભળી પિતા તાત્કાલિક દિલ્હી પહોંચ્યા હતા. પિતા સમક્ષ અમને એવી રજૂઆત કરી હતી કે છેલ્લા બે મહિનાથી તેને માનસિક રીતે હેરાન કરવામાં આવી રહ્યો છે. શનિવારે સવારે પણ ઘરમાં ઉગ્ર દલીલો થઈ હતી, જેમાં પત્ની સ્વાતી ગુસ્સામાં બૂમો પાડી રહી હતી અને અમન રડી રહ્યો હતો.

બાથરૂમમાં લટકતી હાલતમાં મળ્યો મૃતદેહ:

ઘરમાં થોડી વાર શાંતિ થયા બાદ જ્યારે પિતાએ અમનની તપાસ કરી તો તે ક્યાંય મળ્યો નહોતો. પિતાએ અમનના ફોન પર કોલ કરતા બાથરૂમની અંદરથી રિંગ સંભળાઈ હતી. લાંબા સમય સુધી દરવાજો ન ખુલતા આખરે ગાર્ડ શંકરે નિસરણીની મદદથી બાથરૂમની બારી તોડી અંદર પ્રવેશ કર્યો હતો, જ્યાં અમન લટકતી હાલતમાં મળી આવ્યો હતો. તેમને તાત્કાલિક સફદરજંગ હોસ્પિટલ ખસેડવામાં આવ્યા હતા, પરંતુ ત્યાં હાજર તબીબોએ તેમને મૃત જાહેર કર્યા હતા.

પોલીસ તપાસ અને ન્યાયિક કારકિર્દી:

સફદરજંગ એન્ક્લેવ પોલીસ સ્ટેશનના અધિકારીઓએ જણાવ્યું હતું કે હાલમાં પોસ્ટમોર્ટમ રિપોર્ટની રાહ જોવાઈ રહી છે અને આ કેસમાં તમામ પાસાઓની તપાસ કરવામાં આવી રહી છે. વર્ષ ૨૦૧૮ માં પુણેની સિમ્બાયોસિસ લો સ્કૂલમાંથી સ્નાતક થયેલા અમન કુમાર શર્માએ ૧૯ જૂન, ૨૦૨૧ ના રોજ દિલ્હી જ્યુડિશિયલ સર્વિસમાં જોડાયા હતા. પોતાની ટૂંકી કારકિર્દીમાં તેમણે સિવિલ જજ અને જ્યુડિશિયલ મેજિસ્ટ્રેટ ફર્સ્ટ ક્લાસ (JMFC) તરીકે અનેક મહત્વના કેસોની સુનાવણી કરી હતી. પોલીસ અત્યારે તે સંજોગોની તપાસ કરી રહી છે જેને કારણે એક પ્રતિષ્ઠિત જજને આત્મહત્યા કરવા જેવું કઠોર પગલું ભરવું પડ્યું.