ચેન્નઈ: તમિલનાડુ વિધાનસભા ચૂંટણી ૨૦૨૬ના પરિણામોમાં સુપરસ્ટાર વિજયની પાર્ટી 'તમિલગા વેત્રી કઝગમ' (TVK) સામે પરાજય થયા બાદ આઉટગોઇંગ મુખ્યમંત્રી એમ.કે. સ્ટાલિને પોતાની પ્રથમ અને મક્કમ પ્રતિક્રિયા આપી છે. ૩૫ વર્ષના રાજકીય ઇતિહાસમાં પ્રથમવાર ચૂંટણી હાર્યા બાદ અને પોતાનો ગઢ ગણાતી કોલાથુર બેઠક ગુમાવ્યા બાદ સ્ટાલિને રાજ્યપાલ રાજેન્દ્ર વિશ્વનાથ આર્લેકરને પોતાનું રાજીનામું સોંપી દીધું છે.
પરાજય સામે સ્ટાલિનનો પડકાર
એમ.કે. સ્ટાલિને સોશિયલ મીડિયા પ્લેટફોર્મ 'X' પર તમિલ ભાષામાં એક ભાવુક પોસ્ટ મૂકી છે. તેમણે લખ્યું, "દ્રવિડ મુન્નેત્ર કઝગમ (DMK) ૬ વખત સત્તામાં રહી ચુકી છે. એવી કોઈ જીત નથી જે અમે જોઈ નથી અને એવી કોઈ હાર નથી જેનો અમે સામનો કર્યો નથી. રાજકીય જાહેર જીવનમાં અને વિચારધારાને ટકાવી રાખવાની મુસાફરીમાં, અમે હંમેશા એ બાબતે સાવધ રહીશું કે અમારી વિચારધારાની હાર ન થવી જોઈએ."
એક્ટર વિજયની પાર્ટી પર પ્રહાર
સ્ટાલિને એક્ટર વિજયની પાર્ટી TVK ની જીત પર કટાક્ષ કરતા જણાવ્યું હતું કે, ભલે તેઓ ૧૦૮ બેઠકો સાથે સૌથી મોટા પક્ષ તરીકે ઉભરી આવ્યા હોય, પરંતુ DMK ગઠબંધન અને તેમની વચ્ચે મતોનો તફાવત બહુ મોટો નથી. તેમણે આંકડા આપતા કહ્યું કે, "અમારા અને તેમની વચ્ચે મતોની ટકાવારીનો તફાવત માત્ર ૩.૫૨ ટકા છે. DMK ગઠબંધનને ૧.૫૪ કરોડ વોટ મળ્યા છે, જે દર્શાવે છે કે જનતાનો વિશ્વાસ હજુ પણ અમારા પર મજબૂત છે."
હવે વિપક્ષની ભૂમિકામાં
સ્ટાલિને વધુમાં ઉમેર્યું કે, "જો અમે શાસક પક્ષ હોઈએ તો લોકો માટે યોજનાઓ બનાવીએ છીએ અને જો અમે વિરોધ પક્ષ હોઈએ તો લોકોની માંગણીઓ માટે લડીએ છીએ. હવે એક મજબૂત વિરોધ પક્ષ તરીકે, અમે લોકો માટે રાજનીતિ ચાલુ રાખીશું અને ફરીથી જીત મેળવીશું." ૭૩ વર્ષીય સ્ટાલિન ૭ વખત ધારાસભ્ય રહી ચુક્યા છે, પરંતુ આ વખતે TVK ના ઉમેદવાર સામે તેમનો પરાજય થયો છે.
તમિલનાડુમાં હવે એક નવા રાજકીય યુગની શરૂઆત થઈ છે, જ્યાં એક્ટર વિજય મુખ્યમંત્રીની ખુરશી તરફ આગળ વધી રહ્યા છે અને અનુભવી સ્ટાલિન વિપક્ષના નેતા તરીકે મેદાનમાં રહેશે.