બેંગલુરુ : શનિવારની સાંજ બેંગલુરુના એમ. ચિન્નાસ્વામી સ્ટેડિયમમાં ક્રિકેટના રોમાંચથી ભરેલી હતી, પરંતુ રોયલ ચેલેન્જર્સ બેંગલુરુ (RCB) ના ચાહકો માટે આ સાંજ નિરાશાજનક સાબિત થઈ. દિલ્હી કેપિટલ્સ (DC) સામેની આ મહત્વની મેચમાં કર્ણાટકના નાયબ મુખ્યમંત્રી ડીકે શિવકુમાર પણ સ્ટેડિયમમાં હાજર રહ્યા હતા. જોકે, ટીમની હાર બાદ સોશિયલ મીડિયા પર શિવકુમારને એવી રીતે ટ્રોલ કરવામાં આવ્યા કે તેમણે કદાચ સપનામાં પણ વિચાર્યું નહીં હોય. લોકોએ RCBની હાર માટે તેમને ‘અશુભ’ ગણાવીને તેમનો ઉધડો લીધો હતો.
ગર્જનાભર્યા RCBના નારા અને VIP સ્ટેન્ડ
ડીકે શિવકુમારે પૂર્વ ફાસ્ટ બોલર વેંકટેશ પ્રસાદ સાથે મેચનો આનંદ માણતા ફોટા સોશિયલ મીડિયા પર શેર કર્યા હતા. તેમણે લખ્યું હતું કે, “ચિન્નાસ્વામી સ્ટેડિયમમાં એક રોમાંચક સાંજ. ઉર્જા, જુસ્સો અને ગર્જનાભર્યા RCBના નારા - બેંગલુરુ ખરેખર જીવંત બને છે.” જોકે, તેમની આ પોસ્ટ જ તેમની ટીકાનું કારણ બની ગઈ. ચાહકોએ તેમની ખુશીને હાર સાથે જોડી દીધી અને એક યુઝરે તો લખી દીધું કે, “હવે અમને ખબર પડી કે RCB મેચ ક્યાં હારી ગઈ!”
ટ્રાફિક અને ખાડાઓ પર પ્રહાર
બેંગલુરુના રહેવાસીઓએ નેતાજીને તેમની ફરજો યાદ અપાવવામાં જરાય કચાસ રાખી નહોતી. એક યુઝરે ટોણો મારતા કહ્યું કે, “VIP ટિકિટ સાથે ક્રિકેટ જોવું એ ફૂટપાથ અને ટ્રાફિક જામની સમસ્યાઓ કરતાં વધુ મહત્વનું છે, કારણ કે તમે ખાડાઓમાં ક્રિકેટ રમી શકતા નથી.” અન્ય એક નારાજ યુઝરે લખ્યું કે, “સાહેબ, સ્ટેડિયમથી પાછા ફરતી વખતે આઉટર રિંગ રોડ પર જજો, એટલે તમને બેંગલુરુના વિકાસની અસલી ઉર્જાનો અહેસાસ થશે.”
મફત ટિકિટનો ગરમાયેલો મુદ્દો
ઉલ્લેખનીય છે કે, IPL 2026 ની આ સિઝનમાં કર્ણાટક સરકાર દ્વારા ધારાસભ્યો અને નેતાઓ માટે મફત ટિકિટોનો ક્વોટા વધારવામાં આવ્યો છે, જેની પહેલાથી જ ટીકા થઈ રહી હતી. સામાન્ય જનતા મોંઘી ટિકિટો ખરીદવા માટે લાઈનમાં ઉભી હોય અને નેતાઓ મફત ટિકિટ પર લક્ઝરી ટ્રીટમેન્ટ મેળવતા હોય તે વાત નેટીઝન્સને ખટકી રહી છે. એક યુઝરે તો ત્યાં સુધી કહ્યું કે, “અમે સામાન્ય લોકો મરવા માટે તૈયાર છીએ અને તમે રાજાની જેમ બેઠા છો, ભગવાન લોકશાહીને આશીર્વાદ આપે!”
આમ, ડીકે શિવકુમાર માટે ક્રિકેટનો આનંદ ભારે પડી ગયો છે. મેદાનમાં દિલ્હી કેપિટલ્સ સામે RCB હાર્યું, પણ સોશિયલ મીડિયાના મેદાનમાં શિવકુમાર નેટીઝન્સ સામે હારી ગયા હોય તેવું જણાય છે.