વોશિંગ્ટન : અમેરિકાના પ્રમુખ ડોનાલ્ડ ટ્રમ્પ પોતાના અનોખા અને વિવાદિત નિર્ણયોને કારણે ફરી એકવાર ચર્ચાના કેન્દ્રમાં આવ્યા છે. તાજેતરમાં જ ફેડરલ રેકોર્ડ્સમાં 'લેક ઓન્ટારિયો'નું નામ બદલીને 'લેક અમેરિકા' કર્યા બાદ, હવે ટ્રમ્પે અમેરિકાના જ એક રાજ્ય 'ન્યૂ મેક્સિકો'નું નામ બદલીને "ન્યૂ અમેરિકા" કરવાનું અનોખું સૂચન કર્યું છે. તેમણે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર ન્યૂ મેક્સિકોના નકશામાંથી 'મેક્સિકો' શબ્દ પર લાલ ચેકડો મારીને તેની જગ્યાએ 'અમેરિકા' લખેલી તસવીર પોસ્ટ કરી હતી, જેને બાદમાં વ્હાઇટ હાઉસે પણ શેર કરી હતી.

જોકે, અમેરિકી બંધારણ મુજબ રાષ્ટ્રપતિ પાસે કોઈપણ રાજ્યનું નામ એકપક્ષીય રીતે બદલવાની સીધી સત્તા નથી, કારણ કે આવો નિર્ણય માત્ર સંબંધિત રાજ્યની વિધાનસભા જ લઈ શકે છે. ટ્રમ્પના આ નિવેદન સામે ન્યૂ મેક્સિકોના ગવર્નર મિશેલ લુજાન ગ્રીશમે સખત વાંધો ઉઠાવ્યો છે. તેમણે ટ્રમ્પ પર પ્રહાર કરતા જણાવ્યું હતું કે રાષ્ટ્રપતિ દેશમાં વધી રહેલા પેટ્રોલ-ડીઝલના ભાવ અને ઈરાન સાથેના તણાવ પરથી લોકોનું ધ્યાન ભટકાવવા માટે આવી તસવીરોમાં રંગ પૂરવાનો સમય બગાડી રહ્યા છે, પરંતુ 'ન્યૂ મેક્સિકો'નું નામ ક્યારેય બદલાશે નહીં.

ઉલ્લેખનીય છે કે, ટ્રમ્પ અગાઉ પણ મેક્સિકોના અખાતનું નામ બદલીને 'ગલ્ફ ઓફ અમેરિકા' કરી ચૂક્યા છે. આટલું જ નહીં, તેમણે તાજેતરમાં એટલાન્ટિક અને પેસિફિક મહાસાગર તેમજ સ્ટ્રેટ ઓફ હોર્મુઝનું નામ બદલીને 'ટ્રમ્પ સ્ટ્રેટ' રાખવાના વિચારો પણ વહેતા કર્યા હતા. નામો બદલવાની ટ્રમ્પની આ નીતિ આંતરરાષ્ટ્રીય સ્તરે પણ ચર્ચા અને વિવાદનો મોટો વિષય બની ગઈ છે.

શું તમને પણ લાગે છે કે ઐતિહાસિક અને ભૌગોલિક સ્થળોના નામો બદલવાથી દેશના વાસ્તવિક રાજકીય કે આર્થિક મુદ્દાઓ ઉકેલાઈ શકે છે?