નવી દિલ્‍હી તા.૨: તાજેતરમાં ખાંડ અને દૂધના ભાવમાં વધારો થયો છે, જેના કારણે જનતાને ભારે તકલીફ પડી રહી છે. સરકારે હવે પેટ્રોલ અને ડીઝલ અંગે એક મહત્‍વપૂર્ણ નિર્ણય લીધો છે. સરકારે તાજેતરમાં પેટ્રોલ અને ડીઝલની નિકાસ પર વિન્‍ડફોલ ટેક્‍સમાં વધારો કર્યો છે. આ નિર્ણય ૧ સપ્‍ટેમ્‍બર, ૨૦૨૬ થી અમલમાં આવશે, જ્‍યારે ઘણી ચીજવસ્‍તુઓ પહેલાથી જ ભાવમાં વધઘટનો અનુભવ કરી રહી છે.

અહેવાલ મુજબ, સરકારે પેટ્રોલ નિકાસ પર પ્રતિ લિટર રૂા.૧.૫૦ નો ટેક્‍સ લાદ્યો છે. અગાઉ, પેટ્રોલ નિકાસ પર કોઈ ટેક્‍સ નહોતો. દરમિયાન, ડીઝલ નિકાસ પરના ટેક્‍સમાં પ્રતિ લિટર રૂા.૨૫ નો વધારો કરવામાં આવ્‍યો છે, જેમાં સ્‍પેશિયલ એડિશનલ એક્‍સાઇઝ ડ્‍યુટી (SAED) અને રોડ ઇન્‍ફ્રાસ્‍ટ્રક્‍ચર સેસનો સમાવેશ થાય છે. અગાઉ, આ ટેક્‍સ પ્રતિ લિટર રૂા.૨૪ હતો.

તાજેતરમાં ATFના ભાવમાં વધારો થયો છે, અને સરકારે તેના ટેક્‍સમાં થોડી રાહત આપી છે. સરકારે ATF પરનો નિકાસ ટેક્‍સ રૂા.૧૯.૫૦ થી ઘટાડીને રૂા.૧૯ પ્રતિ લિટર કર્યો છે.નાણા મંત્રાલયે આ ફેરફારોની જાહેરાત કરતી એક સૂચના જારી કરી હતી. જોકે, સ્‍થાનિક વપરાશ માટે વેચાતા પેટ્રોલ અને ડીઝલ પરના હાલના કર દરો યથાવત રહ્યા છે.

લોકો આ કર વધારાના બોજ અંગે પણ ચિતિત છે. જોકે, તેનાથી જનતા પર કોઈ અસર થવાની શક્‍યતા નથી. તેના બદલે, સરકારનો ધ્‍યેય દેશમાં પેટ્રોલિયમ ઉત્‍પાદનોની પૂરતી ઉપલબ્‍ધતા જાળવવાનો છે. જો આંતરરાષ્ટ્રીય સ્‍તરે ક્રૂડ ઓઇલના ભાવ વધે, તો કંપનીઓ વધુ નફા માટે વિદેશમાં ઇંધણ વેચી શકે છે. તેથી, સરકારે નિકાસ ઘટાડવા માટે આ કર લાદ્યો છે.