ઝુરિચ, તા. 16: વિશ્વના સૌથી સુંદર દેશોમાંના એક એવા સ્વિટ્ઝર્લૅન્ડમાં મિલકત વસાવવાનું સપનું જોતા વિદેશીઓ માટે મોટા માઠા સમાચાર છે. સ્વિસ સરકારે વધતી જતી વસ્તી અને મકાનોની અછતને પહોંચી વળવા માટે વિદેશીઓ દ્વારા રિયલ એસ્ટેટની ખરીદી પર મોટા પાયે કાપ મૂકવાની યોજના બનાવી છે. ફેડરલ કાઉન્સિલે સ્પષ્ટ સંકેત આપ્યા છે કે તેઓ વિદેશી માલિકીને મર્યાદિત કરતા પ્રખ્યાત "લેક્સ કોલર" કાયદામાં મોટા સુધારા કરવા જઈ રહ્યા છે.
બિન-યુરોપિયન નાગરિકો પર ‘કડક નજર’
નવી દરખાસ્ત મુજબ, જે વ્યક્તિ યુરોપિયન યુનિયન (EU) અથવા યુરોપિયન ફ્રી ટ્રેડ એસોસિએશન (EFTA) ના સભ્ય દેશની નથી (જેમાં ભારતનો પણ સમાવેશ થાય છે), તેમણે સ્વિટ્ઝર્લૅન્ડમાં મુખ્ય રહેઠાણ ખરીદવા માટે હવે સ્પેશિયલ પરમિટ લેવી પડશે. એટલું જ નહીં, જો આ નાગરિકો સ્વિટ્ઝર્લૅન્ડ છોડીને જાય છે, તો તેમણે બે વર્ષની અંદર જ પોતાનું ઘર વેચી દેવું પડશે. આ નિયમ રોકાણકારો માટે મોટો ઝટકો સાબિત થઈ શકે છે.
રોકાણ અને કમર્શિયલ પ્રોપર્ટી પર પ્રતિબંધ
સરકાર માત્ર રહેણાંક ઘરો જ નહીં, પરંતુ વાણિજ્યિક મિલકતો (Commercial Real Estate) પર પણ લગામ કસવાની તૈયારીમાં છે. નવા નિયમો હેઠળ, આવા વિદેશી નાગરિકો માત્ર ભાડું કમાવવાના હેતુથી કે રોકાણ માટે કોમર્શિયલ પ્રોપર્ટી ખરીદી શકશે નહીં. ઉપરાંત, વેકેશન હોમ્સ એટલે કે રજા ગાળવા માટેના ઘરો માટેનો ક્વોટા પણ ઘટાડવામાં આવશે અને તેના પુનર્વેચાણના નિયમો વધુ કઠોર બનાવવામાં આવશે.
કેમ લેવાયો આ નિર્ણય?
સ્વિટ્ઝર્લૅન્ડમાં ઉચ્ચ જીવનધોરણ અને રોજગારીની તકોને કારણે ઇમિગ્રેશન સતત વધી રહ્યું છે. જેના કારણે સ્થાનિક માળખાકીય સુવિધાઓ પર દબાણ વધ્યું છે અને રહેવાસીઓ માટે ઘરોની અછત સર્જાઈ છે. આગામી જૂન મહિનામાં એક મહત્વનો લોકમત (Referendum) પણ યોજાનાર છે, જેમાં 2050 સુધીમાં દેશની વસ્તી 10 મિલિયન (1 કરોડ) થી વધુ ન વધવા દેવા અંગે મતદાન થશે.
સરકાર આ કાયદાકીય ફેરફારો દ્વારા વસ્તી પર નિયંત્રણ મેળવવા અને સ્થાનિક લોકો માટે મકાનોની ઉપલબ્ધતા સુનિશ્ચિત કરવા માંગે છે. આ દરખાસ્તો પર જુલાઈના મધ્ય સુધી ચર્ચાઓ અને પરામર્શ ચાલશે, ત્યારબાદ અંતિમ નિર્ણય લેવામાં આવશે.
ખાસ નોંધ: જો તમે સ્વિટ્ઝર્લૅન્ડમાં રોકાણ કરવાનું વિચારી રહ્યા હોવ, તો આ કાયદાકીય પરિવર્તનો તમારા પોર્ટફોલિયો પર મોટી અસર પાડી શકે છે.