મુંબઈ:મુંબઈના વરલી વિસ્તારમાં ભાજપની રેલી દરમિયાન ટ્રાફિક જામમાં ફસાયેલી અને મંત્રી ગિરીશ મહાજન સામે લાલઘૂમ થયેલી મહિલા ટીના ચૌધરીએ આખરે ઘટના પાછળનું અસલી કારણ જાહેર કર્યું છે. પોતાની પુત્રીને લેવા જતી વખતે કલાકો સુધી રસ્તા પર અટવાયેલી ટીનાએ વિડિયો સંદેશમાં જણાવ્યું કે, તે ૨૫ મિનિટ સુધી કારમાં બેસી રહી હતી, પરંતુ સ્થિતિ ન સુધરતા તે નીચે ઉતરી હતી. તેણે આરોપ લગાવ્યો કે સ્થળ પર હાજર અનેક પોલીસ અધિકારીઓને વિનંતી કરવા છતાં કોઈએ ટ્રાફિક હળવો કરવા તસ્દી લીધી નહોતી. અંતે હતાશામાં આવીને તેણે પોલીસનું ધ્યાન ખેંચવા જમીન પર બોટલ ફેંકી હતી અને મંત્રીને ત્યાંથી હટવા માટે રોકડું પરખાવ્યું હતું.
રસપ્રદ વાત એ છે કે, જે મંત્રી સામે તે ઉગ્ર થઈ હતી, તે ગિરીશ મહાજનની જ તેણે પ્રશંસા કરી છે. ટીનાએ જણાવ્યું કે, આખી રેલીમાં મહાજન એકમાત્ર એવા વ્યક્તિ હતા જેમણે તેની વાત સાંભળવાની ધીરજ બતાવી. મંત્રીના હસ્તક્ષેપ બાદ બે બસો ખસેડવામાં આવી, જેના કારણે અટવાયેલા વાહનોને યુ-ટર્ન લેવાની જગ્યા મળી અને ટ્રાફિક જામ ઉકેલાયો. આ ઘટનાના વિડિયો સોશિયલ મીડિયા પર વાયરલ થયા બાદ મહિલા સામે પોલીસ પ્રત્યે અપમાનજનક શબ્દો વાપરવાનો આક્ષેપ થયો હતો, જોકે પોલીસે હજુ સુધી કોઈ સત્તાવાર FIR દાખલ કરી નથી.
આ સમગ્ર વિવાદ મહિલા અનામત બિલના વિરોધ પ્રદર્શન દરમિયાન સર્જાયો હતો. ગિરીશ મહાજન જેવી હાઈ-પ્રોફાઈલ વ્યક્તિની હાજરી હોવા છતાં સામાન્ય નાગરિકને પડતી હાલાકીએ 'વીઆઈપી મૂવમેન્ટ' સામે ફરી એકવાર સવાલો ઉભા કર્યા છે. મંત્રીએ પણ સ્વીકાર્યું હતું કે મહિલા ખૂબ ગુસ્સે હતી અને લોકોને અસુવિધા થઈ હતી, પરંતુ મામલો સમજાવટથી થાળે પડ્યો હતો. આ કિસ્સો સોશિયલ મીડિયા પર નાગરિક અધિકારો અને રાજકીય રેલીઓ વચ્ચેના ઘર્ષણનું પ્રતીક બની ગયો છે, જેમાં એક માતાએ પોતાની સંતાન સુધી પહોંચવા માટે આખા તંત્ર સામે બાથ ભીડી હતી.