નવી દિલ્હી, તા. ૦૯: રાજસ્થાનમાં આવેલા ઐતિહાસિક અને પવિત્ર મહાવીર જી જૈન મંદિરના સંચાલન અને મિલકતોના હક અંગે જૈન ધર્મના બે મુખ્ય ફાંટા - શ્વેતાંબર અને દિગંબર સંપ્રદાયો વચ્ચે ચાલી રહેલા લાંબા સમયના કાનૂની વિવાદ પર સુપ્રીમ કોર્ટે બુધવારે સુનાવણી પૂર્ણ કરીને પોતાનો આદેશ અનામત રાખ્યો છે. સુનાવણી દરમિયાન અદાલતે બેઉ પક્ષો વચ્ચે ચાલતા અહંકાર અને મિલકતના ઝઘડા પર અત્યંત માર્મિક ટિપ્પણી કરી હતી.

‘ન્યાયાધીશ પારડીવાલાની માર્મિક ટિપ્પણી - શું સંત ખુશ થશે?’

વરિષ્ઠ વકીલો આર્યમા સુંદરમ અને શ્યામ દિવાનની દલીલો સાંભળ્યા બાદ જસ્ટિસ જે.બી. પારડીવાલા અને જસ્ટિસ કે. વિનોદ ચંદ્રનની બેન્ચે તમામ પક્ષકારોને આગામી ૮ દિવસમાં પોતપોતાની લેખિત રજૂઆતો સબમિટ કરવાનો નિર્દેશ આપ્યો હતો. સુનાવણી દરમિયાન જસ્ટિસ પારડીવાલાએ ભાવુક થઈને બંને પક્ષોને સવાલ પૂછ્યો હતો કે, "શું તમને ખરેખર લાગે છે કે તમારા આ બધા કાર્યો અને કોર્ટ-કચેરીના લડાઈ-ઝઘડાથી ભગવાન કે પૂજ્ય જૈન સંત ખુશ થઈ રહ્યા હશે?" તેમણે પક્ષકારોને આંતરખોજ કરવા અને ધાર્મિક મર્યાદાઓ જાળવીને શાંતિપૂર્ણ રસ્તો કાઢવા અપીલ કરી હતી.

શું છે સમગ્ર મંદિર વ્યવસ્થાપનનો વિવાદ?

આ સમગ્ર વિવાદ શ્રી મહાવીર જી જૈન મંદિરના મેનેજમેન્ટ, સંચાલન હક્કો અને તેની અબજો રૂપિયાની મિલકતો પર વર્ચસ્વ જમાવવા અંગેનો છે. સુનાવણી દરમિયાન પ્રતિવાદી પક્ષે દલીલ કરી હતી કે પૂજાના સ્થળની મૂળ સ્થિતિમાં કોઈ બદલાવ કરવામાં આવ્યો નથી, તેથી 'પૂજાના સ્થળો (વિશેષ જોગવાઈઓ) અધિનિયમ, ૧૯૯૧' આ કેસમાં લાગુ પડતો નથી. જ્યારે સામે પક્ષે અરજદારે દલીલ કરી હતી કે કાયદાકીય કલમો હેઠળ આ કાર્યવાહી ક્યારનીય બંધ થઈ ચૂકી છે.

ટ્રાયલ કોર્ટથી લઈને સુપ્રીમ કોર્ટ સુધી પહોંચેલો મામલો:

આ મામલો મંદિર સંચાલનમાં ફેરફારની માંગ સાથે શરૂ થયો હતો. ૧૯૯૧ના કાયદા હેઠળની અરજી બાદ ૧૯૯૪માં ટ્રાયલ કોર્ટે આ કાર્યવાહી બંધ કરવાનો આદેશ આપ્યો હતો. જોકે, ત્યારબાદ રાજસ્થાન હાઈકોર્ટે આ આદેશ સામેની અપીલને ગ્રાહ્ય રાખતા, દિગંબર સમિતિએ હાઈકોર્ટના ચુકાદાને સુપ્રીમ કોર્ટમાં પડકાર્યો હતો. હવે સુપ્રીમ કોર્ટના અનામત રાખવામાં આવેલા નિર્ણય પર સમગ્ર જૈન સમાજની નજર ટકેલી છે.