મુંબઈ: ભારતીય પ્લેબેક સિંગિંગના જીવંત દંતકથા સમાન આશા ભોંસલેને શનિવારે હૃદયરોગનો હુમલો (કાર્ડિયાક એરેસ્ટ) આવતા તેમને તાત્કાલિક મુંબઈની બ્રીચ કેન્ડી હોસ્પિટલમાં ખસેડવામાં આવ્યા છે. 92 વર્ષીય ગાયિકાને કાર્ડિયાક એરેસ્ટ બાદ હાલમાં હોસ્પિટલના ઇમરજન્સી મેડિકલ સર્વિસીસ (ICU) વિભાગમાં દાખલ કરવામાં આવ્યા છે, જ્યાં ડોક્ટરોની ટીમ તેમની સ્થિતિ પર સતત નજર રાખી રહી છે.
હોસ્પિટલ અને ડોક્ટરોની સત્તાવાર માહિતી
બ્રીચ કેન્ડી હોસ્પિટલના જાણીતા ડોક્ટર પ્રતીત સમદાનીએ પુષ્ટિ કરી છે કે, "આશા ભોંસલેને શનિવાર, 11 એપ્રિલના રોજ કાર્ડિયાક એરેસ્ટ થયો હતો અને તેમને દાખલ કરવામાં આવ્યા છે. હાલમાં તેઓ સઘન સારવાર હેઠળ છે." જોકે, પરિવાર તરફથી હજુ સુધી કોઈ સત્તાવાર નિવેદન બહાર પાડવામાં આવ્યું નથી, પરંતુ હોસ્પિટલ બહાર ચાહકો અને મીડિયાનો જમાવડો જોવા મળી રહ્યો છે.
સૂર અને સ્વાદની અનોખી સફર
આશા ભોંસલે માત્ર એક ગાયિકા નથી, પણ એક એવી પ્રતિભા છે જેણે 20થી વધુ ભાષાઓમાં 12,000થી વધુ ગીતો ગાઈને ગિનીસ બુક ઓફ વર્લ્ડ રેકોર્ડમાં સ્થાન મેળવ્યું છે. 1943માં મરાઠી ફિલ્મ 'માઝા બાલ'થી શરૂ થયેલી તેમની સફર આજે પણ અવિરત છે. સંગીત ઉપરાંત આશાતાઈ તેમના રાંધણ કૌશલ્ય માટે પણ જાણીતા છે, અને દુબઈ-કુવૈતમાં તેમના નામની રેસ્ટોરન્ટ્સ પણ ચાલે છે.
પુરસ્કારોની હારમાળા
તેમના અસાધારણ પ્રદાન બદલ ભારત સરકાર દ્વારા તેમને 2000માં 'દાદાસાહેબ ફાળકે એવોર્ડ' અને 2008માં દેશના બીજા સર્વોચ્ચ નાગરિક સન્માન 'પદ્મ વિભૂષણ'થી નવાજવામાં આવ્યા છે. આરડી બર્મનથી લઈને એઆર રહેમાન સુધીના સંગીતકારો સાથે કામ કરનાર આશાતાઈ ભારતીય સંગીતનો એવો સૂર છે જે પેઢીઓ સુધી ગુંજતો રહેશે.
સંગીત પ્રેમીઓ અને ફિલ્મ જગતના કલાકારો હાલ સોશિયલ મીડિયાના માધ્યમથી આશાતાઈ ઝડપથી સ્વસ્થ થઈને ઘરે પરત ફરે તેવી પ્રાર્થના કરી રહ્યા છે. 'ચુનારિયા', 'તીસરી મંઝિલ' અને 'ઉમરાવ જાન' જેવી ફિલ્મોમાં યાદગાર ગીતો આપનાર આશા ભોંસલેના સ્વાસ્થ્ય અંગેના પળેપળના અપડેટ્સ માટે સૌની નજર હોસ્પિટલના મેડિકલ બુલેટિન પર ટકી છે.