નવી દિલ્હી :  પશ્ચિમ બંગાળમાં ભારતીય જનતા પાર્ટીએ મેળવેલા અભૂતપૂર્વ જનાદેશ બાદ હવે નવી સરકારના મુખ્યમંત્રીના ચહેરાને લઈને હલચલ તેજ થઈ ગઈ છે. ભાજપના રાષ્ટ્રીય મહાસચિવ અરુણ સિંઘ દ્વારા જારી કરવામાં આવેલી સત્તાવાર અખબારી યાદી મુજબ, પાર્ટીના સંસદીય બોર્ડે પશ્ચિમ બંગાળમાં ધારાસભ્ય દળના નેતાની ચૂંટણી માટે કેન્દ્રીય નિરીક્ષકોની નિમણૂક કરી છે. જેમાં કેન્દ્રીય ગૃહમંત્રી અમિતભાઈ શાહને મુખ્ય નિરીક્ષક અને ઓડિશાના મુખ્યમંત્રી મોહન ચરણ માઝીને સહ-નિરીક્ષક તરીકેની જવાબદારી સોંપવામાં આવી છે.

 બંગાળના રાજકીય ફલક પર શાહની સીધી નજર

બંગાળમાં મળેલી પ્રચંડ જીત બાદ અમિત શાહની સીધી સંડોવણી સૂચવે છે કે ભાજપ નેતૃત્વ આ રાજ્યને કેટલી ગંભીરતાથી લઈ રહ્યું છે. ઓડિશામાં તાજેતરમાં જ મુખ્યમંત્રી બનેલા મોહન માઝીનો આ પ્રક્રિયામાં સમાવેશ કરવો એ પક્ષ હાઈકમાન્ડનો વ્યૂહાત્મક નિર્ણય માનવામાં આવે છે. આ બંને નિરીક્ષકોની હાજરીમાં ટૂંક સમયમાં જ ધારાસભ્યોની બેઠક યોજાશે, જેમાં લેવાયેલો નિર્ણય રાજ્યના આગામી મુખ્યમંત્રીનો માર્ગ મોકળો કરશે.

 મમતા બેનર્જીનો ઘરઆંગણે પરાજય

આ ચૂંટણીમાં સૌથી મોટો ઉલટફેર મમતા બેનર્જીના પોતાના મતવિસ્તાર ભવાનીપુરમાં જોવા મળ્યો છે, જ્યાં તેમણે હારનો સામનો કરવો પડ્યો છે. બીજી તરફ, સુવેન્દુ અધિકારીએ ભવ્ય વિજય મેળવીને પોતાની રાજકીય તાકાત સાબિત કરી છે. ૧૫ વર્ષના તૃણમૂલ કોંગ્રેસના શાસનનો અંત લાવીને ભાજપે રાજ્યની ૨૯૩ બેઠકોમાંથી ૨૦૬ બેઠકો જીતીને બે-તૃતિયાંશ બહુમતી પ્રાપ્ત કરી છે.

 TMCના ગઢમાં કેસરિયો લહેરાયો

ચૂંટણીના જાહેર થયેલા પરિણામો મુજબ, તૃણમૂલ કોંગ્રેસ માત્ર ૮૦ બેઠકો પર સમેટાઈ ગઈ છે. બંગાળમાં ભાજપ પ્રથમ વખત સરકાર રચવા જઈ રહ્યું છે ત્યારે સમગ્ર દેશની નજર અમિત શાહ અને મોહન માઝી પર ટકેલી છે. ધારાસભ્ય દળની બેઠક બાદ સ્પષ્ટ થશે કે બંગાળના મુખ્યમંત્રી તરીકે કોની પસંદગી કરવામાં આવે છે, જે બાદ રાજ્યમાં નવી સરકારના શપથગ્રહણની વિધિ હાથ ધરવામાં આવશે.