તેહરાન : ઈરાનમાં કટ્ટરપંથી શાસન અને તેના કડક સામાજિક નિયમો સામે મહિલાઓ દ્વારા આચરવામાં આવતો વિરોધ હવે વધુ આક્રમક અને સાર્વજનિક રૂપ ધારણ કરી રહ્યો છે. દેશમાં લાગુ કરાયેલા સખત હિજાબ કાયદાને સરેઆમ પડકાર ફેંકતા તાજેતરમાં યોજાયેલી ૧૦ કિલોમીટરની એક જાહેર રેસ દરમિયાન અનેક મહિલાઓએ કોઈપણ પ્રકારનો સ્કારફ કે હિજાબ પહેર્યા વિના ભાગ લીધો હતો. જાહેર રસ્તાઓ પર વિના સંકોચે અને નિર્ભયતાથી દોડી રહેલી આ મહિલાઓના દ્રશ્યો કેમેરામાં કેદ થઈ ગયા હતા, જેના વીડિયો સોશિયલ મીડિયા પર વાયરલ થતાં સમગ્ર વિશ્વમાં ચર્ચાનો નવો તબક્કો શરૂ થયો છે.

​મળતી વિગતો મુજબ, ઈરાની તંત્ર દ્વારા મહિલાઓ માટે જાહેર સ્થળો પર માથું ઢાંકવું અને હિજાબ પહેરવો કાનૂની રીતે ફરજિયાત બનાવવામાં આવ્યો છે. આ કાયદાનું ઉલ્લંઘન કરનાર સામે આકરી કાનૂની કાર્યવાહી તેમજ જેલ સજાની જોગવાઈ છે. આમ છતાં, આ ૧૦ કિલોમીટરની સ્પર્ધામાં ભાગ લેનારી સાહસિક મહિલાઓએ શાસનની કોઈપણ પ્રકારની કાર્યવાહીની પરવા કર્યા વિના ખુલ્લા વાળ સાથે મેરાથોન પૂર્ણ કરી હતી. આ ઘટનાને ઈરાની મહિલાઓના પોતાના શરીર અને સ્વાતંત્ર્ય પરના અધિકારની પુનઃસ્થાપના માટેના એક મહત્વપૂર્ણ પગલા તરીકે જોવામાં આવી રહી છે.

​સામાજિક માધ્યમો પર આ વીડિયો પ્રસારિત થયા બાદ વિશ્વભરમાંથી તીવ્ર પ્રતિક્રિયાઓ જોવા મળી રહી છે. એક તરફ માનવાધિકારવાદીઓ અને મહિલા સંગઠનો આ કદમને મહિલા સશક્તિકરણ અને વ્યક્તિગત સ્વતંત્રતા તરફનું એક ઐતિહાસિક પગલું ગણાવી રહ્યા છે, તો બીજી તરફ ઈરાની શાસન અને રૂઢિચુસ્ત વર્ગ તરફથી આ ઘટના અંગે ભારે રોષ જોવા મળી રહ્યો છે. અગાઉ પણ દેશમાં હિજાબ વિરોધી આંદોલનો દરમિયાન વ્યાપક વિરોધ પ્રદર્શનો થયા હતા, જેમાં મહિલાઓએ પોતાના વાળ કાપીને અને હિજાબ સળગાવીને સખત અસંતોષ વ્યક્ત કર્યો હતો.

​અંતરરાષ્ટ્રીય વિશ્લેષકોના જણાવ્યા અનુસાર, રમતગમત જેવા જાહેર મંચનો ઉપયોગ કરીને ઈરાની મહિલાઓએ જે રીતે કાનૂની નિર્બંધોને પડકાર્યા છે, તે દર્શાવે છે કે ઈરાનનો યુવા વર્ગ અને વિશેષ કરીને મહિલાઓ હવે સખત દબાણ હેઠળ જીવવા તૈયાર નથી. આ વાયરલ વીડિયોએ ઈરાની તંત્ર માટે ફરી એકવાર મોટો રાજકીય અને સામાજિક પડકાર ઊભો કર્યો છે.