મુંબઈ, તા.૦૭: દેશની આર્થિક રાજધાની મુંબઈમાં ભાડે ઘર શોધવું એ લોઢાના ચણા ચાવવા જેવું કામ છે, પરંતુ ક્યારેક-ક્યારેક અહીં એવા કિસ્સાઓ બને છે જે સાંભળીને હસવું કે રડવું એ જ સમજાતું નથી. હાલમાં સોશિયલ મીડિયા પર મુંબઈના ભાડા બજારનો એક અત્યંત વિચિત્ર અને અંધશ્રદ્ધાથી ભરેલો કિસ્સો ભારે ચર્ચાનો વિષય બન્યો છે. સોશિયલ મીડિયા ઇન્ફ્લુએન્સર અને આર્ટિસ્ટ વાગ્મિતા સિંહે એક વીડિયો શેર કરીને દાવો કર્યો છે કે તેની એક ભણેલી-ગણેલી અને પ્રોફેશનલ મિત્રને માત્ર તેના 'અંકશાસ્ત્ર' (Numerology Number) ના કારણે એક મકાનમાલિકે ફ્લેટ આપવાનો ઇનકાર કરી દીધો હતો!
"ભાઈ, ફોન નંબર નહીં, તમારો લકી નંબર બોલો!"
ઇન્સ્ટાગ્રામ પર વાયરલ થયેલા વીડિયોમાં વાગ્મિતાએ આખી આપવીતી સંભળાવતા કહ્યું કે, તેની મિત્ર મુંબઈમાં એક ફ્લેટ જોવા માટે એક મહિલા મકાનમાલિકને મળી હતી. મકાનમાલિક કાકી ખૂબ જ ભણેલા-ગણેલા અને હાઈ-પ્રોફાઈલ દેખાતા હતા, પરંતુ મીટિંગ શરૂ થતાં જ તેમણે પહેલો પ્રશ્ન પૂછ્યો, "તમારો નંબર શું છે?" યુવતીએ વિચાર્યું કે કાકી કદાચ તેનો મોબાઈલ નંબર માંગી રહ્યા છે, તેથી તેણે ફોન નંબર આપવા માંડ્યો. પરંતુ કાકીએ અધવચ્ચે જ ટોકતા કહ્યું, "અરે ના ભાઈ, હું તમારો ન્યુમરોલોજી (અંકશાસ્ત્ર) નંબર પૂછું છું, જે તમારી જન્મતારીખ પરથી નક્કી થાય છે!"
૪ અને ૭ ના આંકડામાં અટવાયો ફ્લેટ
જ્યારે યુવતીએ પોતાની જન્મતારીખ ગણીને જણાવ્યું કે તેનો ન્યુમરોલોજી નંબર '૭' થાય છે, ત્યારે કાકીના ચહેરાના હાવભાવ બદલાઈ ગયા. કાકીએ ગંભીર થઈને હિસાબ લગાવ્યો કે તેમના ઘરનો નંબર '૪' સાથે જોડાયેલો છે અને અંકશાસ્ત્ર મુજબ ૪ અને ૭ નું કોમ્બિનેશન બિલકુલ અશુભ અને પ્રતિકૂળ માનવામાં આવે છે. બસ, આટલી વાત પર કાકીએ આગળ વાત વધારવાની જ ના પાડી દીધી અને ભાડા કરાર કરવાનો પ્રસ્તાવ ફગાવી દીધો. આ આખી ઘટના પર ગુસ્સો અને આશ્ચર્ય વ્યક્ત કરતા વાગ્મિતાએ વીડિયોમાં રમૂજી અંદાજમાં કહ્યું, "માનસિક બીમારી કો મેં ક્યા નામ દૂં?"
સોશિયલ મીડિયા પર 'રાહુ-કેતુ' ના મીમ્સની રમઝટ
આ વીડિયો સોશિયલ મીડિયા પર આવતાની સાથે જ વાયરલ થઈ ગયો છે અને યુઝર્સ મુંબઈના મકાનમાલિકોની મજાક ઉડાવી રહ્યા છે. અંકશાસ્ત્રના શોખીનો પણ આમાં કૂદી પડ્યા છે. એક યુઝરે રમુજી કમેન્ટ કરતા લખ્યું, “અરે, આ તો રાહુ-કેતુનું સુપરહિટ કોમ્બિનેશન હતું. કાકીએ એક બેસ્ટ ભાડૂઆત ગુમાવી દીધી!” તો વળી બીજા એક યુઝરે મુંબઈના ભાડા માર્કેટ પર કટાક્ષ કરતા લખ્યું, “આ શહેરમાં તો ટેરોટ કાર્ડ જોઈને ઘરના માલિકો નક્કી થાય છે!” હાલમાં આ ન્યુમરોલોજી આધારિત રિજેક્શન સમગ્ર ઇન્ટરનેટ પર ભારે આકર્ષણનું કેન્દ્ર બન્યું છે.