નવી દિલ્હી:  સંયુક્ત રાષ્ટ્ર મહાસભા દ્વારા વિશ્વના નકશાને વધુ સચોટ અને વાસ્તવિક દર્શાવવા માટે લાવવામાં આવેલા એક મહત્ત્વપૂર્ણ ઠરાવને ભારતે સમર્થન આપ્યું છે. જોકે, આ મતદાન સાથે જ નવી દિલ્હીએ વૈશ્વિક મંચ પરથી બહુ સ્પષ્ટ અને કડક શબ્દોમાં સંકેત આપ્યો છે કે નકશાનું પ્રોજેક્શન ગમે તે વપરાય, પરંતુ જમ્મુ-કાશ્મીર અને લદ્દાખ ભારતનો અભિન્ન અને અવિભાજ્ય અંગ છે અને દેશની સીમાઓ સાથે કોઈ પણ પ્રકારની છેડછાડ કે ભ્રામક ચિત્રણ ચલાવી લેવામાં આવશે નહીં.
મળતી વિગતો અનુસાર, સદીઓથી વપરાતા 'મર્કેટર પ્રોજેક્શન' (Mercator Projection) નકશામાં વિષુવવૃત્તથી દૂર આવેલા પ્રદેશો તેના વાસ્તવિક ક્ષેત્રફળ કરતાં ખૂબ મોટા દેખાય છે, જ્યારે આફ્રિકા જેવા ખંડો નાના દેખાય છે. આ તકનીકી ખામી દૂર કરવા "સમાન-ક્ષેત્ર નકશા પ્રક્ષેપણ"  લાવવા માટે રજૂ થયેલા ઠરાવને ૧૬૪-૧થી ભારે બહુમતીથી મંજૂરી મળી હતી, જેમાં ભારતે પણ તરફેણમાં મતદાન કર્યું હતું.

ભારત તરફથી સંયુક્ત રાષ્ટ્રમાં પ્રથમ સચિવ રઘુ પુરી અને વિદેશ મંત્રાલયના પ્રવક્તા રણધીર જયસ્વાલે સ્પષ્ટતા કરી હતી કે, ભારતનું સમર્થન કેવળ 'સમાન-ક્ષેત્ર પ્રક્ષેપણ'ના તકનીકી અને વૈજ્ઞાનિક સિદ્ધાંત પૂરતું જ સીમિત છે. આનો અર્થ એવો બિલકુલ નથી કે ભારતે યુએનના કોઈપણ ચોક્કસ પૂર્વ-તૈયાર મોડેલ કે રાજકીય નકશાને આંધળો સ્વીકાર આપી દીધો છે. શાળાઓ, દેશો અને મેપિંગ એજન્સીઓને તેમની જરૂરિયાત મુજબ પદ્ધતિ પસંદ કરવાની તટસ્થ સ્વતંત્રતા હોવી જોઈએ.

વિદેશ મંત્રાલયે (MEA) મક્કમ વલણ અપનાવતા ચેતવણી આપી છે કે આ ઠરાવનો ઉપયોગ કોઈ રાજકીય સરહદો બદલવા કે વિવાદ ઊભો કરવા માટે થઈ શકે નહીં. કેન્દ્રશાસિત પ્રદેશો જમ્મુ-કાશ્મીર અને લદ્દાખ ભારતનો અવિભાજ્ય હિસ્સો છે. આ વિસ્તારોને ભારતના સત્તાવાર નકશા મુજબ જ દર્શાવવાના રહેશે અને કોઈપણ ગેરમાર્ગે દોરતું કે વિવાદિત ચિત્રણ ભારત સહન કરશે નહીં.