મુંબઈ:  જો તમે પણ વોટ્સએપ પર પોતાનો નાનો-મોટો વ્યવસાય કે ઓનલાઈન સ્ટોર ચલાવો છો, તો તમારા માટે મેટા કંપની એક અદભુત અને જાદુઈ ભેટ લઈને આવી છે. મુંબઈમાં યોજાયેલી વોટ્સએપની ત્રીજી વાર્ષિક બિઝનેસ સમિટમાં કંપનીએ સત્તાવાર રીતે 'મેટા બિઝનેસ એજન્ટ'  નામનું એક પાવરફુલ અને મફત AI ટૂલ લોન્ચ કર્યું છે. આ આર્ટિફિશિયલ ઇન્ટેલિજન્સ એજન્ટ તમારા બિઝનેસ એકાઉન્ટ પર અઠવાડિયાના સાતેય દિવસ અને ૨૪ કલાક ચોકીદારની જેમ એક્ટિવ રહેશે. આ ટૂલ ગ્રાહકોના કોઈપણ પ્રશ્નનો સેકન્ડોમાં સચોટ જવાબ આપશે અને તમારા વતી ડીલ્સ પણ ફાઇનલ કરી આપશે, જેનાથી વેપારીઓને હવે મોડી રાત સુધી ગ્રાહકો સાથે ચેટ કરવાની માથાકૂટમાંથી કાયમ માટે મુક્તિ મળી જશે. આ સુવિધા હાલમાં ભારતમાં પસંદગીના યુઝર્સ માટે રોલઆઉટ કરવામાં આવી રહી છે અને બાકીના લોકો વેટિંગ લિસ્ટમાં જોડાઈ શકે છે.

આ હાઈટેક AI એજન્ટને સેટ કરવો અને તેને ટ્રેનિંગ આપવી અત્યંત સરળ છે. વોટ્સએપ બિઝનેસ એપના 'ટૂલ્સ ટેબ' માં જઈને ઓન-સ્ક્રીન સૂચનાઓ ફોલો કરીને તેને મિનિટોમાં એક્ટિવ કરી શકાય છે. વેપારીઓ પોતાના પ્રોડક્ટ કેટલોગ, વેબસાઇટ લિંક, કામકાજનો સમય, દસ્તાવેજો અને બેસ્ટ સેલિંગ પ્રોડક્ટ્સના ફોટા અપલોડ કરીને આ AI ને વધુ સ્માર્ટ બનાવી શકે છે. તમે પોતે નક્કી કરી શકો છો કે આ સ્માર્ટ એજન્ટ ક્યારે જવાબ આપવો—જેમ કે તમામ નવી ચેટ્સ માટે કે પછી માત્ર ફેસબુક અને ઇન્સ્ટાગ્રામની જાહેરાતો પરથી રીડાયરેક્ટ થઈને આવતા ગ્રાહકો માટે. સૌથી ખાસ વાત એ છે કે જો કોઈ ગ્રાહક ગૂંચવણમાં મુકાય અથવા ખાસ લાઈવ સપોર્ટ ઈચ્છે, તો આ AI તાત્કાલિક બિઝનેસ માલિકને નોટિફિકેશન મોકલશે જેથી કોઈ માણસ  ચેટ પોતાના કંટ્રોલમાં લઈ શકે.

ગ્રાહકોની પારદર્શિતા અને સુરક્ષા માટે, જ્યારે કોઈ પણ યુઝર પહેલીવાર આવા AI સંચાલિત બિઝનેસ પેજ સાથે વાતચીત શરૂ કરશે, ત્યારે સ્ક્રીન પર સ્પષ્ટ ડિસ્ક્લેમર દેખાશે કે ચેટની ગુણવત્તા સુધારવા માટે આ મેસેજ મેટાના AI ને મોકલવામાં આવી રહ્યા છે. જો કે, આ નવી ટેકનોલોજી અપનાવવાથી કેટલીક જૂની સુવિધાઓ જેવી કે બ્રોડકાસ્ટ લિસ્ટ, ડિસઅપીયરિંગ મેસેજ અને ઓટો ગ્રીટિંગ મેસેજ પર અસર પડી શકે છે, તેમજ લિંક કરેલા ડિવાઇસ પણ પહેલીવાર ડિસ્કનેક્ટ થઈ જશે. મેટાએ નાના વેપારીઓ માટે આ આખી સુવિધા તદ્દન ફ્રી રાખી છે, જ્યારે મોટા કોર્પોરેટ ગૃહો માટે 'મેટા બિઝનેસ એજન્ટ પ્લેટફોર્મ' લોન્ચ કર્યું છે જ્યાં OpenAI કે એન્થ્રોપિકની જેમ પ્રતિ ટોકન ચાર્જ વસૂલવામાં આવશે. ડિજિટલ બિઝનેસના ઇતિહાસમાં આ એક બહુ મોટો ક્રાંતિકારી વળાંક સાબિત થશે.