વિશ્વપ્રસિદ્ધ અભિનેતા સેમ નીલ, જેમણે 'જુરાસિક પાર્ક' શ્રેણીમાં ડૉ. એલન ગ્રાન્ટની ભૂમિકા ભજવીને લાખો લોકોના દિલ જીત્યા હતા, તેમનું ઓસ્ટ્રેલિયાના સિડનીમાં 78 વર્ષની વયે અવસાન થયું છે. આ સમાચાર તેના લાખો ચાહકો માટે આઘાત સમાન છે. 

'જુરાસિક પાર્ક'ની સુપરહિટ ફિલ્મ શ્રેણીથી વૈશ્વિક સ્તરે જાણીતા બનેલા ન્યૂઝીલેન્ડના અભિનેતા સેમ નીલનું નિધન થયું છે. તેમના પરિવારના જણાવ્યા અનુસાર, આ સમાચાર અત્યંત આઘાતજનક અને અણધાર્યા છે. સેમ નીલ છેલ્લા ચાર વર્ષથી લ્યુકેમિયા જેવી ગંભીર બીમારી સામે લડી રહ્યા હતા અને એપ્રિલ 2026માં તેઓ આ બીમારીમાંથી સંપૂર્ણ સ્વસ્થ થઈ જશે તેવી આશા હતી.

1947માં ઉત્તરી આયર્લેન્ડના ઓમાગમાં જન્મેલા સેમ નીલ 1954માં તેમના પરિવાર સાથે ન્યૂઝીલેન્ડ સ્થાયી થયા હતા. અભિનય ક્ષેત્રે ઝંપલાવતા પહેલા તેમણે કાયદાનો અભ્યાસ પણ કર્યો હતો.

સિનેમામાં પ્રવેશ: 1977ની ફિલ્મ "સ્લીપિંગ ડોગ્સ" તેમના કારકિર્દીનો પ્રથમ ટર્નિંગ પોઈન્ટ હતો.

વૈશ્વિક ઓળખ: 1993માં સ્ટીવન સ્પીલબર્ગની બ્લોકબસ્ટર ફિલ્મ 'જુરાસિક પાર્ક'માં પેલિયોન્ટોલોજિસ્ટ ડૉ. એલન ગ્રાન્ટની ભૂમિકાએ તેમને ઘર-ઘર સુધી પહોંચાડ્યા હતા.

અન્ય નોંધપાત્ર કામ: તેઓએ 'ધ પિયાનો', 'ધ હન્ટ ફોર રેડ ઓક્ટોબર', 'પીકી બ્લાઇન્ડર્સ' અને 'હન્ટ ફોર ધ વાઈલ્ડરપિપલ' જેવી 150થી વધુ ફિલ્મો અને શ્રેણીઓમાં યાદગાર અભિનય આપ્યો હતો.

સન્માન: કારકિર્દી દરમિયાન તેમને ત્રણ ગોલ્ડન ગ્લોબ અને બે પ્રાઈમટાઈમ એમી નોમિનેશન મળ્યા હતા. 2022માં કલા ક્ષેત્રે તેમના યોગદાન બદલ તેમને નાઈટહૂડથી નવાજવામાં આવ્યા હતા.

અભિનય ઉપરાંત, તેઓ ન્યૂઝીલેન્ડના સેન્ટ્રલ ઓટાગોમાં તેમની 'ટુ પેડોક્સ' વાઈનરી માટે જાણીતા હતા. તેઓ તેમના ફાર્મ પરના પ્રાણીઓના નામ પ્રખ્યાત હસ્તીઓ જેમ કે કાયલી મિનોગ અને લોરા ડર્ન પરથી રાખવા માટે શોખીન હતા. તેમના નિધન પર ન્યૂઝીલેન્ડના વડાપ્રધાન ક્રિસ્ટોફર લક્સન અને ઓસ્ટ્રેલિયાના વડાપ્રધાન એન્થોની અલ્બાનીઝે ઊંડા શોક સાથે શ્રદ્ધાંજલિ અર્પી છે.