નવી દિલ્હી : આજના ઝડપી અને આધુનિક યુગમાં કામકાજ, નોકરી કે અભ્યાસના અર્થે એક શહેરમાંથી બીજા શહેરમાં સ્થળાંતર કરવું સામાન્ય બાબત બની ગઈ છે, ત્યારે ઘર બદલવાની સાથે વીજળી, પાણી અને ગેસ જેવી મહત્વપૂર્ણ સુવિધાઓને નવા સરનામે તબદીલ કરવી એ દરેક પરિવાર માટે સૌથી મોટી ચિંતાનો વિષય રહે છે.

પ્રાપ્ત વિગતો અનુસાર, આ તમામ આવશ્યક ચીજોમાં સૌથી મોટો પ્રશ્ન એલપીજી (LPG) ગેસ કનેક્શનને લઈને થતો હોય છે કે જૂનું કનેક્શન છોડ્યા બાદ નવા શહેરમાં ગેસ કનેક્શન કેવી રીતે મેળવવું, પરંતુ હવે ગ્રાહકો આ પ્રક્રિયા ખૂબ જ સરળતાથી પૂર્ણ કરી શકે છે.

આ પ્રક્રિયાને અનુસરવા માટે ગ્રાહકો પાસે ઓળખનો પુરાવો (આધાર કાર્ડ, પાસપોર્ટ કે ડ્રાઇવિંગ લાઇસન્સ), નવા સરનામાનો પુરાવો, ગેસ પાસબુક, મૂળ સબ્સ્ક્રિપ્શન વાઉચર (SV) અને બેંક પાસબુક જેવા જરૂરી દસ્તાવેજો હોવા અનિવાર્ય છે.

સૌપ્રથમ તમારે તમારી જૂની ગેસ એજન્સીનો સંપર્ક કરીને સિલિન્ડર અને રેગ્યુલેટર જમા કરાવવાના રહે છે, ત્યારબાદ એજન્સી દ્વારા તમામ દસ્તાવેજોની ચકાસણી કરીને ટર્મિનેશન વાઉચર (TV) આપવામાં આવે છે અને તમારી સિક્યોરિટી ડિપોઝિટ પણ પરત કરવામાં આવે છે.

નવા શહેરમાં પહોંચ્યા બાદ તમારા નવા સરનામાની નજીક આવેલી સંબંધિત કંપનીની ગેસ એજન્સીનો સંપર્ક કરીને આ ટર્મિનેશન વાઉચર અને નવું સરનામું દર્શાવતા દસ્તાવેજો રજૂ કરવાથી એજન્સી દ્વારા નવું સિલિન્ડર અને રેગ્યુલેટર ફાળવવામાં આવે છે.

આ સરળ પ્રક્રિયા દરમિયાન ખાસ ધ્યાનમાં રાખવું કે જ્યાં સુધી નવા શહેરમાં નવું કનેક્શન ન મળી જાય ત્યાં સુધી ટર્મિનેશન વાઉચર અને અન્ય અગત્યના કાગળો સુરક્ષિત રાખવા, જેથી સ્થળાંતર કરતી વખતે કોઈપણ પ્રકારની મુશ્કેલીનો સામનો ન કરવો પડે.