લખનૌ : ઉત્તર પ્રદેશની યોગી આદિત્યનાથ સરકારે પૂર્વાંચલ પ્રદેશના સંસાધનો અને વ્યાપારી ક્ષમતાઓને રોજગારી તથા નિકાસની તકોમાં રૂપાંતરિત કરવા માટે એક મહત્વાકાંક્ષી યોજના તૈયાર કરી છે. સરકાર વિશ્વ બેંકના સહયોગથી ₹૨,૫૦૦ કરોડના ખર્ચે પાંચ વર્ષીય 'Enabling District-Led Economic Growth' (UP-EDGE) પ્રોજેક્ટ શરૂ કરવા જઈ રહી છે.  મુખ્યમંત્રી યોગી આદિત્યનાથે વિશ્વ બેંકના અધિકારીઓ સાથે આ પ્રોજેક્ટના વિવિધ પાસાઓ અંગે વિગતવાર ચર્ચા કરી હતી અને હવે તેનો પ્રારંભિક પ્રોજેક્ટ રિપોર્ટ (PPR) મંજૂરી માટે કેન્દ્ર સરકારને સુપ્રત કરવામાં આવશે.

આ વિશેષ યોજના પૂર્વાંચલના ૨૮ જિલ્લાઓ માટે તૈયાર કરવામાં આવી છે, જેમાં ભવિષ્યમાં બુંદેલખંડના ૭ જિલ્લાઓનો પણ સમાવેશ થઈ શકે છે. ઉલ્લેખનીય છે કે પૂર્વાંચલમાં રાજ્યની કુલ વસ્તીના આશરે ૪૦ ટકા લોકો વસે છે, પરંતુ રાજ્યના જીડીપીમાં આ પ્રદેશનો ફાળો ૨૭.૬ ટકા જેટલો જ છે અને અહીં માથાદીઠ આવક રાજ્યની સરેરાશ કરતાં ૪૫ ટકા ઓછી છે. હાલમાં આ વિસ્તારના લગભગ ૮૦ ટકા કામદારો કૃષિ ક્ષેત્ર પર નિર્ભર હોવાથી, દરેક જિલ્લાની સ્થાનિક જરૂરિયાતો અને ઉપલબ્ધ સંસાધનોના આધારે આર્થિક પ્રવૃત્તિઓને પ્રોત્સાહન આપી કૃષિ સિવાય ઉદ્યોગ અને સેવા ક્ષેત્રની ભાગીદારી વધારવાનો મુખ્ય ઉદ્દેશ્ય છે.

પ્રોજેક્ટ હેઠળ પૂર્વાંચલમાં આશરે ૧ લાખ નવા વ્યવસાયો શરૂ કરવાનો અને મહિલા ઉદ્યોગસાહસિકોની ભાગીદારી વધારવાનો પ્રસ્તાવ મુકાયો છે. સ્થાનિક સ્તરે 'એક જિલ્લો, એક ઉત્પાદન'  યોજના હેઠળના ઉત્પાદનોની ડિઝાઇન અને પેકેજિંગ સુધારીને તેમને સ્થાનિક તેમજ આંતરરાષ્ટ્રીય બજારો સાથે જોડવામાં આવશે. આ ઉપરાંત કૃષિ પ્રક્રિયાને પ્રોત્સાહન આપવા ૧૦,૦૦૦ પોલીહાઉસ બનાવવાનું આયોજન છે. વારાણસી, ગોરખપુર અને પ્રયાગરાજ જેવા પ્રમુખ શહેરોમાં કૌશલ્ય વિકાસ, પ્રવાસન, ઈ-કોમર્સ, ડેટા સેન્ટર્સ, શિક્ષણ અને મેડિસિટી સહિત હેલ્થ ટૂરિઝમ ક્ષેત્રે નવી તકો ઉભી કરીને યુવાનો માટે વ્યાપક રોજગારીનું સર્જન કરવામાં આવશે.