ચંદીગઢ :  પંજાબ પોલીસની કાઉન્ટર ઇન્ટેલિજન્સ વિંગે દેશની સુરક્ષા સાથે ચેડાં કરતા એક મોટો જાસૂસી પર્દાફાશ કર્યો છે. પાકિસ્તાનની ગુપ્તચર એજન્સી ISI (ઇન્ટર-સર્વિસિસ ઇન્ટેલિજન્સ) ને ભારતીય લશ્કરી છાવણીઓ અને સંવેદનશીલ ઠેકાણાઓ સંબંધિત ગુપ્ત માહિતી પૂરી પાડવાના આરોપસર ફરીદકોટની રહેવાસી ગુર્નૂર સિદ્ધુ નામની મહિલાની ધરપકડ કરવામાં આવી છે. આ ગંભીર જાસૂસી પ્રકરણમાં ભારત-ચીન સરહદ પર તૈનાત ભારતીય સેનાના બે સૈનિકોની સંડોવણી પણ બહાર આવી છે, જેમના વિરુદ્ધ કાનૂની કાર્યવાહી હાથ ધરીને ગુનો નોંધવામાં આવ્યો છે.

સુરક્ષા એજન્સીઓ પાસેથી પ્રાપ્ત સત્તાવાર વિગતો અનુસાર, પંજાબ પોલીસની કાઉન્ટર ઇન્ટેલિજન્સ ટીમે બાતમીના આધારે હુસૈનીવાલા બોર્ડર રોડ પર આવેલ નિર્માણાધીન પુલ પાસેથી ગુર્નૂર સિદ્ધુને આંતરીને અટકાયતમાં લીધી હતી. પ્રાથમિક તપાસમાં ખુલાસો થયો છે કે સરહદ પર તૈનાત બે આર્મી જવાનો સંવેદનશીલ અને ગુપ્ત લશ્કરી વિગતો એકત્રિત કરતા હતા, જેને ગુર્નૂર સિદ્ધુ પોતાના મોબીલ ફોન, ટેબ્લેટ અને ઇન્ટરનેટ માધ્યમો દ્વારા પાકિસ્તાની ISI હેન્ડલર્સ સુધી પહોંચાડતી હતી. આ સંદર્ભે ફાઝિલ્કાના સ્ટેટ સ્પેશિયલ ઓપરેશન સેલ (SSOC) પોલીસ સ્ટેશનમાં ત્રણેય આરોપીઓ વિરુદ્ધ ઑફિશિયલ સિક્રેટ્સ એક્ટ (Official Secrets Act) ની વિવિધ કલમો હેઠળ એફઆઈઆર દાખલ કરવામાં આવી છે.

બીજી તરફ, પંજાબ પોલીસે ક્રોસ-બોર્ડર આતંકવાદી નેટવર્ક સામે પણ કડક કાર્યવાહી કરીને ISI સમર્થિત બે મોડ્યુલનો પર્દાફાશ કર્યો છે, જેમાં ૪ સગીરો સહિત ૯ લોકોની ધરપકડ કરવામાં આવી છે. પકડાયેલા આરોપીઓ પાસેથી ગેરકાયદેસર દેશી બનાવટની પિસ્તોલો, જીવતા કારતૂસ, પેટ્રોલ બોમ્બ અને ચોરાયેલી મોટરસાયકલ જપ્ત કરવામાં આવ્યા છે. તપાસમાં બહાર આવ્યું છે કે વિદેશમાં બેઠેલા ISI આકાઓના નિર્દેશ પર આ આરોપીઓ સ્થાનિક યુવાનોનું બ્રેઇનવોશિંગ કરી આતંકી પ્રવૃત્તિઓમાં ધકેલવાનું કામ કરતા હતા. એટલું જ નહીં, રેલવે ટ્રેક અને સંવેદનશીલ સ્થળો નજીક ગુપ્ત CCTV કેમેરા લગાવીને તેનું લાઇવ ફૂટેજ સરહદ પાર મોકલવાનું ષડયંત્ર ઘડાયું હોવાનું પણ સામે આવ્યું છે. હાલમાં સુરક્ષા એજન્સીઓ દ્વારા આ સમગ્ર જાસૂસી અને આતંકી નેટવર્કના ઊંડાણ સુધી પહોંચવા માટે સઘન પૂછપરછ ચાલુ રાખવામાં આવી છે.