કિવ | તા.૦૩: રશિયા અને યુક્રેન વચ્ચે છેલ્લા લાંબા સમયથી ચાલી રહેલા ભયાનક સંઘર્ષને અટકાવવા માટે ભારત ફરી એકવાર શાંતિદૂતની ભૂમિકા ભજવવા તૈયાર થયું છે. યુક્રેનની મુલાકાતે પહોંચેલા ભારતના વિદેશ મંત્રી એસ. જયશંકરે કિવ ખાતેથી એક અત્યંત મહત્વપૂર્ણ અને વૈશ્વિક સ્તરે ચર્ચાસ્પદ નિવેદન આપ્યું છે. તેમણે સ્પષ્ટ શબ્દોમાં જણાવ્યું છે કે જો જરૂર પડે અને બંને દેશો ઈચ્છે, તો આ વિનાશક યુદ્ધનો અંત લાવવા માટે ભારત કોઈપણ પ્રકારે મધ્યસ્થી કરવા કે મદદરૂપ થવા સંપૂર્ણપણે તૈયાર છે.

યુક્રેનની રાજધાની કિવ ખાતેની આ ખાસ મુલાકાત દરમિયાન વિદેશ મંત્રી એસ. જયશંકરે તેમના યુક્રેનિયન સમકક્ષ એન્ડ્રી ત્સિબિહા સાથે ઉચ્ચ સ્તરીય બેઠક યોજી હતી. આ ઉપરાંત, તેમણે પોલેન્ડના નાયબ વડા પ્રધાન રાડોસ્લાવ સિકોર્સ્કી સાથે પણ દ્વિપક્ષીય વાટાઘાટો કરી હતી. પત્રકારો દ્વારા રશિયા-યુક્રેન યુદ્ધમાં ભારતની મધ્યસ્થી અંગે પૂછાયેલા પ્રશ્નના જવાબમાં તેમણે ભારપૂર્વક કહ્યું કે, "જો ભારત કોઈપણ રીતે આ સ્થિતિ ઉકેલવામાં કે શાંતિ સ્થાપવામાં મદદ કરી શકે છે, તો અમે તેના માટે તત્પર છીએ."

વિદેશ મંત્રીની આ યુક્રેન મુલાકાત એવા સમયે થઈ રહી છે જ્યારે થોડા સમય પહેલાં જ કાળા સમુદ્ર (Black Sea) માં વાણિજ્યિક જહાજો પર થયેલા ડ્રોન અને મિસાઈલ હુમલામાં ભારતીય નાગરિકોએ પણ પોતાના જીવ ગુમાવ્યા હતા. જયશંકરે જણાવ્યું હતું કે કાળા સમુદ્રમાં વાણિજ્યિક જહાજો અને દરિયાઈ સુરક્ષા પર વધી રહેલા આ ખતરા અંગે પણ બંને દેશોના નેતાઓ વચ્ચે ગંભીરતાથી ચર્ચા કરવામાં આવી છે.

વૈશ્વિક રાજનીતિના નિષ્ણાતોના મતે, વડાપ્રધાન નરેન્દ્ર મોદીની વિદેશ નીતિ અને ભારતની તટસ્થ છબીને કારણે ભારત જ એક એવો દેશ છે જે રશિયા અને યુક્રેન બંને સાથે સમાન સંબંધો ધરાવે છે. તેથી જ જયશંકરનું આ નિવેદન વૈશ્વિક સ્તરે યુદ્ધ વિરામ માટેની નવી આશા જગાવી રહ્યું છે.