મુંબઈ : મહારાષ્ટ્રના થાણે શહેર સ્થિત નયનરમ્ય ઉપવન તળાવ ખાતે રવિવારની સવારે એક અનોખો અને આધ્યાત્મિક મહાકુંભ સર્જાયો હતો. 'ઓલ ઈન્ડિયા સ્પિરિચ્યુઅલ કમિટી' (ABAS) દ્વારા આયોજિત "વિશ્વ શાંતિ યાત્રા ૨૦૨૬" માં વિવિધ ક્ષેત્રના ૩૫૦થી વધુ નાગરિકોએ ઉત્સાહભેર ભાગ લીધો હતો. પ્રેમાવતાર મૈત્રેય દાદાશ્રીજીની પાવન શિક્ષાઓ અને વિચારોથી પ્રેરિત આ વિશેષ પહેલમાં ૨૦ મિનિટની મૌન શાંતિ કૂચ તથા સામૂહિક પ્રાર્થના દ્વારા "હું શાંતિ છું – મારામાં શાંતિ, સૌમાં શાંતિ" (I Am Peace – Peace Within Me, Peace Within Many) નો મંત્ર સમગ્ર વાતાવરણમાં ગૂંજી ઉઠ્યો હતો.

આ પ્રસંગે ABAS ના પ્રતિનિધિઓએ શાંતિ યાત્રાના મૂળ ઉદ્દેશ્ય વિશે પ્રકાશ પાડતાં જણાવ્યું હતું કે, સાચી વૈશ્વિક શાંતિ એ કોઈ બાહ્ય ધ્યેય નથી પરંતુ આંતરિક અનુભૂતિનો વિષય છે. જ્યારે દરેક વ્યક્તિ પોતે આંતરિક શાંતિ, અહિંસા અને કરુણાનો માર્ગ અપનાવે છે, ત્યારે તેની એક હકારાત્મક અસર (Ripple Effect) સર્જાય છે, જે પરિવાર અને સમાજથી લઈને સમગ્ર વિશ્વ સુધી વિસ્તરે છે. આ આયોજન પાછળ માનવજાતમાં સદ્ભાવના અને આંતરિક ચેતના જગાવવાનો મુખર હેતુ રહ્યો છે.

વિવિધ સમુદાયો અને ડોક્ટરો એક મંચ પર: 'વસુધૈવ કુટુંબકમ'ની ભાવના સાકાર થઈ

આ આંતરરાષ્ટ્રીય શાંતિ પહેલમાં સમાજના તમામ વર્ગોનો અભૂતપૂર્વ સહયોગ જોવા મળ્યો હતો. દાઉદી બોહરા મુસ્લિમ સમુદાયના અગ્રણીઓથી લઈને 'ઈન્ડિયન સોસાયટી ઓફ એનેસ્થેસિયોલોજિસ્ટ્સ' (થાણે) અને 'થાણે એકેડેમી ઓફ પીડિયાટ્રિક્સ' ના નામાંકિત તબીબો તેમજ 'માહેર' અને 'આયુષ્માન' જેવી સામાજિક સેવાભાવી એનજીઓ (NGOs) પણ જોડાણી હતી. રાષ્ટ્રીય સ્તરની આ પહેલે "એક ભારત. આપણે ભારત છીએ. એક વિશ્વ, એક પરિવાર" ના બુલંદ નારા સાથે કોમી એકતા, ભાઈચારો અને માનવતાનું ઉત્કૃષ્ટ ઉદાહરણ પૂરું પાડ્યું હતું.