લખનૌ: ઉત્તર પ્રદેશની રાજધાની લખનૌમાં કાયદો અને વ્યવસ્થાના ધજાગરા ઉડાવતી એક સનસનીખેજ ઘટના સામે આવી છે. બજારખાલા પોલીસ સ્ટેશન વિસ્તારના મહેંદીગંજમાં રહેતા ભારતીય જનતા યુવા મોરચા (BJYM) ના ૩૫ વર્ષીય નેતા શ્યામ ચેતન તિવારી પર શનિવારે મોડી રાત્રે અજાણ્યા બદમાશે તેમના ઘરની બહાર જ તાબડતોબ ગોળીબાર કર્યો હતો. ગોળી વાગવાથી લોહીલુહાણ થયેલા નેતાને સ્થાનિક લોકોની મદદથી તાત્કાલિક ટ્રોમા સેન્ટરમાં દાખલ કરવામાં આવ્યા છે, જ્યાં તેમની હાલત અત્યંત નાજુક હોવાનું જાણવા મળ્યું છે.

ઘટનાની જાણ થતા જ ઉચ્ચ પોલીસ અધિકારીઓનો કાફલો ઘટનાસ્થળે દોડી ગયો હતો અને સમગ્ર વિસ્તારમાં પોલીસ છાવણીમાં ફેરવી દેવાયો હતો. પોલીસે આસપાસના સીસીટીવી ફૂટેજ તપાસતા જાણવા મળ્યું હતું કે, મહેંદીગંજના જ રહેવાસી વૈભવ બાજપાઈએ આ હુમલો કર્યો હતો. પ્રાથમિક તપાસ મુજબ, હુમલાખોર અને ભોગ બનનાર નેતા વચ્ચે લાંબા સમયથી જૂની અદાવત ચાલી રહી હતી, જેનો બદલો લેવા માટે વૈભવે આ ખતરનાક પગલું ભર્યું હોવાનું સામે આવ્યું છે.

પોલીસે ગણતરીની કલાકોમાં જ આરોપી વૈભવ બાજપાઈની અટકાયત કરી છે અને તેની કડક પૂછપરછ હાથ ધરી છે. અધિકારીઓના જણાવ્યા અનુસાર, હુમલામાં વપરાયેલા હથિયાર કબજે કરવા અને આ ગુનામાં અન્ય કોઈની સંડોવણી છે કે કેમ તે અંગે ઊંડી તપાસ ચાલી રહી છે. હાલમાં વિસ્તારમાં શાંતિ જળવાઈ રહે તે માટે લોખંડી પોલીસ બંદોબસ્ત ગોઠવી દેવામાં આવ્યો છે અને હોસ્પિટલ પ્રશાસન ઈજાગ્રસ્ત નેતાના જીવ બચાવવા માટે સતત પ્રયત્નો કરી રહ્યું છે.