નવી દિલ્હી : ભારતીય સંસ્કૃતિની અમૂલ્ય ધરોહર સમાન 'યોગ' હવે વૈશ્વિક રમતગમતના નકશા પર એક નવી ઊંચાઈ સર કરવા જઈ રહ્યો છે. યુવા બાબતો અને રમતગમત મંત્રી મનસુખ માંડવિયાએ આજે નવી દિલ્હીમાં એક પત્રકાર પરિષદને સંબોધતા સ્પષ્ટ કર્યું છે કે ભારતનું લક્ષ્ય હવે યોગાસનને ઓલિમ્પિક રમતોના રોસ્ટરમાં સામેલ કરવાનું છે. ખાસ કરીને ભારત જ્યારે ૨૦૩૬ના ઓલિમ્પિક રમતોના યજમાન બનવા માટે દાવેદારી કરી રહ્યું છે, ત્યારે યોગાસનને આંતરરાષ્ટ્રીય સ્તરે એક મુખ્ય રમત તરીકે સ્થાપિત કરવા માટે સરકારે કમર કસી છે.
અમદાવાદ બનશે વૈશ્વિક મંચ
આ દિશામાં પ્રથમ મહત્વપૂર્ણ પગલા તરીકે, આગામી મહિને જૂન માસની ૪ થી ૮ તારીખ દરમિયાન અમદાવાદમાં 'પ્રથમ વિશ્વ યોગાસન ચેમ્પિયનશિપ ૨૦૨૬'નું ભવ્ય આયોજન કરવામાં આવશે. મંત્રી માંડવિયાએ આ કાર્યક્રમની વિગતો આપતા જણાવ્યું હતું કે, આ સ્પર્ધા માત્ર એક રમત નથી, પરંતુ ભારતીય 'સોફ્ટ પાવર'નું પ્રદર્શન છે. આ ચેમ્પિયનશિપ માટે અત્યાર સુધીમાં વિશ્વના ૭૫ દેશોએ નોંધણી કરાવી લીધી છે અને ૫૦૦થી વધુ ખેલાડીઓ પોતાની શારીરિક ક્ષમતા, શિસ્ત અને માનસિક સંતુલનનું પ્રદર્શન કરવા માટે ભારત આવી રહ્યા છે.
રોજગારીની નવી તકો
મંત્રીએ ભારપૂર્વક જણાવ્યું હતું કે યોગાસન હવે માત્ર શારીરિક તંદુરસ્તીનું માધ્યમ નથી, પરંતુ તે આજીવિકાનું એક મોટું સાધન પણ બની રહ્યું છે. વિશ્વભરમાં વધી રહેલી યોગની માંગને કારણે યોગ પ્રશિક્ષકો અને સુખાકારી (Wellness) વ્યાવસાયિકો માટે રોજગારની વિશાળ તકો ઉભી થઈ છે. હજારો વર્ષો પહેલા ભારતમાં જન્મેલો આ યોગ આજે વિશ્વના ખૂણે-ખૂણે લોકોના જીવનશૈલીનો હિસ્સો બની ગયો છે, અને હવે તેને વૈશ્વિક રમતગમતની શિસ્ત તરીકે સ્થાન અપાવવાની જવાબદારી ભારતની છે.
માસ્કોટ અને જર્સીનું લોન્ચિંગ
આ પ્રેસ કોન્ફરન્સ દરમિયાન મંત્રીએ ‘પ્રથમ વિશ્વ યોગાસન ચેમ્પિયનશિપ ૨૦૨૬’ માટે સત્તાવાર માસ્કોટ, ખેલાડીઓની જર્સી અને ખાસ ચેમ્પિયનશિપ ફિલ્મનું લોન્ચિંગ કર્યું હતું. આ માધ્યમથી સરકારનો હેતુ યોગાસનને ઘર-ઘરમાં પહોંચાડવાનો અને આવનારી પેઢીને આ પરંપરાગત કળા પ્રત્યે આકર્ષિત કરવાનો છે.
ભારતના આ મિશનને કારણે ઓલિમ્પિકમાં યોગના સમાવેશની આશા પ્રબળ બની છે. શું આવનારા દાયકાઓમાં ઓલિમ્પિકના મેદાન પર ખેલાડીઓ યોગાસન કરતા જોવા મળશે? આ સવાલ હવે વૈશ્વિક રમતગમત જગતમાં ચર્ચાનો વિષય બન્યો છે.