તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
શું મુસ્લિમોમાં બહુપત્નીત્વ પર પ્રતિબંધ મૂકવામાં આવશે?
સુપ્રીમ કોર્ટે સરકાર પાસેથી જવાબ માંગ્યો : બંધારણ બધાને સમાનતાની ખાતરી આપે છે પરંતુ મુસ્લિમ મહિલાઓને આ અધિકારથી વંચિત રાખવામાં આવે છે. બહુપત્નીત્વ મહિલાઓ અને બાળકોને ભારે માનસિક, ભાવનાત્મક અને નાણાકીય નુકસાન પહોંચાડે છે
નવી દિલ્હી તા.૧: સુપ્રીમ કોર્ટે શુક્રવારે મુસ્લિમોમાં બહુપત્નીત્વ અંગે એક મહત્વપૂર્ણ ટિપ્પણી કરી હતી. કોર્ટે કેન્દ્ર સરકારને નોટિસ જારી કરીને પૂછ્યું છે કે મુસ્લિમોમાં બહુપત્નીત્વની પ્રથા પર સંપૂર્ણપણે પ્રતિબંધ કેમ ન મૂકવો જોઈએ. મુખ્ય ન્યાયાધીશ સૂર્યકાંત અને બે અન્ય ન્યાયાધીશોની બેન્ચે આ નોટિસ જારી કરી હતી. આ અરજી ઝાકિયા સોમન, નૂરજહાં સાફિયા નિયાઝ અને અન્ય ઘણી મહિલાઓ દ્વારા દાખલ કરવામાં આવી હતી. તેમણે જણાવ્યું હતું કે ૧૯૩૭નો મુસ્લિમ પર્સનલ લો બહુપત્નીત્વને માન્યતા આપે છે, જ્યારે તે અન્ય લોકો માટે ગુનો છે. ભારતીય દંડ સંહિતા હેઠળ, બીજા લગ્ન કરવા બદલ અન્ય લોકોને સાત વર્ષ સુધીની જેલની સજા થઈ શકે છે, પરંતુ મુસ્લિમ પુરુષોને આ પ્રથામાંથી મુક્તિ આપવામાં આવી છે.
અરજીમાં જણાવાયું છે કે આ મહિલાઓ સાથે અન્યાયી છે. બંધારણ દરેકને સમાન અધિકારોની ખાતરી આપે છે, પરંતુ મુસ્લિમ મહિલાઓને આ અધિકારથી વંચિત રાખવામાં આવે છે. બહુપત્નીત્વ મહિલાઓ અને બાળકોને ભારે માનસિક, ભાવનાત્મક અને નાણાકીય નુકસાન પહોંચાડે છે. તેમણે જણાવ્યું હતું કે ઇસ્લામમાં બહુપત્નીત્વ ફરજિયાત નથી, પરંતુ ફક્ત એક પરવાનગી છે જે ફક્ત ત્યારે જ આપી શકાય છે જો સંપૂર્ણ ન્યાય હોય. તેથી, ધાર્મિક સ્વતંત્રતાના નામે તેનો બચાવ કરી શકાતો નથી, કારણ કે તે મહિલાઓના અધિકારોનું ઉલ્લંઘન કરે છે.
અરજીમાં એમ પણ કહેવામાં આવ્યું છે કે ટ્યુનિશિયા અને તુર્કી જેવા ઘણા મુસ્લિમ દેશોએ પહેલાથી જ બહુપત્નીત્વ પર પ્રતિબંધ મૂક્યો છે. અરજદારો ઇચ્છે છે કે કોર્ટ આ પ્રથાને ગેરકાયદેસર જાહેર કરે અને બધા ધર્મોના લોકો પર સમાન કાયદા લાગુ કરે. તેમણે એવી પણ માંગ કરી હતી કે ગુપ્ત બીજા લગ્ન અટકાવવા માટે મુસ્લિમ લગ્ન અને છૂટાછેડાની નોંધણી ફરજિયાત કરવામાં આવે. પહેલી પત્ની અને બાળકોને ઘરમાં તાત્કાલિક અધિકારો આપવામાં આવે, ભરણપોષણ ઝડપથી ચૂકવવામાં આવે અને બીજી પત્ની અને તેના બાળકોને પણ સુરક્ષિત રાખવામાં આવે.
અરજીમાં મહિલાઓ માટે કાનૂની સહાય, આશ્રયસ્થાનો, કાઉન્સેલિગ અને નાણાકીય સહાયની પહોંચ વધારવા સહિત અન્ય ઘણી બાબતોની પણ માંગ કરવામાં આવી છે. તેમાં સરકાર અથવા કાયદા પંચને મુસ્લિમ પર્સનલ કાયદામાં સુધારો કરવા, લગ્ન, છૂટાછેડા અને મિલકતના મામલામાં મહિલાઓના સમાન અધિકારો સુનિﾍતિ કરવા માટે પણ કહેવામાં આવ્યું છે. તેઓએ ભારતીય મુસ્લિમ મહિલા આંદોલનનો પણ ઉલ્લેખ કર્યો, જેણે દેશભરમાં ચર્ચાઓ પછી એક બિલ તૈયાર કર્યું. આ અરજીમાં મુસ્લિમ મહિલાઓને અન્ય મહિલાઓની જેમ જ રક્ષણ અને અધિકારો મળે તે સુનિﾍતિ કરવાનો પ્રયાસ કરવામાં આવ્યો છે.
(9:48 AM IST)
છેલ્લા 8 દિવસમાં સૌથી લોકપ્રિય 
