કાનપુર:ઉત્તર પ્રદેશના કાનપુર શહેરમાં ગાડી ચલાવતા શીખી રહેલી એક મહિલાની બેદરકારીના કારણે ગમખ્વાર અકસ્માત સર્જાયો હોવાની ચોંકાવનારી ઘટના સામે આવી છે. કાનપુરમાં થાર કાર ચલાવતા શીખતી એક મહિલાએ રસ્તા પરથી પસાર થઈ રહેલા અનેક નિર્દોષ લોકોને અડફેટે લીધા હતા અને કચડી નાખ્યા હતા. આ ભયાનક માર્ગ અકસ્માતમાં ૫૫ વર્ષીય સંતોષ સિંહ ચૌહાણનું ઘટનાસ્થળે જ કરૂણ મોત નીપજ્યું હતું, જ્યારે અન્ય ત્રણ લોકો ગંભીર રીતે ઘાયલ થયા હતા.

ઘટનાની વિગતવાર માહિતી મુજબ, કાર પર 'કિસાન મોરચા' અને 'કૃષ્ણા ગ્રુપ' લખેલું હતું. લર્નિંગ ડ્રાઇવિંગ દરમિયાન મહિલા ચાલકે સ્ટેરિંગ પરથી કાબૂ ગુમાવતા પૂરપાટ ઝડપે દોડતી આ થાર ગાડીએ રાહદારીઓને ફંગોળી દીધા હતા. બેકાબૂ બનેલી આ શક્તિશાળી એસયુવી આડેધડ લોકોને હડફેટે લીધા બાદ નજીક આવેલા એક મકાનની મજબૂત રેલિંગ સાથે ધડાકાભેર અથડાઈને અટકી હતી, જેના કારણે મોટો અનર્થ થતા અટક્યો હતો પરંતુ એક વ્યક્તિનો ભોગ લેવાઈ ગયો હતો.

આ કરૂણ દુર્ઘટના બાદ સ્થાનિક લોકોમાં ભારે રોષ ફેલાઈ ગયો હતો અને ઘટનાસ્થળે લોકોની ભીડ એકત્ર થઈ ગઈ હતી. માહિત મળતા જ સ્થાનિક પોલીસ તાત્કાલિક કાફલા સાથે ઘટનાસ્થળે દોડી આવી હતી અને ઈજાગ્રસ્તોને તાત્કાલિક ધોરણે નજીકની હોસ્પિટલમાં સારવાર અર્થે ખસેડ્યા હતા. પોલીસે અકસ્માત સર્જનાર આ વાહનને પોતાના કબજામાં લઈ લીધું છે અને ગાડી ચલાવી રહેલી મહિલા તથા માલિક વિરુદ્ધ કાયદેસરની કાર્યવાહીની તજવીજ હાથ ધરી છે.

આ અકસ્માતે ખુલ્લી જગ્યાઓ પર કે રેસિડેન્શિયલ વિસ્તારોમાં લર્નિંગ ડ્રાઇવિંગ કરવાના જોખમો સામે ગંભીર સવાલો ખડા કર્યા છે. ભૂતકાળમાં પણ આ પ્રકારની બિનઅધિકૃત તાલીમોને કારણે અનેક જીવ ગયા છે ત્યારે પોલીસે હવે ટ્રાફિક નિયમોના ભંગ બદલ કડક વલણ અપનાવ્યું છે. હાલમાં પોલીસ દ્વારા આસપાસના સીસીટીવી ફૂટેજના આધારે તપાસ આગળ વધારવામાં આવી રહી છે અને જવાબદારી નક્કી કરી કસૂરવાર સામે કાયદાકીય શિસ્તપાલનના પગલાં લેવામાં આવશે.